تەننيستەن نۇر-سۇلتاندا ءوتىپ جاتقان WTA 250 Astana Open ءتۋرنيرىنىڭ العاشقى كۇنى ارتتا قالدى. دۇيسەنبىدە جەرلەستەرىمىزدەن جالعىز جىبەك قۇلامباەۆا عانا كورتقا شىققان ەدى. وكىنىشكە قاراي, تۇساۋكەسەر كەزدەسۋىندە ول جەڭىلىستىڭ كەرمەك ءدامىن تاتتى.
جىبەك اتالعان جارىسقا قاتىسىپ جاتقان ەڭ مىقتى ويىنشىلارىنىڭ ءبىرى ەليسون ۆان ەيتۆانكپەن شەبەرلىك بايقاستى. 27 جاستاعى بەلگيانىڭ وكىلى بۇل كۇندەرى الەمدىك رەيتينگتە 89-ورىندا تۇر. كەزىندە ول رولان گارروستىڭ شيرەك فينالىنا شىعىپ, ۋيمبلدوننىڭ ءتورتىنشى كەزەڭىنە دەيىن جەتكەن. WTA تۋرنيرلەرىن ءتورت رەت ۇتتى. وسى كورسەتكىشتەرىنىڭ ارقاسىندا ۇزدىكتەر تىزىمىندە 37-ورىنعا دەيىن كوتەرىلدى. ءيا, 21 جاستاعى قازاق قىزىندا ونداي ەلەۋلى تابىستاردىڭ ءبىرى دە جوق. ول الەمدىك رەيتينگتە 524-ساتىعا جايعاسقان. ەكەۋارا باسەكە 1 ساعات 29 مينۋتقا سوزىلىپ, 6:3, 6:4 ەسەبىمەن بەلگيالىق تەننيسشىنىڭ جەڭىسىمەن اياقتالدى.
سول كۇنى وتكەن وزگە كەزدەسۋلەردە مىناداي ناتيجەلەر تىركەلدى: اناستاسيا گاسانوۆا (رەسەي) – يۋليا گوتوۆكو (بەلارۋس) 6:1, 6:1. الەكساندرا كرۋنيچ (سەربيا) – كەيتي بۋلتەر ( ۇلىبريتانيا) 3:6, 6:3, 7:5. لەسيا سۋرەنكو (ۋكراينا) – ۆيتاليا دياچەنكو (رەسەي) 6:1, 3:1 (Rt), اننا-لەنا فريدزام (گەرمانيا) – ارينا راديونوۆا (اۋستراليا) 4:6, 6:4, 6:2. ۆارۆارا گراچەۆا (رەسەي) – كريستينا پليشكوۆا (چەحيا) 6:3, 7:6.
كەشە يۋليا پۋتينتسەۆا گرۋزيالىق ەكاتەرينا گورگودزەمەن ويناسا, اننا دانيلينا فرانتسيالىق كريستينا ملادەنوۆيچپەن سايىسقا ءتۇستى. ال زارينا دياس رەسەيلىك اناستاسيا زاحاروۆامەن شەبەرلىك بايقاستى.