كەشە كەشكە قاراي پرەمەر-مينيستر سەرىك احمەتوۆ ۇكىمەت مۇشەلەرىن شۇعىل جيناپ, تەڭگەنىڭ باعامى وزگەرۋىنە قاتىستى قولعا الىناتىن ءىس-شارالار جايىن تالقىلادى. تەز شاقىرىلعان جيىنعا بۇكىل مينيسترلەرمەن قاتار, بارلىق وبلىس اكىمدەرى جانە الماتىدان ۇلتتىق بانك توراعاسى قايرات كەلىمبەتوۆ ونلاين رەجىمدە قاتىستى.
«ۇلتتىق بانك بۇگىننەن باستاپ جاڭا ايىرباس باعامىن جاريالادى. بۇل ماسەلە حالىقتىڭ جاعدايىنا كەرى اسەرىن تيگىزبەس ءۇشىن تەز ارادا ءتيىستى شارالار قابىلدايمىز. ەڭ الدىمەن, ەلىمىزدە باعانىڭ نەگىزسىز وسۋىنە جول بەرمەۋ كەرەك. بۇل, اسىرەسە, كۇندەلىكتى تاۋارلاردىڭ باعاسىنا قاتىستى بولىپ وتىر. ءبىز مىنە, وسى ماسەلەنى جان-جاقتى تالداپ, ءتيىستى شەشىمدەر قابىلدايتىن بولامىز», دەپ باستاعان س.احمەتوۆ بۇل ماسەلە كۇندەلىكتى قاجەتتى تاۋارلاردىڭ باعاسىنا ايرىقشا قاتىستى ەكەنىن قاداپ ايتتى. سونىمەن قاتار, ول ۇكىمەتتىڭ ەكونوميكالىق بلوگى مەن ۇلتتىق بانك قالىپتاسقان جاعدايدى شۇعىل باعالاپ, ەكونوميكانىڭ جوسپارلانعان ءوسىمىنىڭ كولەمىن قامتاماسىز ەتۋ تۇرعىسىندا ۇسىنىستار ەنگىزۋدى تاپسىردى. ودان ءارى ءسوز كەزەگىن ۇلتتىق بانك توراعاسى ق.كەلىمبەتوۆكە بەردى.
ۇلتتىق بانك باسشىسى ۆاليۋتا ايىرباستاۋ باعامىنىڭ جاڭا دەڭگەيى 1 اقش دوللارىنا 185 تەڭگە بولىپ ەسەپتەلگەنىن ەسكە سالا وتىرىپ, ونىڭ سەبەپ-سالدارىن تاعى ءبىر ءتۇسىندىرىپ ءوتتى. وسىعان وراي الداعى ۋاقىتتا حالىق ونىڭ جاعىمسىز اسەرىن سەزىنبەس ءۇشىن ۇلتتىق بانك تاراپىنان قولعا الىنىپ جاتقان شارالارمەن ءبولىستى.
بۇدان ءارى مينيسترلەر, ماسەلەن, ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ, اۋىل شارۋاشىلىعى ءمينيسترى اسىلجان مامىتبەكوۆ, ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, مۇناي جانە گاز ءمينيسترى ۇزاقباي قارابالين ءسوز سويلەپ, ورىن العان جاعدايعا بايلانىستى تۋىنداعان ماسەلەلەردى تالقىلادى.
مۇنىمەن قوسا, بىرنەشە وبلىس اكىمدەرى مەن الماتى قالاسى اكىمى ءوز وڭىرلەرىندەگى قازىرگى جاعدايدى باياندادى.
ءبىراز تالقىلاعان سوڭ, ۇكىمەت باسشىسى وتىرىستى قورىتىندىلاپ, ءتيىستى ورگاندارعا ارنايى تاپسىرمالار جۇكتەدى. حالىق اراسىندا دۇربەلەڭ مەن كۇندەلىكتى قاجەتتى تاۋارلاردىڭ باعا وسىمىنە جول بەرمەۋ ءۇشىن بارلىق شارالاردى قابىلداۋ قاجەتتىگىن باسا ايتقان س.احمەتوۆ ۇلتتىق ۆاليۋتامىزدىڭ جاڭا باعامىنا بايلانىستى ەلىمىزدىڭ الەۋمەتتىك-ەكونوميكالىق دامۋ بولجامىن قايتا ەسەپتەۋدى تاپسىردى.
«اكىمدەر حالىق اراسىندا ءتۇسىندىرۋ جۇمىستارىن جۇرگىزۋى قاجەت. سونىمەن بىرگە, جەدەل جۇمىس توبىن قۇرۋ جانە باعا وسىمىنە جول بەرمەۋ شارالارىن قابىلداۋ قاجەت. بۇل رەتتە تۇراقتاندىرۋ قورلارىنىڭ رەسۋرستارىن تارتۋ, ساۋدا نۇكتەلەرىن تاۋارمەن قامتاماسىز ەتىپ, ولاردىڭ جۇمىستارىن ەرەكشە باقىلاۋعا الۋ كەرەك», دەدى ول.
ۇكىمەت باسشىسى ساۋدا ۇيىمدارىمەن جانە جۇمىس توبىمەن بىرلەسىپ, دۇكەندەر مەن ساۋدا ورتالىقتارىنداعى باعانىڭ نەگىزسىز ءوسۋىن تەكسەرۋدى قاتاڭ تاپسىردى. «ياعني, باعانىڭ نەگىزسىز قايتا قارالۋى جەرگىلىكتى اتقارۋشى ورگاندارمەن باقىلانۋى ءتيىس», دەدى پرەمەر-مينيستر.
