31 جاستاعى پاۆەل ءرۋلدى كولىگىمەن باسىپ ولتىرگەن تەمىرتاۋ پروكۋرورىنىڭ كومەكشىسى قانىش مامالينوۆ تارتىپتىك كەڭەستىڭ ۇسىنىسىمەن قىزمەتىنەن بوساتىلدى. بۇل تۋرالى «ينتەرفاكس-قازاقستان» اگەنتتىگى حابارلادى.
اگەنتتىك تىلشىسىمەن بولعان اڭگىمەدە پروكۋراتۋرا قىزمەتكەرىنىڭ ءبىرى ارىپتەسىنىڭ كىناسىنەن جول اپاتى ورىن العانىن جوققا شىعارماپتى. ال تەرگەۋ بارىسىندا جول ەرەجەسىن بۇزعان ايىپكەر يەلىگىندەگى كولىكتىڭ تەحنيكالىق تەكسەرۋدەن وتكەندىگى تۋرالى كۋالىكتىڭ جالعان ەكەنى انىقتالدى. «قازا بولعان جىگىتتىڭ تۋىستارى ايىپكەرمەن تاتۋلاسقانىمەن, قىلمىستىق ءىستى توقتاتۋ جونىندە ارنايى قاۋلى شىعارىلعان جوق. سوندىقتان ورىن العان جول اپاتى جان-جاقتى تەكسەرىلۋدە», - دەلىنگەن وبلىستىق پروكۋراتۋرانىڭ ءباسپاسوز قىزمەتى تاراتقان مالىمدەمەدە.
وسىنىڭ الدىندا تەمىرتاۋ قالاسىنىڭ پروكۋرورى نۇرجان سۇگىراليەۆ بۇقارالىق اقپارات قۇرالى وكىلىنە بەرگەن سۇحباتىندا بىلاي دەگەن ەدى: «ساراپتاما ناتيجەسى قانىش ءمامالينوۆتىڭ ىشىمدىك ىشپەگەنىن دالەلدەدى. ورىن العان وقيعا ابايسىزدا جاسالعان قىلمىس بولىپ ەسەپتەلەدى. جالپى, بۇعان بايلانىستى ناقتى تۇجىرىمدى تەرگەۋ امالدارى اياقتالعان سوڭ, ايتا الامىز».
ءامىرحان الماعانبەتوۆ.
دەرەككوز: «ينتەرفاكس-قازاقستان».
فوتو: Nordovia-news.ru.