«مۇقاعالي» كوركەم ءفيلمى كينوتەاترلارعا شىعادى

ءفيلمنىڭ رەجيسسەرى – تانىمال قازاقستاندىق رەجيسسەر بولات قالىمبەتوۆ. كارتينانى مادەنيەت جانە سپورت مينيسترلىگىنىڭ تاپسىرىسىمەن شاكەن ايمانوۆ اتىنداعى «قازاقفيلم» اق ءتۇسىردى.

ءتۇسىرىلىم جۇمىستارى وسكەمەن قالاسىندا باستالىپ, سانكت-پەتەربۋرگ, الماتى جانە الماتى وبلىستارىندا جالعاستى. رەجيسسەردىڭ ايتۋىنشا, كارتينا اقىن ءومىرىنىڭ سوڭعى جىلدارى تۋرالى باياندايدى.

ء«بىز فيلمدە مۇقاعالي ماقاتاەۆتىڭ ەسەيگەن كەزىمەن, قازاق كسر جازۋشىلار وداعىنىڭ اقىننىڭ تاعدىرىن وتىرىستا شەشكەن ۋاقىتىمەن تانىسامىز», دەدى ءفيلمنىڭ رەجيسسەرى بولات قالىمبەتوۆ.  

تۋىندى ستسەناريىنىڭ اۆتورلارى – جۇسىپبەك قورعاسبەك, بولات قالىمبەتوۆ, عازيز ناسىروۆ. قويۋشى وپەراتورى – ەدىگە نەسىپبەكوۆ, ال قويۋشى سۋرەتشى – ەرمەك وتەگەنوۆ. كومپوزيتورى – نيكيتا كارەۆ, پروديۋسەرى – المات ماساليم.