ەلوردادا اۋىل شارۋاشىلىعىنىڭ كەزەكتى جارمەڭكەسى وسى دەمالىس كۇندەرى, 2-3 قازاندا وتەدى. بۇل جولى قاراعاندى وبلىسىنىڭ اۋىل شارۋاشىلىعى تاۋارلارىن وندىرۋشىلەرى ءوز ونىمدەرىن ۇسىنادى, سونداي-اق نۇر-سۇلتان قالاسى كاسىپكەرلەرىنىڭ تاۋارلارىن ساتىپ الۋعا بولادى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
جارمەڭكە ءداستۇرلى تۇردە «حان شاتىر» سوو الاڭىندا وتەدى (د. قوناەۆ كوشەسى جانە تۇران داڭعىلىنىڭ قيىلىسى). قاراعاندى وبلىسىنىڭ 9 اۋدانى مەن 4 قالاسىنىڭ 126 فەرمەرلىك شارۋاشىلىعى مەن قايتا وڭدەۋ كاسىپورىندارى ءوز ونىمدەرىن ۇسىنادى. بارلىعى 600 توننادان استام ءونىمدى ساتۋ جوسپارلانىپ وتىر.
سورەلەردە ازىق-ت ۇلىك ونىمدەرىنىڭ 117 اتاۋى ۇسىنىلادى, ونىڭ ىشىندە: - ەتتىڭ بارلىق ءتۇرى - 150,1 توننا, - بالىق - 4,3 توننا, - جۇمىرتقا - 200 مىڭ دانا, - ءسۇت ونىمدەرى - 20 توننا, - كارتوپ جانە كوكونىستەر - 495 توننا - شۇجىق, كونديتەرلىك, نان-توقاش ونىمدەرى - 11,4 توننا.
جارمەڭكە نۇر-سۇلتان قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ۇسىنعان سانيتارلىق نورمالاردى ساقتاي وتىرىپ وتكىزىلەدى. ەستەرىڭىزگە سالا كەتەيىك, ەلوردادا بيىل الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن تۇراقتاندىرۋ ماقساتىندا ءارى كوكونىستەر مەن جەمىستەردىڭ ءپىسۋ مەرزىمىن ەسكەرە وتىرىپ, 14 جارمەڭكە وتكىزۋ جوسپارلانعان.
نۇر-سۇلتاندا وڭىرلىك اۋىلشارۋاشىلىق جارمەڭكەلەر ماۋسىمى 31 قازانعا دەيىن جالعاسادى. 21 تامىزدان باستاپ ەلورداداعى جارمەڭكەلەردە تۇركىستان, باتىس قازاقستان, شىعىس قازاقستان, قىزىلوردا, الماتى, اتىراۋ, جامبىل جانە اقتوبە وبلىستارىنىڭ اۋىلشارۋاشىلىق تاۋار وندىرۋشىلەرى ءوز ونىمدەرىن ۇسىندى.