زىمىراندارىن سىناقتان ءساتتى وتكىزدى
يران بيلىگى وزدەرىنىڭ جاڭا ەكى زىمىرانىن سىناقتان ءساتتى وتكىزگەندەرىن مالىمدەدى. «فرانس-پرەسس» اگەنتتىگىنىڭ حابارلاۋىنشا, بۇل سىناقتار يسلام توڭكەرىسىنىڭ 35 جىلدىعىنا ورايلاستىرىلىپ وتىر.
يران قورعانىس ءمينيسترى حوسەين دەگان: «ءبىز بالليستيكالىق زىمىراننىڭ جاڭا ءتۇرىن سىناقتان ءساتتى وتكىزدىك», دەپ ءمالىمدەپتى وسى جونىندە. ءمينيستردىڭ سوزىنە قاراعاندا, بالليستيكالىق زىمىراندا اۋە قورعانىسى كۇشتەرىنەن اۋىتقي الاتىن جۇيە بار. جاڭا زىمىرانداردىڭ ۇشۋ قاشىقتىعى ايتىلماعان. يراننىڭ ەڭ الىسقا ۇشاتىن زىمىرانى «Shahab-3/3B» دەپ اتالادى. ونىڭ ۇشۋ قاشىقتىعى 2,5 مىڭ شاقىرىمدى قۇرايدى. بۇل يزرايل اۋماعىنا ەركىن جەتەدى.
شىلىم شەگۋ شەكتەلەدى
بريتانيا پارلامەنتى اۆتوموبيلدە بالالار وتىرعان كەزدە شىلىم شەگۋگە تىيىم سالاتىن زاڭ جوباسىن قابىلدادى. بۇل قۇجات انگليا مەن ۋەلسكە عانا قاتىستى.
باستاماعا قاۋىمدار پالاتاسىنىڭ 676 مۇشەسى قولداۋ بىلدىرگەن, 107 ادام قارسى بولعان. زاڭ جوباسى جونىندە ەلدىڭ پرەمەر-ءمينيسترى دەۆيد كەمەرون ءسوز سويلەگەن. بىراق ول داۋىس بەرۋگە قاتىسپاپتى. بۇعان دەيىن وسى قۇجات جوباسىنا دارىگەرلەر مەن كوپتەگەن بالالار قۇقىعىن قورعاۋشىلار قولداۋ ءبىلدىرىپ كەلگەن ەكەن. اتاپ وتەيىك, اۆتوموبيلدە كامەلەت جاسىنا تولماعاندار وتىرعان شاقتا شىلىم شەگۋگە اقش پەن اۆستراليانىڭ بىرقاتار شتاتتارىندا, سونداي-اق, كانادانىڭ بىرنەشە ايماعىندا تىيىم سالىنعان.
«قۇپيا» كەزدەسۋدىڭ استارىندا نە جاتىر؟
تۇرمەدە جازاسىن وتەپ جاتقان ۋكراينانىڭ ەكس-پرەمەرى يۋليا تيموشەنكو مەن ۋكراينا پرەزيدەنتى اكىمشىلىگىنىڭ باسشىسى اندرەي كليۋەۆ كەزدەسكەن كورىنەدى. بۇل جونىندە «كوممەرسانت-ۋكراينا» باسىلىمى حابارلادى.
بىراق, اتالعان اقپارات تۋرالى تيموشەنكو جەتەكشىلىك ەتەتىن «باتكيۆششينا» پارتياسى قانداي دا ءبىر تۇسىنىك بەرگەن جوق. ۋكراينالىق ساياساتتانۋشى ۆاديم كاراسەۆتىڭ ايتۋىنشا, وسىنداي ۆاريانت داعدارىستان شىعۋعا ىقپالىن تيگىزەر ەدى. بۇل قادامعا وپپوزيتسيا وكىلدەرى بارا ما, وسى جاعى بەلگىسىز. ماسەلەنىڭ نەگىزى پارلامەنتتەگى ايماقتار پارتياسى مەن «باتكيۆششينا» پارتياسىنىڭ كۇش بىرىكتىرۋىندە جاتىر. سوندا عانا ەلدى ساياسي داعدارىستان شىعارۋعا بولادى.
اتاتۇرىك ەسىمىن قويۋعا تىيىم سالدى
ازەربايجاندا بالالارىنا اتاتۇرىك ەسىمىن قويۋعا رۇقسات ەتپەيتىن بولدى. ۇكىمەت جانىنداعى تەرمينولوگيالىق كوميسسيا باسشىسىنىڭ ورىنباسارى سايالى سادىگوۆانىڭ ايتۋىنشا, مۇنداي تىيىم سالۋ رەسمي ەمەس سيپاتتا عانا.
