سارسەنبىگە ارنالعان اۋا رايى بولجامى

سارسەنبىدە انتيتسيكلون رەسپۋبليكانىڭ باسىم بولىگىندە اسەرىن ساقتايدى, سوندىقتان كوبىنەسە جاۋىن-شاشىنسىز اۋا رايى كۇتىلەدى. سولتۇستىك پەن شىعىستا قار جاۋى ىقتيمال.

ال ەلىمىزدىڭ باتىسىندا, وڭتۇستىگىندە, وڭتۇستىك-شىعىسىندا جەلدىڭ كۇشەيۋى, وڭتۇستىگىندە جانە باتىسىندا شاڭدى داۋىل, سولتۇستىگىندە, شىعىسىندا, وڭتۇستىك شىعىسىندا تۇمان كۇتىلەدى.

جامبىل وبلىسىنىڭ تاۋلى جانە تاۋ بوكتەرىندەگى اۋداندارىندا تۇمان تۇسەدى, وبلىستىڭ وڭتۇستىك-باتىسىندا, سولتۇستىك-شىعىسىندا جانە تاۋلى اۋداندارىندا جەلدىڭ كۇشەيۋى 15-20, ەكپىنى 23-28 م/س.

ماڭعىستاۋ وبلىسىنىڭ باتىسىندا, ورتالىعىندا كۇندىز شاڭدى داۋىل كوتەرىلەدى, جەلدىڭ جىلدامدىعى 23 م/س جەتەدى. تۇركىستان وبلىسىنىڭ تاۋلى اۋداندارىندا جەل تۇرادى - 15-20, ەكپىنى 23 م/س.

الماتى وبلىسىنىڭ الاكول كولدەرى اۋدانىندا, كۇندىز اتىراۋ وبلىسىنىڭ باتىسى مەن ورتالىعىندا جەل 17-22 م/س, اتىراۋ وبلىسىندا شاڭدى داۋىل كۇتىلەدى. قىزىلوردا وبلىسىنىڭ ورتالىعىندا جەل شاڭدى داۋىلمەن 15-20 م/س كۇشەيەدى.

سولتۇستىك قازاقستان وبلىسىنىڭ شىعىسىندا, تۇندە پاۆلودار وبلىسىنىڭ سولتۇستىگىندە, شىعىس قازاقستان وبلىسىنىڭ شىعىسىندا تۇمان ءتۇسۋى ىقتيمال.