سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 2021 جىلعى 14 قازاندا وتەتىن سەنات وتىرىسىنىڭ كۇن ءتارتىبىن بەكىتتى, دەپ جازادى Egemen.kz.
سوعان سايكەس الداعى پالاتا وتىرىسىندا سەناتورلار «كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا بيولوگيالىق ارتۇرلىلىكتى ساقتاۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قارايدى.
بۇل حاتتامانى راتيفيكاتسيالاۋ بيولوگيالىق رەسۋرستاردى تۇراقتى پايدالانۋعا, مەملەكەتتەردىڭ كاسپي تەڭىزىنىڭ تەڭىز ورتاسىن قورعاۋدىڭ جەدەل جانە ءتيىمدى شارالارىن ىسكە اسىرۋ بويىنشا كوپجاقتى ىنتىماقتاستىعىنا ىقپال ەتۋگە جانە وسى باعىتتاعى ۇلتتىق زاڭنامالاردى جەتىلدىرۋگە مۇمكىندىك بەرەدى.
سونىمەن قاتار بيۋرو وتىرىسىندا بۇعان دەيىن ماجىلىستەن كەلىپ تۇسكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات جانە ءدىني قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى جۇمىس ءۇشىن الەۋمەتتىك-مادەني دامۋ جانە عىلىم كوميتەتىنە بەرىلدى.