ەلباسى نۇرسۇلتان نازارباەۆ ءوزىنىڭ بيىلعى جولداۋىندا: «جاھاندىق رەيتينگكە سايكەس, قازاقستان بيزنەستى جۇرگىزۋگە ەڭ قولايلى جاعدايى بار ەلدەر توبىنا كىرەدى جانە ءبىز بۇل ءۇردىستى ورىستەتە تۇسۋگە ءتيىسپىز. شاعىن جانە ورتا بيزنەس – بىزدەگى جالپىعا ورتاق ەڭبەك قوعامىنىڭ بەرىك ەكونوميكالىق نەگىزى», دەپ اتاپ كورسەتتى. بۇل ۇنەمى العا ۇمتىلىپ وتىرعان قوعامىمىزدىڭ باستى ۇستانىمى سانالادى. سوندىقتان دا, 2050 جىلعا قاراي شاعىن جانە ورتا بيزنەس وكىلدەرىنىڭ ىشكى جالپى ءونىمدى مولايتۋعا قوسار ۇلەسى 50 پايىزدى قۇرايتىنى شەك كەلتىرمەيتىن شىندىققا اينالاتىنى انىق. وسى ورايداعى ناقتى قادامداردى كوركەم بۋرابايداعى تۋريزم يندۋسترياسىنىڭ جاندانۋىنان دا كورۋگە بولادى. بۇگىنگى كۇنى مۇندا مەملەكەت باسشىسىنىڭ ۋاقىت وزەگىندەگى تاپسىرمالارى ويداعىداي ورىندالىپ جاتىر. تسيفرلار تىلىمەن سويلەسەك, تۋريزم سالاسىنداعى بيزنەس وكىلدەرىنىڭ ۇلەسى 99 پايىزدى قۇرايدى. سونداي-اق, تۋريزم, ەلباسى ايتقانداي, وتباسىلىق بيزنەستى وركەندەتۋگە قولايلى مۇمكىندىك اشىپ وتىر. قازىر سالالىق بيزنەستىڭ تورتتەن ءبىرىن قۇرايتىن ولاردىڭ قىزمەتى جۇرتشىلىققا جاقسى تانىس. باسەكەلىك ورتانىڭ كەڭەيۋى ساپا مەن باعا ساياساتىنا وڭ ىقپال ەتەتىنى دە بەلگىلى. تۋريزم يندۋسترياسى مەن ساۋىقتىرۋ سالاسىندا مەديتسينالىق ءتۋريزمدى دامىتۋعا ايرىقشا كوڭىل بولىنەتىنى قۋانتادى. بۇل ورايدا, اقمولا وبلىسىنىڭ مول مۇمكىندىگىن ءتيىمدى پايدالانۋدا دەۋىمىزگە بولادى. جاۋھار تابيعاتىمەن كوز تارتاتىن, ساف اۋاسىمەن, مينەرالدى سۋ قاينارلارىمەن, ەمدىك سازبالشىقتارىمەن ەرەكشەلەنەتىن ولكەنىڭ ەلۋدەن استام دەمالىس ۇيلەرى مەن ساناتوريلەرى ەمدىك-ساۋىقتىرۋ قىزمەتىن كورسەتەدى. مەملەكەت بۇل تۇرعىدا كەڭ اۋقىمدى قولداۋ كورسەتىپ وتىرعانى جۇرتشىلىققا ايان. ەلباسىنىڭ تاپسىرماسىمەن رەسپۋبليكامىزداعى تۇڭعىش التى جولاقتى اۆتوبان بۋرابايعا تارتىلدى. كوكشەتاۋدا حالىقارالىق دارەجەدەگى اۋەجاي پايدالانۋعا بەرىلدى. جەلدەن جۇيرىك ەكسپرەسس-پويىز جۇيتكىپ تۇر. بۋراباي ارنايى ەكونوميكالىق ايماعى قۇرىلدى. «بالداۋرەن» اتتى قازاقستاندىق ارتەك شەتەلدىك بالالاردىڭ دا دۋماندى ورداسىنا اينالدى. سولاردىڭ قاتارىندا الەم نازارىنا ىلىگىپ, ولكە تارتىمدىلىعىن كۇشەيتكەن «Rixos Burabay» بەس جۇلدىزدى وتەلى مەن ونىڭ ىرگەسىندە ورنالاسقان «قازاقستان لاپلاندياسىن» ەرەكشە ماقتانىشپەن اتاۋعا بولادى. سوڭعى ءۇش ايدا عانا ءبىزدىڭ لاپلانديامىزدى 15 مىڭعا جۋىق تۋريست تاماشالاپ, قىزمەتتىڭ وزىق ۇلگىسىنە ريزاشىلىقتارىن ءبىلدىردى.
باقبەرگەن امالبەك,
«ەگەمەن قازاقستان».
اقمولا وبلىسى.