تۇركى ەلىنىڭ اتاجۇرتى, قاسيەتتى قاراشاڭىراق, كيەلى تۇركىستان قالاسىندا تۇركىتىلدەس ەلدەر پارلامەنتتىك اسسامبلەياسى كەڭەسىنىڭ وتىرىسى ءوتتى. وندا قازاقستان تۇركپا-عا توراعالىق ەتۋدى ازەربايجان ەلىنەن قابىلداپ الدى, دەپ جازادى Egemen.kz قر پارلامەنتى ءماجىلىسىنىڭ ءباسپاسوز قىزمەتىنە سىلتەمە جاساپ.
ءماجىلىس سپيكەرى نۇرلان نىعماتۋلين حالىقارالىق ۇيىمعا توراعالىق ەتۋدى ەرەكشە قۇرمەتپەن قابىلداپ الىپ, بۇل ءبىزدىڭ ەل ءۇشىن ۇلكەن مارتەبە جانە زور جاۋاپكەرشىلىك ەكەنىن العا تارتتى. وسى ورايدا پالاتا سپيكەرى باۋىرلاس ءازىربايجان حالقىنا شىن جۇرەكتەن العىس ءبىلدىردى.
«تۇركى كەڭەسىنىڭ وتىرىسىندا قازاقستاننىڭ تۇڭعىش پرەزيدەنتى, ەلباسى, تۇركپا-نىڭ نەگىزىن قالاۋشى, تۇركى كەڭەسىنىڭ قۇرمەتتى توراعاسى نۇرسۇلتان نازارباەۆ وسى كەڭەستى تولىقتاي حالىقارالىق ۇيىمعا وزگەرتۋ تۋرالى باستاما كوتەرگەن بولاتىن», دەدى ءماجىلىس توراعاسى.
پالاتا سپيكەرىنىڭ ايتۋىنشا الدىمىزدا قاراشا ايىندا ىستامبۋلدا وتەتىن تۇركى كەڭەسىنىڭ كەزەكتى وتىرىسىندا مەملەكەت باسشىلارى ءتيىستى شەشىم قابىلدايدى دەپ كۇتىلۋدە. سونىمەن قاتار, ەگەر سونداي شەشىم قابىلدانسا, اسسامبلەيانىڭ اتاۋىن تۇركى مەملەكەتتەرىنىڭ پارلامەنتتىك اسسامبلەياسى دەپ وزگەرتۋدى ۇسىناتىنىنا توقتالدى.
«الداعى ءبىر جىل ىشىندە ءبىز قالىپتاسقان مۇراگەرلىكتى ساقتاي وتىرىپ, ەلدەرىمىزدىڭ اراسىنداعى بايلانىستى ودان ءارى تەرەڭدەتۋ, پارلامەنتارالىق ىنتىماقتاستىقتى نىعايتۋ, اسسامبلەيا اياسىن كەڭەيتۋ جانە حالىقارالىق بەدەلىن ارتتىرۋ جولىندا بىرلەسە ەڭبەك ەتەتىن بولامىز», دەدى نۇرلان نىعماتۋلين.
سونىمەن قاتار, ءماجىلىس توراعاسى بيىلعى جىل قازاقستان, ازەربايجان جانە قىرعىزستان ءۇشىن ەرەكشە تاريحي كەزەڭ ەكەنىن, مەملەكەتتەرىمىزدىڭ تاۋەلسىزدىگىنە 30 جىل تولاتىنىن اتاپ ءوتتى.
«بۇل ۋاقىتتىڭ ىشىندە ەلدەرىمىز كوپتەگەن قيىندىقتاردى جەڭىپ قانا قويماي, ۇلكەن تابىستارعا, ايتۋلى جەتىستىكتەرگە جەتتى. وعان ءبىزدىڭ پارلامەنتتىك اسسامبلەيانىڭ دا قوسىپ جاتقان ۇلەسى وتە زور», دەدى نۇرلان نىعماتۋلين.
ايتا كەتۋ كەرەك, ۇيىم قۇرىلعان كۇننەن باستاپ, ءوزارا ءىس-قيمىلدى كۇشەيتۋگە, مەملەكەتارالىق بايلانىستى نىعايتۋعا, ەلدەرىمىزدىڭ حالىقارالىق بەدەلىن ارتتىرۋعا, ايماقتىق قاۋىپسىزدىكتى قامتاماسىز ەتۋگە ۇلكەن ۇلەس قوسىپ كەلەدى.