ەلىمىزدەگى تەڭگە باعاسىنىڭ ۇلتتىق بانكتىڭ شەشىمىمەن كۇرت وزگەرۋىنە قاتىستى كورشى ەلدەردەگى ساراپشىلار دا ءوز پىكىرلەرىن ءبىلدىرۋ ۇستىندە
«قازاقستاندا ەلدىڭ ۇلتتىق بانكىنىڭ جاريالاۋىمەن تەڭگە باعامىن تۇزەتۋ جۇزەگە استى, – دەپ مالىمدەدى «قىرعىزستان قازكوممەرتسبانك» ااق قازىناشىلىعىنىڭ باسشىسى ايبەك قارامۇراتوۆ. – ەگەر ءبىز سوڭعى كەزدەرى رەسەي ءرۋبلى مەن قىرعىز سومىنىڭ دوللارعا قاتىستى كۇرت قۇلدىراي باستاۋىن بايقاساق, وسى ۋاقىتتار ارالىعىندا تەڭگەنىڭ دوللارعا قاتىستى باعامى 155-160 تەڭگە كولەمىندە نەعۇرلىم تۇراقتىلىقتى ساقتاپ كەلگەن بولاتىن. مەنىڭ ويىمشا, ەندى قازاقستان ۇلتتىق بانكى دە ءوزىنىڭ كورشىلەرىندەگى ورىن العان جاعدايعا قاتىستى قازاقستان تەڭگەسىنىڭ شىنايى كۋرسىن ناقتىلاۋ ىسىنە كىرىسىپ وتىر».
ساراپشى وسىعان بايلانىستى قازاقستاندا ءبىرىنشى كۇنى ەداۋىر دارەجەدە ابىرجۋشىلىقتىڭ ەتەك العاندىعىن ايتادى. وسى جاعدايعا بايلانىستى 1 دوللاردىڭ قۇنى 200 تەڭگەدەن استام مولشەرگە دەيىن شارىقتاپ كەتىپ وتىر. ال كەيبىر بانكتەر قوسىمشا شارالار قابىلدانعانعا دەيىن كونۆەرتاتسيالاۋدى توقتاتقان.
«مەنىڭ ويىمشا, رىنوكتاعى بۇل ابىرجۋشىلىق اپتانىڭ اياعىنا دەيىن باسىلىپ, تەڭگە باعامى تۇراقتاناتىن بولادى. ول 1 دوللارعا 190 تەڭگەدەن اسپاۋى مۇمكىن», – دەيدى ساراپشى.
وسىعان بايلانىستى ايبەك قارامۇراتوۆ قىرعىز كاسىپكەرلەرىن ءماسەلەنىڭ ارتىن كۇتە تۇرۋعا شاقىرعان. ول ءبىر-ەكى كۇننىڭ وزىندە جاعداي نەعۇرلىم انىقتالا تۇسەتىن بولادى دەپ ەسەپتەيدى.
Freedom Finance ينۆەستيتسيالىق كومپانياسىنىڭ كورپوراتيۆتىك كليەنتتەرمەن جۇمىس جونىندەگى باسقارما توراعاسى ساكەن ۇسەردىڭ بولجامىنشا, قازاقستان ۇلتتىق بانكىنىڭ بۇل شاراسى قازاقستاندىق شيكىزات كومپانيالارى ءۇشىن قولايلى اسەر ەتپەك.
«ەگەر مۇنداي كومپانيالاردا شيكىزات ساتۋ دوللارمەن ءجۇزەگە اسىرىلاتىندىعىن ەسەپكە الاتىن بولساق, ولاردىڭ كەلەسى توقساندىق ەسەپتەرى بويىنشا تاباتىن تابىس كولەمى قازىرگىدەن ەداۋىر ارتا تۇسەتىندىگىن بولجاۋعا بولادى. بۇل اسىرەسە, «قازاقمىس», «قازمۇنايگاز» بارلاۋ ءوندىرۋ» اق سەكىلدى ءىرى كومپانيالارعا قاتىستى كۇتىلەتىن جايت. بۇگىنگى كۇنى لوندون بيرجاسىندا تىركەلگەن بارلىق قازاقستاندىق كومپانيالار 8-15 پايىز كولەمىندە ءوسىم الاتىن بولادى», – دەپ مالىمدەدى ول.
وسىعان بايلانىستى ساراپشى تۇتىنۋشىلارعا لوندون بيرجاسىندا تىركەلگەن قازاقستاندىق كومپانيالاردىڭ دوللارلىق اكتسيالارىن ساتىپ الۋ جونىندە كەڭەس بەرگەن. ونىڭ ايتۋىنشا, كەشەگى كۇننىڭ وزىندە قازاقستاندىق قور بيرجاسىنداعى وسىنداي كومپانيالاردىڭ اكتسيالارىنىڭ باعاسى 8-22 پايىز ارالىعىندا وسە تۇسكەن.
«تەڭگە باعامىنا وزگەرىستەر ونىڭ وسى ۋاقىتقا دەيىن قالىپتاسقان باعامىن تۇراقتى ۇستاپ تۇرۋ قيىندىق تۋدىرعاندىقتان جۇزەگە استى دەپ ەسەپتەيمىن. تەڭگە بويىنشا بانكارالىق ستاۆكا وتە جوعارى دەڭگەيدە بولدى. بۇل بانك سەكتورىنىڭ كىرىستىلىگىنە كەرى اسەرىن تيگىزدى. سوندىقتان ەرتە مە, كەش پە بۇل ستاۆكانى وزگەرتۋگە ءبارىبىر تۋرا كەلەتىن ەدى», – دەيدى ساراپشى.
ونىڭ ايتۋىنشا, ۇلتتىق بانكتىڭ بۇل قادامى جالپىلاي العاندا, قازاقستان ەكونوميكاسىنا, ونىڭ ىشىندە شيكىزات ەكونوميكاسىنا وڭ اسەر ەتپەك. وسى رەتتە ساراپشى تەڭگە باعامىنىڭ جوسپارلى تۇردە وزگەرۋىنە ءرۋبلدىڭ قازىرگى جاعدايدا ەلەۋلى اسەر ەتكەن دەپ ەسەپتەيدى.
«دەگەنمەن, بۇل جەردە رۋبلگە قاراعاندا تەڭگەنىڭ رەتتەۋگە نەعۇرلىم بەيىم ەكەندىگىن ايتۋىمىز كەرەك. ەگەر بۇل ماسەلەنى كەدەن وداعى اياسىنداعى ينتەگراتسيالىق ۇدەرىستەرگە قاتىستى قاراستىراتىن بولساق, وندا ۇلتتىق بانكتىڭ بۇل قادامىن وسى ماسەلەدە نەعۇرلىم ورىندى, اتالعان وداق اياسىندا ۇلتتىق ەكونوميكانى قورعاۋعا باعىتتالعان شارا رەتىندە اتاپ كورسەتۋىمىز كەرەك», – دەيدى ساكەن ۇسەر.
سۇڭعات ءالىپباي,
«ەگەمەن قازاقستان».