ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وسىنداعى «كاۋسار» مادەني-تانىمدىق بىرلەستىگى ۇيىمداستىرعان «ءومىر-ولەڭ» اتتى پوەزيا كەشى ءوتتى. ونىڭ مەيمانى حالىقارالىق «الاش» سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, اقىن سەرىك تۇرعىنبەك ۇلى بولدى.
اقىن كەشىن ادەتتەگىدەي پروفەسسور كەنجەعالي مىرجىقباەۆ جۇرگىزدى.
ۋنيۆەرسيتەتتىڭ اكت زالىنداعى الدىڭعى ەكى-ءۇش قاتارعا قازاقتىڭ مارقاسقا ۇلدارى جايعاسىپتى. مىرزاتاي جولداسبەكوۆ, سەيىت قاسقاباسوۆ, قويشىعارا سالعارين, جانداربەك مالىبەكوۆ, سايلاۋ باتىرشا ۇلى سىندى اعالار باستاعان ەلورداداعى زيالى قاۋىم وكىلدەرىنىڭ ۇلكەن شوعىرىنىڭ كەشكە ارنايى كورەرمەن رەتىندە قاتىسۋىنىڭ ءوزى جاستارعا ۇلگى بولارلىقتاي. ونىڭ ۇستىنە جينالعان ستۋدەنتتەر كوپشىلىگىنىڭ قولدارىنا قالام ۇستايتىن بولاشاق جۋرناليستەر ەكەنىن ەسكەرسەك, حالىققا ونەرىڭمەن, ولەڭىڭمەن, قالامىڭمەن قىزمەت ەتۋدىڭ قانشالىقتى قۇرمەتكە بولەيتىنىن جاستارعا دا ۇقتىرا تۇسكەندەي. كەش ءتالىمىنىڭ ءبىرى وسى ما دەرسىڭ.
اقىن اعا ولەڭدەرىن ەرەكشە شابىتتانا وقىپ, قويىلعان ساۋالداردىڭ بارلىعىنا وزىنە ءتان شىنايىلىعىمەن جاۋاپ بەرىپ, زالدان تۇسكەن رەپليكالار مەن جۇرگىزۋشى ەسكە تۇسىرگەن كەي وقيعالارعا راحاتتانا ك ۇلىپ, ساحنا مەن كورەرمەن زالى ورتاسىندا تاماشا كوپىر ورناتتى. سودان دا بولار, زالدان تۇسكەن ساۋالدار دا سان ءتۇرلى تاقىرىپتى قامتىدى. بىردە ماحاببات, بىردە جاستار تىنىسى, بىردە مۋزەي, ەندى بىردە پوەزيا مەن ازاماتتىق تۋراسىندا قويىلعان ساۋالدارعا جاۋاپ بەرگەن اقىن: «بىزدەر, شىعارماشىلىق ادامدار, اقىن-جازۋشىلار كەڭەس وكىمەتى تۇسىندا جامان ءومىر سۇرگەن جوقپىز. ءبىر كىتابىڭنىڭ قالاماقىسىنا ءبىر ماشينا الاتىنداي, كۇنى-ءتۇنى مەيرامحانا, كۇندە باسقوسۋلار, ويىن-كۇلكى, جاعاڭ جايلاۋدا, كوڭىل كولدەي جاعدايدا جۇردىك. بىراق, بىردە-ءبىر اقىن-جازۋشى, قالامگەر كەڭەس وكىمەتىن اڭسامايدى, باقىتتى عۇمىر كەشتىك دەپ ەسەپتەمەيدى. ويتكەنى, ەلىڭ تاۋەلدى, حالقىڭ قاپاستا, كوڭىلىڭدە كىرەۋكە, مۇڭ جاتتى. لەنين مەن ءستاليندى, پارتيانى عانا ماقتايسىڭ, ال ۇلتىڭنىڭ تاعدىرىن, ءتىلىڭنىڭ تۇنشىققانىن, ەلىڭنىڭ زارىن ايتا المايسىڭ. تاۋەلسىزدىكتەن اسقان باقىت جوق. تاۋەلسىزدىككە قىزمەت ەتىپ, ونىڭ قيىندىعىنىڭ ءدامىن تاتقان ءتىپتى جاقسى. ونى كورگەن اقىن شامىرقانادى, جاندۇنيەسى شىمىرلايدى, بىردە قۋانادى, بىردە رەنجيدى, بىراق وسىنىڭ بارلىعىنىڭ بيىك مۇرات جولىنداعى, حالىق زارىنىڭ وتەۋىنە كەلگەن اسىل ارماننىڭ ورىندالۋى ەكەنىن ءبىلىپ, جازا تۇسەدى. سەندەر وتە باقىتتى جاندارسىڭدار. تاۋەلسىزدىك زاماندا دۇنيەگە كەلدىڭدەر, ەشكىمنىڭ بودانى بولعان