زارينا دياس ينديان-ۋەللس ءتۋرنيرىنىڭ ىرىكتەۋ سايىسىن ءساتتى باستادى

دۇنيەجۇزىلىك رەيتينگتە 108-ورىندا تۇرعان ز.دياس باستاپقى كەزدەسۋىن الەمنىڭ 170-راكەتكاسى, جاپونيالىق كۋرۋمي نارامەن وتكىزدى.

قازاقستاندىق تەننيسشى 1 ساعات 17 مينۋتقا سوزىلعان ماتچتا 6:4, 6:3 ەسەبىمەن جەڭىسكە جەتتى. باسەكە بارىسىندا زارينا 2 ەيس جاساپ, 11 برەيك-پوينتتىڭ التاۋىن پايدالاندى. قارسىلاسى 8 برەيك-پوينتتىڭ تەڭ جارتىسىن ءوز ەسەبىنە جازدى. ز.دياس ىرىكتەۋ سايىستارىنىڭ فينالىندا رەيتينگتە 138-ساتىداعى بەلارۋس وكىلى ولگا گوۆورتسوۆامەن شەبەرلىك بايقاسادى.

ونى جەڭسە, نەگىزگى تۋرنيرگە جولداما الادى. ەرتەڭ ينديان-ۋەللستە نەگىزگى جارىس تا باستالادى. قازاقستاننىڭ ءبىرىنشى, الەمنىڭ 16-شى, وسى دودانىڭ 13-راكەتكاسى ەلەنا رىباكينا دودانى ەكىنشى اينالىمنان باستايدى. تاعى ءبىر قازاقستاندىق, الەمنىڭ 43-راكەتكاسى يۋليا پۋتينتسەۆا رەيتينگتە 74-ورىنداعى گەرمانيالىق اندرەا پەتكوۆيچپەن وينايدى. ونى ۇتسا, ەكىنشى اينالىمدا ە.رىباكينا مەن يۋ.پۋتينتسەۆانىڭ جولدارى تۇيىسەدى.

ءىرى تۋرنير 17 قازاندا مارەگە جەتەدى. وتكەن جىلى مۇندا كانادالىق بيانكا اندرەەسكۋ توپ جارعان بولاتىن. ول فينالدا گەرمانيالىق انجەليكا كەربەردى 6:4, 3:6, 6:4 ەسەبىمەن تىزە بۇكتىرگەن ەدى.