نۇر-سۇلتاندا قىركۇيەكتە بالالاردىڭ كوروناۆيرۋسپەن اۋىرۋى جيىلەي تۇسكەن. بۇل تۋرالى نۇر-سۇلتان قالاسىنىڭ باس مەملەكەتتىك سانيتارلىق دارىگەرى سارحات بەيسەنوۆا ايتتى, دەپ حابارلايدى Egemen.kz.
ونىڭ ايتۋىنشا, قالاداعى ەپيدەميولوگيالىق جاعداي تۇراقسىز. قالا ءالى دە «قىزىل» ايماقتا.
«قالادا تاۋلىگىنە 200-280 جاڭا جاعداي تىركەلەدى. قىركۇيەكتە تامىزبەن سالىستىرعاندا كورسەتكىش 3,5 ەسەگە تومەندەگەن. قىركۇيەكتە اۋرۋ جۇقتىرعان بالالاردىڭ ۇلەسى 16 پايىزدان 24,3 پايىزعا ءوستى. جاسوسپىرىمدەردە 2,5 پايىزدان 5,4 پايىزعا دەيىن وسكەن. اۋىرعان بالالاردىڭ ۇلەسى 2,3 پايىزدان 20 پايىزعا دەيىن ءوستى. وقۋ جىلى باستالعالى 2232 مەكتەپ وقۋشىسى اۋىردى. بۇل جالپى اۋىرعانداردىڭ 19,6 پايىزى جانە جالپى مەكتەپ وقۋشىلارىنىڭ 1 پايىزى بولادى. ونىڭ ىشىندە 642 مەكتەپ وقۋشىسى وقۋ جىلى باستالعانعا دەيىن اۋىرعان, 1590 وقۋشى وقۋ باستالعاننان كەيىن اۋىرعان», دەدى بەيسەنوۆا بريفينگتە.
سانيتارلىق دارىگەردىڭ ايتۋىنشا, جاعداي قالاداعى 125 مەكتەپتىڭ 1237 سىنىبىندا تىركەلگەن. 1526 وقۋشى ەمدەلىپ, مەكتەپكە ورالعان. «قازىر 88 مەكتەپتىڭ 303 سىنىبىندا كارانتين شارالارى جالعاسىپ جاتىر. اۋىراتىنداردىڭ ەڭ كوبى 3-8 سىنىپ وقۋشىلارى اراسىندا بايقالادى, بۇل - 963 جاعداي نەمەسە مەكتەپ وقۋشىلارىنىڭ اراسىندا اۋىرعانداردىڭ 43 پايىزى», دەپ قوستى سارحات بەيسەنوۆا.