«ەگەر كىم دە كىم وسىنداي وتىنىشپەن كەلەتىن بولسا, ءبىز ولاردان باس تارتامىز» دەپتى ول. ونىڭ سوزىنە قاراعاندا, مۇنداي شەشىم تۇركيا ۇكىمەتىنىڭ ءوتىنىشى بويىنشا قابىلدانعان. وتكەن جىلدىڭ مامىرىندا سادىگوۆا جەرگىلىكتى تۇرعىندارعا ءوز بالالارىنا تۇركيانىڭ تۇڭعىش پرەزيدەنتىنىڭ قۇرمەتىنە ونىڭ اتىن قويۋعا تىيىم سالىنۋى مۇمكىن ەكەنىن مالىمدەگەن كورىنەدى. «اتاتۇرىك – تاريحي تۇلعا, بۇل ەسىم ونىڭ وزىنە عانا ءتان بولۋى ءتيىس» دەپ ايتىپتى ول سوندا. ال قازىرگى كەزدە ازەربايجاندا اتاتۇرىك ەسىمىمەن 18 ادام ءومىر ءسۇرىپ ءجۇر.
الپىس ءتورت جىلعى ۇزىلىستەن سوڭ...
قىتاي مەن تايۆان ۇكىمەتى 1949 جىلى اياقتالعان ازامات سوعىسىنان بەرى العاش رەت كەلىسسوزدەر باستادى. اقپارات اگەنتتىكتەرىنىڭ حابارلاۋىنشا, وعان ەكى تاراپتان ساياسي قاتىناستارعا جاۋاپتى شەنەۋنىكتەر قاتىسقان سياقتى.
تايۆان كەلىسسوزدەر بارىسىندا قىتاي باسپاسوزىندە ءسوز ەركىندىگىنە كەپىلدىك بەرۋدى تالاپ ەتۋدى جوسپارلاپ وتىرعان بولسا, ال رەسمي بەيجىڭ ەركىن ساۋدا تۋرالى كەلىسىمدى بەكىتۋدى العا تارتپاق. كەزدەسۋ نانكين قالاسىندا وتۋدە. سوڭعى جىلدارى قىتاي مەن تايۆان اراسىنداعى قاتىناس ايتارلىقتاي ىلگەرى باسقانىن اتاپ وتكەن ءجون.
يەمەن ەندى فەدەراتيۆتى مەملەكەت اتانادى
يەمەن پرەزيدەنتى جانىنداعى ارنايى كوميسسيا مەملەكەتتىك قۇرىلىستى وزگەرتۋ جونىندەگى جۇمىس ناتيجەسىن جاريا ەتتى. ماماندار ەلدى ۋنيتارلىقتان فەدەراتيۆتى دەپ اتاۋ تۋرالى قورىتىندىعا كەلىپ وتىر.
ەندى يەمەن ىشكى ساياساتتا اۋقىمدى وكىلەتتىككە يەلىك ەتەتىن التى ايماققا ءبولىنەتىن بولادى. شەشىم ەل پرەزيدەنتى ابدۋ راببو مانسۋر ءحاديدىڭ قاتىسۋىمەن وتكەن كوميسسيانىڭ وتىرىسىندا قابىلدانعان. وسى وتىرىسقا, سونداي-اق, ساياسي پارتيالاردىڭ, ەلدەگى ىقپالدى تايپالاردىڭ دا وكىلدەرى قاتىسقان.
قىسقا قايىرىپ ايتقاندا:
اريزونا شتاتىنىڭ سوتى مەكسيكا ازاماتى مانۋەل وسوريونى 30 جىل تۇرمەگە وتىرعىزۋ جازاسىنا كەستى. ول امەريكالىق شەكاراشى براين تەرريدى اتىپ ولتىرگەن بولاتىن.
قىتاي پوليتسياسى گۋاندۋن پروۆينتسياسىنىڭ وڭتۇستىگىندەگى دۋنگۋان قالاسىنداعى «بوردەلدەردە» جاپپاي ءتىنتۋ جۇرگىزدى. وپەراتسياعا 6700-دەن استام پوليتسەي قاتىسقان. ناتيجەسىندە 67 ادام ۇستالىپ, 17 مەكەمە جابىلعان.
يراكتىڭ ساماررا قالاسىندا تەررورشىلاردىڭ قۇپيا جەراستى باسپاناسىندا جارىلىس بولىپ, 21 سودىر قازا تاپتى. وقيعا سودىرلار ناسيحاتتىق فيلم ءتۇسىرىپ جاتقاندا, كەزدەيسوق بولسا كەرەك.
وزبەكستاننىڭ نوۆوي قالاسىنداعى تۇرعىن ۇيلەردىڭ بىرىندە گاز شىعۋى سالدارىنان جارىلىس بولدى. التى پاتەر ءب ۇلىنىپ, وقيعا ورنىندا التى ادام قازا تاپقان.
ينتەرنەت ماتەريالدارى نەگىزىندە ازىرلەندى.