كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ سەلەكتورلىق رەجىمدە كەڭەس وتكىزىپ, وندا ۇلتتىق ۆاليۋتانىڭ ايىرباس باعامىنا تۇزەتۋ ەنگىزىلۋىنە بايلانىستى وڭىرلەردەگى اعىمداعى احۋال تالقىلاندى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەڭەس جۇمىسىنا ورتالىق مەملەكەتتىك ورگانداردىڭ باسشىلارى, وبلىستاردىڭ, استانا جانە الماتى قالالارىنىڭ اكىمدەرى قاتىستى.
بۇگىندە جەرگىلىكتى اتقارۋ ورگاندارىنىڭ باستى مىندەتى ءبىرىنشى قاجەتتى تاۋارلارعا باعانىڭ نەگىزسىز وسۋىنە جانە وڭىرلەردەگى ۆاليۋتا ايىرباستاۋ پۋنكتتەرىندەگى الىپساتارلىق دۇربەلەڭنىڭ ورىن الۋىنا جول بەرمەۋ, دەدى ب.ساعىنتاەۆ.
سوعان وراي ءبىرىنشى ۆيتسە-پرەمەر اكىمدىكتەرگە ساۋدا نۇكتەلەرىنىڭ ءۇزىلىسسىز جۇمىسىن قامتاماسىز ەتۋدى, الەۋمەتتىك ماڭىزدى تاۋار تۇرلەرى مەن ججم باعالارىنا كۇندەلىكتى مونيتورينگ جۇرگىزۋدى, پايدا بولعان پروبلەمالارعا ءتيىستى زاڭدى سانكتسيالار قولدانۋعا دەيىن بارىپ, شۇعىل ۇنقاتۋدى تاپسىردى.
سونداي-اق, اكىمدىكتەرگە ۇلتتىق بانك فيليالدارىمەن بىرلەسىپ قارجى رىنوكتارىنداعى جاعدايدى مۇقيات قاداعالاۋ جانە ۆاليۋتانىڭ ايىرباس باعامىنىڭ ۇلتتىق بانك بەلگىلەگەن ولشەمدەردەن اۋىتقۋىنا جول بەرمەۋ جونىندە شارالار قابىلداۋ تاپسىرىلدى.
ونىڭ سىرتىندا كەڭەستە وڭىرلىك ازىق-ت ۇلىك تاۋارلارىن تۇراقتاندىرۋ قورلارىنىڭ قىزمەتىنە قاتىستى ماسەلەلەر دە تالقىلاندى.
قالىپتاسقان جاعدايدا وڭىرلىك تۇراقتاندىرۋ قورلارى ازىق-ت ۇلىك ونىمدەرى باعاسىن تۇراقتاندىرۋدا ىقپالدى قۇرال بولىپ تابىلادى, دەپ اتاپ ءوتتى ب.ساعىنتاەۆ.
تۇراقتاندىرۋ قورلارى قىزمەتى ماسەلەلەرىن جالپى ۇيلەستىرۋ ءودم-گە جۇكتەلىپ, وعان احۋالدى جانە الەۋمەتتىك ماڭىزدى ازىق-ت ۇلىك تاۋارلارىنىڭ باعاسىن رەتتەۋ مونيتورينگى بويىنشا ەبجم جانە بقا-مەن تىعىز بايلانىستى قامتاماسىز ەتۋ تاپسىرىلدى.
ىشكى رىنوكتى ازىق-ت ۇلىكپەن قامتاماسىز ەتۋ جانە وڭىرلەردەگى ازىق-ت ۇلىك تاۋارلارى ءوندىرىسىنىڭ بالانسىنا قاداعالاۋ جاساۋ اۋىل شارۋاشىلىعى مينيسترىنە جۇكتەلدى.
حالىق اراسىندا الەۋمەتتىك ماڭىزدى تاماق ونىمدەرى باعالارىن تۇراقتاندىرۋ جونىندە ۇكىمەت پەن ۇلتتىق بانك قابىلداعان شارالاردى ءتۇسىندىرۋ ءبىزدىڭ ەڭ باستى مىندەتىمىز بولىپ تابىلادى, دەپ اتاپ ءوتتى ب.ساعىنتاەۆ.
وسى ورايدا پرەمەر-مينيستر سەرىك احمەتوۆتىڭ تاپسىرماسى بويىنشا وڭىرلەردەگى وپەراتيۆتى احۋالعا باقىلاۋ جاساۋ پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆقا جۇكتەلگەنىن ەسكە سالا كەتۋ قاجەت.