جوقسىڭدار, ازات ۇرپاقسىڭدار, اينالايىندار», دەدى جاستارعا ارناعان سوزىندە. ستۋدەنتتەردىڭ پوەزيادا كىمدى ۇستاز تۇتتىڭىز, دەگەن ساۋالىنا اقىن: «ماعان جازۋشىلار وداعىنا مۇشەلىككە وتەردە ۇسىنىم جازعان, العاشقى ولەڭدەر جيناعىما العىسوز جازعان مۇقاعاليدى قالاي ۇمىتايىن. مۇقاعالي مەنى دراماعا دا الىپ كەلدى, كەشەگى كۇنى قاللەكي اتىنداعى اكادەميالىق تەاتردا اقيىق اقىنعا ارناعان درامامنىڭ 200-ءشى قويىلىمى بولدى. ال ەندى حالىقتىڭ تاعى ءبىر ارداقتىسى ءشامشىنىڭ دە قاسىندا كوپ ءجۇردىم. ءاندەرىنە ءسوز جازدىم, ءشامشى مەنى انگە الىپ كەلدى», دەپ جاۋاپ قايتارا كەلىپ, جاقسى ءبىر وي ايتقان. مۇقاعالي ماعجاندى ءپىر تۇتاتىن, ونىڭ ولەڭدەرىن قورىقپاي جاتقا ايتىپ, كەيبىر ماعجان سارىنداس ءوز ولەڭدەرىن دە ماعجاندىكى دەپ وقي بەرەتىن. قازاقتا قۇداي بەرگەن شوقتىقتى اقىندار بارشىلىق, بىراق, ومىردەن وتكەن سول اسىلداردى ەسكە ءتۇسىرىپ, جىر كەشتەرىن وتكىزگەندە ونى تۋعان جەرلەرىمەن شەكتەمەي, قايتا ماعجاندى ءوڭتۇستىكتە, قاسىمدى شىعىستا, مۇقاعاليدى باتىستا ۇلىقتاپ, ولارعا دەگەن قۇرمەتتىڭ قاناتىن جايا ءتۇسۋىمىز كەرەك», دەدى.
كاۋساردىڭ تازا بۇلاعىنان قانىپ ءىشىپ, جىرعا توعايىپ, ايتىلعان انگە ماسايىپ, كوڭىلدىڭ توزاڭىن ازىلمەن قاعىپ, جانىن جادىراتقان جۇرتتىڭ الدىنا كەش سوڭىندا اشىربەك سىعاي, عادىلبەك شالاحمەتوۆ, سايلاۋ باتىرشا ۇلى سىندى اعالارىمەن ۋنيۆەرسيتەت رەكتورى ەرلان سىدىقوۆ شىققان. رەكتور «اڭقىلداعان اقكويلەك اقىنعا» ۋنيۆەرسيتەت اتىنان سىي-سياپات جاساپ, مۇنداي كەشتەردىڭ جاستارعا بەرەر تاعىلىمىنا توقتالسا, اشىربەك سىعاي: «سەرىك شىن مانىندە اقىن, مىنەزىمەن, تۇرپاتىمەن, بولمىسىمەن, ءجۇرىس-تۇرىسىمەن, ءتىپتى, بەت-الپەتىمەن اقىن. ەسەپتىڭ ەمەس, ناعىز شابىتتىڭ اقىنى. ادەبيەتتى بۇلدىرەتىن ارامشوپتەر. سول ارامشوپتەردەن ساقتانۋ ءۇشىن سەرىكتەردىڭ دەنساۋلىعىن تىلەۋىمىز كەرەك. سەرىك سياقتى اقىندار شىن مانىندە بۇگىنگى كۇننىڭ قوڭىراۋى, وتكەندى ەسكە الۋشى, بولاشاقتىڭ بولجاۋشىسى, مۇنداي شايىرلار بۇگىنگى قوعامعا, ادامي ورتاعا ناعىز اللا تاعالانىڭ جىبەرگەن ەلشىسىندەي كورىنەدى. ءبىز قاتار ءوسىپ كەلە جاتىرمىز. وسى الدىڭعى قاتاردا وتىرعان ازاماتتاردىڭ قاي-قايسىسى دا سەرىكتى جاقسى كورەدى, بۇگىنگى كەشكە سەرىكتى سىنايىن دەپ ەمەس, سەرىكتىڭ جىرىنا قۇلايىن دەپ كەلدى, ايىزىمىز قانايىن دەپ كەلدى», دەپ تامساندىرا سويلەگەن.
جىر كەشىندە ىنىلىك ىزەتپەن اقىن باقىتجان توباياقوۆ پەن قارلىعاش قاناتتى قاۋىرسىن جىرىن, اقىن اعاعا دەگەن ارناۋ ولەڭىن ستۋدەنت كامشات جۇباتحانوۆا وقىدى.
انار تولەۋحانقىزى,
«ەگەمەن قازاقستان».
–––––––––––––––––
سۋرەتتەردى تۇسىرگەن ەرلان وماروۆ.