قازاق ساحناسىنىڭ ايتۋلى تۇلعاسى, انالار بەينەسىن جاساۋدىڭ ولشەمىنە اينالعان, كسرو جانە قازاق كسر حالىق ءارتىسى, مەملەكەتتىك سىيلىقتىڭ لاۋرەاتى ءسابيرا مايقانوۆانىڭ 100 جىلدىعى ەلورداداعى ۇلتتىق كىتاپحانادا اتالىپ ءوتتى.
سىر وڭىرىنەن تۇلەپ ۇشقان ساحنا ساڭلاعى وتكەن عاسىردىڭ 30-جىلدارىنان قازاق تەاترىنىڭ قالىپتاسۋىنا وزىندىك ۇلەسىن قوسۋمەن قاتار, تانىپ-بىلە الساق ءسابيرا مايقانوۆا ۇلگىسىن قالىپتاستىردى. ونىڭ تۇڭعىش ءرولى بەيىمبەت ءمايليننىڭ «مايدان» دراماسىنداعى التىناي بولسا, ودان كەيىنگى جەردە م.اۋەزوۆ, ع.مۇسىرەپوۆ, س.مۇقانوۆ, وزگە دە قالامگەرلەردىڭ پەسالارىنداعى الۋان ءتۇرلى بەينەلەردى ساحنا تورىنە شىعاردى. ۇلى ءارتىستىڭ شىڭعىس ايتماتوۆتىڭ «انا – جەر-اناسىنداعى» تولعاناي بەينەسى كورگەندەردىڭ كوزايىمىنا اينالىپ, كەيىنگىلەردىڭ «كورمەدىك-اۋ!» دەگەن ارمانى بولىپ قالدى.
وسىنداي دارا تالانتتىڭ بۇكىل ءبىتىم-بولمىسىن جيىلعان جۇرتقا قازاقستاننىڭ ەڭبەك سىڭىرگەن ءارتىسى رىمكەش ومارحانوۆا ناقتى دايەكتەرمەن جەتكىزدى. اسىرەسە, ونىڭ ۇزبەي ايتىپ جۇرەتىن «ومىردە اردىڭ, ادامشىلىقتىڭ ءىزى عانا قالادى», دەگەن ءسوزىن مىسالعا كەلتىرىپ: «ونى بۇگىن ءسابيرا مايقانوۆا اپامىزدىڭ وزىنە قاراتىپ ايتسام ارتىق بولمايدى», دەي كەلىپ, «انا – جەر-انادان» ءۇزىندى كورسەتىپ, «بالاسىنىڭ ورنىنا تەمىرجولدى قۇشاقتاپ قالعان انانىڭ سوڭى مەن بولايىن» دەگەن سوزبەن ويىن تۇيىندەپ, كوزىنە جاس ىرىكتى.
ال تەاتر سىنشىسى, پروفەسسور اشىربەك سىعاي «ءسابيرا كىم؟» دەگەن سۇراقتى العا تارتىپ, قازاق ونەرىنىڭ ءۇش ارىسى: قاپان بادىروۆتاي اقتاڭگەردىڭ – 110, قازاق ونەرى مەن كينوسىنىڭ اق كەمەسى شاكەن ايمانوۆتىڭ – 100, قازاق ونەرىنىڭ اقجەلكەنى – ءسابيرا مايقانوۆانىڭ 100 جىلدىعىن بيىل اتاپ ءوتۋ جايىنا توقتالدى. «بيىلعى جىلدى «ءسابيراتانۋ جىلى» دەپ اتاساق ارتىق بولمايدى», دەگەن ءۋاجىن العا تارتىپ, ءسابيراداي اسىلىمىزدى ورىستىڭ بەلگىلى ارتىستەرىمەن سالىستىرىپ, «بۇگىنگى ۇرپاقتىڭ باقىتى – ءوز تاريحىن وزىمىزدەن باستاۋ قاجەتتىگىن بىلەتىندىگى كەڭەس زامانىندا ءبىز الدىمەن وزگەنى ايتىپ, ودان كەيىن بارىپ ءوزىمىز تۋرالى ءسوز قوزعايتىنبىز. ءسابيرا قازاق ونەرىنىڭ سيمۆولى, مەتافوراسى», دەدى. سىنشى ول زاماننىڭ ارتىستەرى ومىردە دە, ونەرگە دە بىردەي ەكەنىن ايتىپ, بۇگىنگى ارتىستەردىڭ كەيبىرى دايىن ءماتىننىڭ «ق ۇلى» ەكەنىنە, جەتىنشى قاتاردا وتىرعان كورەرمەنگە داۋىسىن جەتكىزە الماي جاتاتىنىنا وكىنىش ءبىلدىرىپ, ءسابيرانى تانۋ ءۇشىن ونىڭ بۇكىل ونەر جولىن, ساحناعا شىعارعان رولدەرىن سارالاي ءبىلۋدىڭ, اسىرەسە, كەيىنگى جاستارعا اسا قاجەتتىگىن العا تارتتى.
پروفەسسور ساۋلەبەك اسىلحان ءسابيرا مايقانوۆانىڭ ءوزى ارقا توسىندەگى استاناعا جەتپەگەنمەن رۋحى, ونەرى جەتكەنىن تىلگە تيەك ەتىپ, داناگوي, قامقورشى, «باس كەسپەك بولسا دا, ءتىل كەسپەك جوق» دەپ اقيقاتتى ايتاتىن ادام قانداي بولادى دەسە, ءسابيرا مايقانوۆا ەسكە تۇسەتىنىن جەتكىزدى. ول كەشەگى كەڭەس داۋىرىندە ارتىستەر كوپ نارسەدەن كەم دە قالماعانىن, ءبىر جىلدا 17 ونەر يەسىنىڭ پاتەر الىپ, 12-ءسىنىڭ جوعارى اتاققا قولى جەتكەنىن نازارعا سالىپ, بۇگىنگى ارتىستەردىڭ, ونىڭ ىشىندە جاستاردىڭ 30-40 مىڭ تەڭگەمەن جانكەشتى جۇمىس ىستەپ جۇرگەنىنە مىسالدار كەلتىردى. ساتيريك كوپەن امىربەك تە ءسابيرا اپامىزدىڭ جاساندىلىقتان اۋلاق ناعىز حالىقتىق قاسيەتتەرىن تاراتىپ ايتتى.
كەشتە ق.قۋانىشباەۆ اتىنداعى اكادەميالىق قازاق مۋزىكا تەاترىنىڭ ارتىستەرى جانە قازاق ۇلتتىق ونەر اكادەمياسىنىڭ ستۋدەنتتەرى ءسابيرا مايقانوۆا ويناعان سپەكتاكلدەردەن ءۇزىندى كورسەتىپ, مونولوگتار وقىدى. ايتۋلى ونەر يەسىنىڭ ءسۇيىپ تىڭداعان اندەرىن جاستار بىرىنەن كەيىن ءبىرى اۋەلەتتى.
سۇلەيمەن مامەت,
«ەگەمەن قازاقستان».