سەناتور اندرەي لۋكين ءوزىنىڭ دەپۋتاتتىق ساۋالىندا دەنساۋلىق ساقتاۋ مينيسترلىگى جانە وعان قاراستى كومپانيالاردىڭ قىزمەتىندەگى زاڭ تالاپتارىن بۇزۋ فاكتىلەرىن اتاپ ءوتتى, دەپ حابارلايدى Egemen.kz.
سەناتوردىڭ ايتۋىنشا, دەنساۋلىق ساقتاۋ مينيسترلىگى ءدارى-دارمەك جانە مەديتسينالىق ونىمدەرگە ارنالعان شىعىنداردى جوسپارلاعاندا ماڭىزدى كورسەتكىشتەر جوق نەمەسە جوعارى بەلگىلەنگەن بيۋدجەتتىك ءوتىنىم نەگىزىندە جاساعان. جۇمىستاعى مۇنداي ءتاسىل 66 ميلليارد تەڭگەگە جۋىق بيۋدجەت قاراجاتىنىڭ ءتيىمسىز جۇمسالۋىنا الىپ كەلدى.
«2020 جىلى 39 نوزولوگياعا شامامەن 66 ملرد تەڭگە ءتيىمسىز جۇمسالدى. وندا 6 نوزولوگيا بويىنشا 26 ملرد تەڭگە كولەمىندە تولىق قارجىلاندىرىلماۋ اياسىندا زاڭ تالاپتارىنىڭ وسىلاي بۇزىلۋىنا جول بەرىلگەن. «سك-فارماتسيا» جشس ساقتاۋ قويمالارىندا 2019-2020 جىلدارى 159 ملن تەڭگەگە ساتىپ الىنعان پرەپاراتتار ساقتاۋلى, مەرزىمى وتۋىنە بايلانىستى ولار جويۋعا جاتادى. سونىمەن قاتار, مينيسترلىك ۇلتتىق ورتالىقتىڭ ەسەپتەۋلەرى نەگىزىندە, سونداي-اق كودەكستىڭ 76-بابىنا قاراماستان ءدارى-دارمەكتىڭ شەكتى باعاسىن كوتەرىپ جىبەرگەن. ناتيجەسىندە, ءدارى-دارمەك ءوز قۇنىنان 1,5 ملرد تەڭگەگە قىمباتقا ساتىپ الىندى», دەدى اندرەي لۋكين سەناتتىڭ جالپى وتىرىسىندا.
سەناتور وسىعان بايلانىستى دارىلىك زاتتاردى جەتكىزۋشىلەر اراسىنداعى باسەكەلەستىككە قارسى كەلىسىمدەردى ازىرلەۋگە, پاتسيەنتتەر تۋرالى مالىمەتتەرگە ماڭىز بەرە وتىرىپ انىقتىعىن قامتاماسىز ەتۋگە قاتىستى سۇراقتارعا جاۋاپ بەرۋدى سۇرادى. اندرەي لۋكين سونىمەن قاتار مينيسترلىكتىڭ بيۋدجەتتىك ءوتىنىمىن دايىنداۋ كەزىندە بارلىق مەديتسينالىق ۇيىمدارعا ارنالعان دارىلىك زاتتار مەن مەديتسينالىق بۇيىمدارعا قاجەتتىلىكتى ايقىنداۋدىڭ بىرىڭعاي ەرەجەسىن ازىرلەۋدىڭ ماڭىزدىلىعىن اتاپ ءوتتى.