بيىلعى 29 قىركۇيەك پەن 3 قازان ارالىعىندا ىشكى ىستەر ءمينسترىنىڭ ورىنباسارى – ۇلتتىق ۇلان باس قولباسشىسى, گەنەرال-لەيتەنانت رۋسلان جاقسىلىقوۆ باستاعان قازاقستان رەسپۋبليكاسى ۇلتتىق ۇلان باس قولباسشىلىعىنىڭ دەلەگاتسياسى وزبەكستان رەسپۋبليكاسىندا ىسساپارمەن بولدى.
اتالعان ءىسساپار وزبەكستاندىق تاراپتىڭ شاقىرۋىمەن قىزمەتتىك-جاۋىنگەرلىك ارەكەت بويىنشا تاجىريبە الماسۋ جانە ءار ءتۇرلى سالادا ەكىجاقتى ىنتىماقتاستىقتى ارتتىرۋ ماقساتىندا ۇيىمداستىرىلدى.
قازاقستاندىقتار الدىمەن وزبەكستان ۇلتتىق ۇلانىنىڭ ورتالىق اپپاراتىندا بولىپ, قولباسشى گەنەرال-مايور رۋستام دجۋراەۆپەن كەزدەستى. جۇزدەسۋ بارىسىندا بىرقاتار قۇجاتتار بويىنشا كەلىسسوزدەر وتكىزىلىپ, قۇجاتتارعا قول قويىلدى.
تاراپتار اڭگىمە-دۇكەن بارىسىندا نەگىزگى ماسەلەلەردى ءسوز ەتتى. اتاپ ايتقاندا, ماڭىزدى مەملەكەتتىك نىساندار مەن جۇكتەردى كۇزەتۋ, ەكى ەلدىڭ ارنايى ماقساتتاعى بولىمشەلەرىنىڭ بىرىككەن ارنايى-تاكتيكالىق جاتتىعۋلارىن, سونداي-اق قازاقستان ۇلتتىق ۇلانى اسكەري ينستيتۋتىمەن ءبىلىم بەرۋ باعدارلاماسىن ىسكە اسىرۋ بويىنشا تاجىريبە الماسۋ ماسەلەلەرى اڭگىمە ارقاۋى بولدى.
ساپار اياسىندا قازاقستان رەسپۋبليكاسى ۇلتتىق ۇلان دەلەگاتسياسى قوعامدىق قاۋىپسىزدىك ۋنيۆەرسيتەتىندە, ارنايى وقۋ ورنىندا, تاشكەنت قالاسىنىڭ كۇزەتۋ بولىمىندە, كاۆالەريالىق ەسكادروندا جانە تاعى باسقا نىسانداردا بولىپ, قىزمەتتىك-جاۋىنگەرلىك ارەكەتتىڭ ءارتۇرلى ماسەلەلەرى بويىنشا وزبەكستان ۇلتتىق ۇلانىنىڭ تاجىريبەسىمەن تانىستى.
دەلەگاتسيا باسشىسى گەنەرال-لەيتەنانت رۋسلان جاقسىلىقوۆ ىقپالداستىق جوسپارىنا قول قويۋ كەزىندە ەكىجاقتى ىنتىماقتاستىقتى دامىتۋ, نىعايتۋ جانە قوعامدىق قاۋىپسىزدىك ماسەلەلەرى بويىنشا ءوزارا ارەكەتتەسۋ ءارى قاراي جالعاساتىنىنا سەنىم ءبىلدىردى.
تاراپتار, سونداي-اق قازاقستان ۇلتتىق ۇلانى وكىلدەرى كينولوگتارىنىڭ جەكە-كوماندالىق جارىستارىنا, باقىلاۋشى رەتىندە كۇرەڭ بەرەت كۆاليفيكاتسيالىق سىناقتارىنا قاتىسۋعا, سونىمەن قاتار تاۋلى جانە ارنايى-تاكتيكالىق دايىندىق بويىنشا قازاقستان جانە وزبەكستان ۇلتتىق ۇلاندارىنىڭ ارنايى ماقساتتاعى جاۋىنگەرلەرى اراسىندا تاجىريبەلىك سەمينار-جينالىسىن وتكىزۋ تۋرالى كەلىسىمگە قول جەتكىزدى.
بۇدان بولەك, وزبەكستان ۇلتتىق ۇلانىنىڭ باسشىلىعى قازاقستان پوليتسياسىنىڭ 30 جىلدىعىنا ارنالعان اسكەري-ۇرمەلى وركەسترلەر اراسىنداعى حالىقارالىق اسكەري-مۋزىكالىق «اسكەري كەرنەي – 2022» فەستيۆالىنە جانە قازاقستان ىشكى ىستەر ءمينسترىنىڭ كۋبوگىنە ارنالعان جەكپە-جەك ۇرىس بويىنشا حالىقارالىق تۋرنيرگە قاتىسۋعا ىنتا تانىتتى.