ەلىمىزدە مەديتسينالىق بۇيىمداردى زەرتحانالىق جانە تەحنيكالىق سىناقتان وتكىزۋگە ارنالعان ورتالىق قۇرىلادى. ول ءۇشىن 18,3 ملرد تەڭگە جۇمسالماق, دەپ حابارلايدى Egemen.kz.
بۇل تۋرالى دەنساۋلىق ساقتاۋ ءمينيسترى الەكسەي تسوي قر پرەزيدەنتى جانىنداعى ادام قۇقىقتارى جونىندەگى كوميسسيانىڭ وتىرىسىندا ايتتى.
«مەديتسينالىق كومەكتى قولجەتىمدى ءارى ساپالى ەتۋ ءۇشىن دەنساۋلىق ساقتاۋ جۇيەسىنىڭ ينفراقۇرىلىمىن دامىتۋعا, مامان دايارلاۋعا جانە حالىقتى دارىلىك زاتتارمەن قامتاماسىز ەتۋگە قارجى ءبولۋ بويىنشا قوسىمشا شارالار قابىلداندى. اۋىلداردا مەديتسينالىق كومەكتىڭ ۇلەسى ارتتىرۋ ءۇشىن 137 تىرەك ەلدى مەكەندە فەلدشەرلىك-اكۋشەرلىك مەديتسينالىق پۋنكتتەر مەن دارىگەرلىك امبۋلاتوريالار اشۋ كوزدەلگەن», دەدى مينيستر.
ونىڭ ايتۋىنشا, ينۆەستيتسيالىق جوبا اياسىندا ەلىمىزدە 20 زاماناۋي اۋرۋحانا مەن 2 عىلىمي-يننوۆاتسيالىق ورتالىق سالىنىپ جاتىر.
«سونىمەن قاتار وڭىرلىك مەديتسينالىق ۇيىمداردىڭ ينفراقۇرىلىمىن دامىتۋ ءۇشىن 85 ملرد تەڭگەگە كەم دەگەندە 20 نىسان سالۋ جانە جاڭعىرتۋ كوزدەلگەن. حالىقتى دارىلىك زاتتارمەن جانە مەديتسينالىق بۇيىمدارمەن قامتاماسىز ەتۋ ءۇشىن اعىمداعى جىلى 386,5 ملرد تەڭگە كولەمىندە قاراجات ءبولىندى. پرەزيدەنت وتاندىق فارماتسەۆتيكالىق ءونىم ۇلەسىن 17%-دان 50%-عا دەيىن جەتكىزۋدى تاپسىردى. سونىڭ اياسىندا مينيسترلىك جاھاندىق فارماتسەۆتيكالىق كورپوراتسيالارمەن ىنتىماقتاتى جانداندىرىپ, ينۆەستور تارتۋدا, تەحنولوگيالار مەن جاڭا ازىرلەمەلەردىڭ ترانسفەرتىن ىسكە اسىرا باستادىق», دەدى الەكسەي تسوي.
سونداي-اق ول مەديتسينالىق بۇيىمداردى سىناقتان وتكىزەتىن ارنايى ورتالىق قۇرىلاتىنىن اتادى.
«حالىقارالىق ستاندارتتار بويىنشا اككرەديتتەلگەن مەديتسينالىق بۇيىمدارعا زەرتحانالىق جانە تەحنيكالىق سىناقتار جۇرگىزۋگە ارنالعان ورتالىق قۇرۋ مىندەتى تۇر. اتالعان ءىس-شاراعا 18,3 ملرد تەڭگە سوماسىندا قارجىلاندىرۋ قاراستىرىلعان», دەدى الەكسەي تسوي.