زاماننىڭ ءبىر ورنىندا تۇرمايتىنى سياقتى, سول زاماننىڭ ىرعاعىنا باعىنعان ەكونوميكا دا بىرقالىپتى بولمايدى. كەشە عانا 1 اقش دوللارىنىڭ تەڭگەگە شاققانداعى باعامى ايىرباس پۋنكتتەرىندە 156, 3 تەڭگەنىڭ كولەمىندە بولسا, مىنە, بۇگىن ول كۇتپەگەن جەردەن 185 تەڭگەگە كوتەرىلدى.
ەلىمىز تاۋەلسىزدىك العالى بەرى مۇنداي قارجىلىق «سىلكىنىستەردىڭ» تالايىن باستان كەشتىك. توقسانىنشى جىلداردىڭ باسىندا رۋبل, ياعني سول كەزدەگى سومىمىز گيپەرينفلياتسياعا ۇشىراپ, حالىق كۇندەلىكتى تۇتىناتىن زاتتارىن الۋ ءۇشىن دۇكەنگە 50 مىڭ نەمەسە 100 مىڭ سوممەن بارعانىن ءالى ۇمىتا قويعان جوقپىز. ابىروي بولعاندا, ەلىمىزدىڭ ءتول تەڭگەسى قارجىلىق اينالىمعا شىققاننان كەيىن «سابان اقشادان» قۇتىلىپ, ەلدىڭ ەكونوميكاسى دا, حالىقتىڭ تۇرمىسى دا تۇزەلە باستادى.
بىراق ءتول تەڭگەمىز قانشا جەردەن تەگەۋرىندى بولعىسى كەلگەنىمەن ونىڭ اقش دوللارىنا شاققانداعى باعامى ەل ەكونوميكاسىنىڭ تاۋەلسىزدىگى جىلدارىندا بىرنەشە رەت كوتەرىلىپ ۇلگەردى. بىراق ول بۇرىنعى كەڭەس رۋبلىندەي شەكتەن شىعا قۇنسىزدانا قويعان جوق. كورشى وزبەكستانداعى اعايىنداردىڭ سومىنىڭ قاندايلىق دەڭگەيدە ەكەنىن ەستىپ, ءبىلىپ وتىرمىز عوي, ال ولارعا قاراعاندا ءبىزدىڭ تەڭگە اقش-تاي الپاۋىت ەل دوللارىنىڭ قىسىمىنا ءالى دە دەس بەرمەي كەلە جاتقان جوق پا؟!
جاسىرىپ, جاباتىن نەسى بار, قانشا دەگەنمەن, حالىقتىڭ قوبالجىپ, ابىرجيتىنىن تۇسىنەمىن. بازارلار مەن دۇكەندەردەگى ازىق-ت ۇلىكتىڭ باعاسى بىردەن اسپانداپ كەتپەسە دە, بۇرىنعىدان ەپتەپ قىمباتتاۋى مۇمكىن. جانارماي بەكەتتەرىنىڭ يەلەرى دە بەنزيننىڭ باعاسىن «شەگىرتكەشە سەكىرتەتىنى» اقيقات. ءاربىر سانالى ازامات ءوز ەلىنىڭ الەم ەكونوميكاسىنا قاراپ كوش تۇزەيتىنىن بىلەدى. قازاق ەلى دە, قازاق حالقى دا دۇنيەجۇزىندە بولىپ جاتقان ەكونوميكالىق اۋىتقۋلار مەن دۇمپۋلەردەن شەت قالا المايدى.
ءبىزدىڭ مەكەمەگە كەلسەك, ازىق-ت ۇلىك جەتكىزىپ بەرۋشىلەرمەن كەلىسىمشارت جاسالىپ قويىلعان. سوندىقتان ولار بىزگە قىمباتشىلىقتى العا تارتىپ, بۇلتاقتاي المايدى. ال حالىق كۇندەلىكتى تۇتىناتىن زاتتاردىڭ باعالارىنىڭ وسپەۋىن ۇكىمەت پەن جەرگىلىكتى بيلىك نازاردا ۇستاپ, قاتاڭ باقىلايتىن بولادى دەپ ويلايمىن. ءار كەزدە دە سولاي بولعان. بۇل جولى دا سولاي بولادى. دەمەك, «سابىر ءتۇبى سارى التىن» دەگەندەي, تالاي قيىندىقتى باستان وتكەرگەن قاجىرلى, ەرىك-جىگەرى مىقتى حالقىمىز بۇل سىن ساعاتتا دا وزىنە ءتان سابىرلىلىقتىڭ ۇلگىسىن كورسەتىپ, ارقالارىنا باتقان اۋىرتپالىقتى سالماقتىلىقپەن كوتەرە بىلەدى دەپ سەنەمىن.
جوراتاي مامىراليەۆ,
№1 قارتتار مەن مۇگەدەكتەرگە
ارنالعان ينتەرنات ءۇيىنىڭ ديرەكتورى.
جامبىل وبلىسى.