«شوق شايناپ, وت بۇرىككەن قاسىمدايىن» دەپ تەبىرەنگەن جىر ءدۇلد ۇلى مۇقاعالي ماقاتاەۆتىڭ تۋعان كۇنى ەلورداداعى قازاقستان-رەسەي ۋنيۆەرسيتەتىندە اتالىپ ءوتتى. وعان ۇيىتقى بولعان وسى ءبىلىم ورداسىنداعى «ابايتانۋ» ورتالىعى ەدى. كەشكە «اباي نۇرى» ونەرلى جاستار كلۋبى دا ءوز ۇلەستەرىن قوستى.
«جىرسىز مەنىڭ ومىرگە نە كەرەگىم, جىردان باسقا جۇرتىما نە بەرەمىن» دەپ جىرىمەن حالقىن قاناتتاندىرىپ كەلە جاتقان اقيىق اقىننىڭ ولەڭدەرىنە جازعان ت.راقيموۆ, ا.ەسمۇحانوۆ, ە.تىلەپبەرديەۆ, ك.جالعاسوۆ اندەرىن بەلگىلى ونەر شەبەرلەرى ە.قاسىموۆ, م.شايكەنوۆ, ن.ارزاماسوۆ ناقىشىنا كەلتىرىپ ورىندادى. «داۋىسى اسقاق, ءۇنى كەڭ» دەپ اقىن ب.توباياقوۆ ولەڭ ارنادى.
«ابايتانۋ» ورتالىعىنىڭ ديرەكتورى ا.مۇحامەتقاليقىزى مۇقاعاليدىڭ «وسى مەن ءسىرا دا, ولمەيتىن شىعارمىن, ءسال عانا مىزعىپ اپ, قايتادان تۇرارمىن» دەگەن ەكى جول ولەڭىن ەسكە ءتۇسىرىپ, ابايدىڭ رۋحاني ءىزباسارلارىن اركەز جاستارعا جەتكىزىپ وتىرۋدى ماقسات ەتكەنىن ەسكە سالدى. ال قازاقستان-رەسەي ۋنيۆەرسيتەتىنىڭ رەكتورى, ۇعا كوررەسپوندەنت-مۇشەسى مارات مولداحمەتوۆ ەكى ەلدىڭ اراسىنداعى رۋحاني ساباقتاستىقتى جالعاستىرۋ نيەتىندە جوعارىداعىداي ورتالىقتىڭ جۇمىس ىستەپ جاتقانىن, سونىمەن بىرگە, ول ستۋدەنتتەرگە ءوز تالانتتارىمىزدى تانىتۋ ىسىنە دە ۇلەس قوسىپ وتىرعانىن قاسىم, مۇقاعالي, قادىر, تۇمانباي سەكىلدى قازاق پوەزياسىنىڭ جارىق جۇلدىزدارىنىڭ ەكىنشى ءومىرىن جاڭعىرتۋ ءۇردىسى قالىپتاسا باستاعانىن تىلگە تيەك ەتتى.
شىنىندا, ۇلتىمىزدىڭ ماقتانىشىنا اينالعان الىپتارىن اركەز وسىلاي ەسكە ءتۇسىرىپ وتىرساق, ۇتىلماسىمىز انىق. ءتىپتى رۋحانياتتىڭ ايتۋلى تۇلعالارىن تۋعان كۇنىندە, نە مەرەيتويىندا ەلەۋ ءۇردىسىن, ءار جىل سايىن پوەزيا كەشتەرىن ءجيى وتكىزۋ ۇلگىسىمەن جالعاستىرساق ۇتىلماس ەدىك. بۇل جاس ۇرپاقتىڭ جاقسىلارىن تانىپ-بىلۋىنە مۇمكىندىك بەرەر ەدى. ىرگەلەس جاتقان رەسەي ەلى مۇنداي ءداستۇردى ۇزبەي جالعاستىرىپ كەلەدى. سونىڭ ءبىر مىسالى, از عۇمىرىندا از مۇرا قالدىرسا دا كوپتەي كورىپ نيكولاي رۋبتسوۆقا ارنالعان جىل سايىنعى پوەزيا ماۋسىمى سونىڭ دالەلى دەپ بىلەمىز. وسىنداي ۇلگى ورنىقسا, كوزى تىرىسىندە «... ءسىرا دا, ولمەيتىن شىعارمىن!» دەپ كەتكەن مۇقاعالي ءسوزى اقيقاتقا اينالا بەرمەك.
سۇلەيمەن مامەت,
«ەگەمەن قازاقستان».