س.احمەتوۆ كۇندەلىكتى ازىق-ت ۇلىك باعاسىمەن قوسا, بەنزين باعاسىنا دا باسا نازار اۋداردى. سەبەبى, ازىق-ت ۇلىك باعاسى كوبىنە تاسىمالعا قاتىستى بەنزين باعاسىمەن تىعىز بايلانىستى ەكەنى راس. وسىعان وراي ۇكىمەت باسشىسى مۇناي جانە گاز مينيسترلىگىنە تابيعي مونوپوليالاردى رەتتەۋ اگەنتتىگىمەن بىرلەسىپ, قور تاۋسىلعانشا اي-92 بەنزينىنە باعانى وسىرمەۋ ءۇشىن بارلىق شارالاردى قابىلداۋدى تاپسىردى. بۇل تۇرعىدا س.احمەتوۆ جانار-جاعارماي قۇيۋ ستانسالارىندا باعا نەگىزسىز كوتەرىلگەن جاعدايدا ولار ءتيىستى جاۋاپكەرشىلىككە تارتىلاتىنىن اتاپ ءوتتى.
وتىرىس بارىسىندا ءوڭىر اكىمدەرى كەيبىر ۆاليۋتا ايىرباستاۋ پۋنكتتەرىندە تەڭگەنىڭ اقش دوللارىنا شاققانداعى باعامىنىڭ شەكتى دەڭگەيى جوعارى ەكەنىن ايتقان بولاتىن. وسىعان بايلانىستى س.احمەتوۆ جەر-جەردەگى ۆاليۋتا ايىرباستاۋ پۋنكتتەرىن قاتاڭ قاداعالاۋعا الۋدى تاپسىردى.
«بۇل ماسەلە بارلىق اكىمدەرگە قاتىستى, ياعني وڭىرلەردە ۇلتتىق بانكتىڭ فيليالدارىمەن بىرلەسە جەدەل جۇمىس توپتارىن قۇرۋ كەرەك. ءبىر-ەكى كۇندە بۇل جاعداي ءبىر ىزگە تۇسەدى. الايدا, ۇلتتىق بانكتىڭ قاۋلىسى ورىندالۋى ءۇشىن ۆاليۋتا ايىرباستاۋ پۋنكتتەرىندە بولىپ جاتقان ۇدەرىستەرگە شۇعىل ارەكەت ەتۋى تۇرعىسىندا وسىنداي جەدەل جۇمىس توپتارى قاجەت», دەدى ۇكىمەت باسشىسى. وسى ورايدا س.احمەتوۆ, ەڭ باستىسى, ۆاليۋتا ايىرباستاۋ پۋنكتتەرى حالىقتى دۇرلىكتىرمەۋى ءتيىس ەكەنىن قاداپ ايتتى.
«ۇلتتىق بانكتىڭ شەشىمى شىعارىلدى, ۆاليۋتا بار, ايىرباستاۋ پۋنكتتەرى تۇراقتى جۇمىس ىستەپ تۇر. ءبىزدىڭ ماقسات –اتقارۋ جۇمىستارىن جەرگىلىكتى جەرلەرگە دەيىن جەتكىزۋ. سوندىقتان اكىمدەر وسى ماسەلەلەردى ۇلتتىق بانك فيليالدارىنىڭ باسشىلارىمەن وڭىرلەردە ەرەكشە باقىلاۋعا الۋى كەرەك», دەپ تۇيىندەدى ءسوزىن پرەمەر-مينيستر.
دينارا بىتىكوۆا,
«ەگەمەن قازاقستان».
_____________________
قازاقستان قور بيرجاسى
حابارلايدى (KASE):
قازاقستان قور بيرجاسىندا (KASE): ەسەپتەسۋى ت+1 تەڭگەمەن اقش دوللارى بويىنشا (USDKZT_TOM), ەسەپتەسۋى ت+1 تەڭگەمەن ەۋرو بويىنشا (EURKZT_TOM), ەسەپتەسۋى ت+1 اقش دوللارىمەن ەۋرو بويىنشا (EURUSD_TOM), ەسەپتەسۋى ت+2 تەڭگەمەن اقش دوللارى بويىنشا (USDKZT_SPT),ەسەپتەسۋى ت+2 تەڭگەمەن ەۋرو بويىنشا (EURKZT_SPT), ەسەپتەسۋى ت+2 ەۋرومەن اقش دوللارى بويىنشا (EURUSD_SPT) كەشكى ساۋدا-ساتتىق سەسسياسى اياقتالدى.
ساۋدا-ساتتىققا KASE ۆاليۋتا نارىعىنىڭ 14 مۇشەسى قاتىستى.
ەسەپتەسۋى ت+1 تەڭگەمەن اقش دوللارىنىڭ باعامى ءبىر اقش دوللارىنا 184,49 تەڭگەنى قۇرادى, ساۋدا-ساتتىق كولەمى – 68 ميلليون 900 مىڭ اقش دوللارى.
ەسەپتەسۋى ت+2 تەڭگەمەن اقش دوللارى بويىنشا مامىلەلەر جاسالعان جوق.
سەسسيا جابىلۋ ساتىنە باعا بەلگىلەۋلەر تىركەلگەن جوق.
ەسەپتەسۋى T+1 تەڭگەمەن جانە اقش دوللارىمەن ەۋرو بويىنشا مامىلەلەر جاسالعان جوق. سەسسيا جابىلۋ ساتىنە باعا بەلگىلەۋلەر تىركەلگەن جوق.
ەسەپتەسۋى ت+2 تەڭگەمەن جانە اقش دوللارىمەن ەۋرو بويىنشا مامىلەلەر جاسالعان جوق. سەسسيا جابىلۋ ساتىنە باعا بەلگىلەۋلەر تىركەلگەن جوق.