قوستاناي وبلىسىنداعى امانقاراعاي ورمانىندا تاۋەلسىزدىكتىڭ 30 جىلدىعىنا ارنالعان Auliekol Jastar Fest اشىق فەستيۆالى ءوتتى. ءىس-شارانى ۇيىمداستىرعان «دوستىق» بالالار مادەني ساۋىقتىرۋ كەشەنى قىزمەتكەرلەرىنىڭ ايتۋىنشا, اتالعان فەستيۆال اۋليەكول وڭىرىندە ىشكى تۋريزم مەن بۇقارالىق سپورتتى ناسيحاتتاۋدى كوزدەيدى.
فەستيۆالعا جاس مەملەكەتتىك قىزمەتشىلەر مەن اۋداننىڭ بەلسەندى جاستارىنان قۇرالعان 8 كوماندا سپورتتىق جانە تۋريستىك باعدارلامالار بويىنشا ءوزارا سايىسقا ءتۇستى. ولاردىڭ قاتارىندا امانقاراعاي, نوۆونەجين, ديەۆ, نوۆوسەلوۆ, موسكالەۆ اۋىلدىق وكرۋگتەرى مەن تيموفەەۆ اۋىلىنىڭ جاستار قۇرامالارى بار.
باعدارلاما بويىنشا سايىسكەرلەر تۋريستىك جانە سپورتتىق كەدەرگىلەردەن ءوتىپ, مەجەلى نىسانعا ءبىرىنشى بولىپ جەتۋى شارت. كوماندالار ورمان ىشىندەگى نۋ جىنىستان جول تابۋ, وزەن وتكەلىنەن سۋ بولماي ءوتۋ, ۆەلوسيپەدكە ءمىنىپ جىلدامدىق جارىستىرۋ سياقتى كەزەڭدەردى باعىندىرىپ, مىلتىق اتىپ نىساناعا ءدال تيگىزۋ, اياققا قاپ كيىپ جارىسۋ, ارقانمەن ورمەلەۋ سياقتى بۇقارالىق سپورت تۇرلەرى بويىنشا سىنعا ءتۇستى.
– بۇل جوبا العاش رەت اۋليەكول اۋدانىنىڭ اكىمى ەرلان تەمەنوۆتىڭ باستاماسىمەن 2019 جىلى ۇيىمداستىرىلعان. بىلتىر پاندەمياعا بايلانىستى وتپەي قالدى. ەندى, مىنە, اراعا جىل سالىپ تاعى قولعا الىپ وتىرمىز. Auliekol Jastar Fest قىسقا ۋاقىت ىشىندە اۋدان جاستارى اسىعا كۇتەتىن سپورتتىق ءىس-شارالاردىڭ بىرىنە اينالدى, – دەدى «دوستىق» كەشەنىنىڭ ديرەكتورى بيبىگۇل ءابدىراحمانوۆا.
سايىس قورىتىندىسى بويىنشا, اۋدان ورتالىعى – اۋليەكول اۋىلىنىڭ جاستارى جەڭىمپاز اتانىپ, باس كۋبوكتى يەلەندى. الايدا فەستيۆالعا قاتىسقان كوماندالاردىڭ ەشقايسىسى قۇر قول قايتقان جوق. كەشەن باسشىلىعى جاستاردىڭ بارىنە Auliekol Jastar Fest دەگەن بەلگىسى بار ەستەلىك سىيلىقتار مەن ارنايى ديپلومدار تابىس ەتتى.