بالتىق جاعالاۋىندا ءوتىپ جاتقان الەم چەمپيوناتىنىڭ جارتىلاي فينالىنا جولداما العان كوماندالار تولىقتاي انىقتالدى. بۇعان دەيىن ارگەنتين مەن برازيليانىڭ باعى جانسا, كەلەسى كۇنى يسپانيا مەن پورتۋگاليا جانە يران مەن قازاقستان ۇلتتىق قۇراما كوماندالارى اراسىنداعى شيەلەنىستى باسەكەلەردى تاماشالادىق.
يراننىڭ مىقتى قارسىلاس ەكەنىنە ەشكىمنىڭ دە كۇمانى جوق. ولار وسى كۇنگە دەيىن 15 مارتە جالاۋى جەلبىرەگەن ازيا چەمپيوناتىندا 12 رەت باس جۇلدەنى ولجالادى. تەك ءۇش جارىستا التىن تۇعىردى جاپونيا قۇراماسىنا بوساتتى. سونىمەن قاتار, يراندىقتار الەم چەمپيوناتىندا جۇلدە الۋعا كۇش-جىگەرى جەتكەن سارى قۇرلىقتاعى جالعىز كوماندا.
پارسى ەلىنىڭ وكىلدەرى 2016 جىلى كولۋمبيادا وتكەن دۇنيەجۇزىلىك دودادا قولا مەدالدى مويىندارىنا ءىلدى. تارقاتىپ ايتساق, توپتىق تۋرنيردە يسپانيادان (1:5) ۇتىلىپ, ماروككونى (5:3) ۇتتى. ازەربايجانعا (3:3) قارسى ماتچتا تەڭ ەسەپ تىركەلدى. 1/8 فينالدا داڭقتى برازيليا قۇراماسىنىڭ (4:4, پەنالتيدەن 2:3 ) ءوزىن جولىنان ىعىستىردى. شيرەك فينالدا پاراگۆايدى (4:3) قاپى قالدىرىپ, جارتىلاي فينالدا رەسەيگە (3:4) ەسە جىبەردى. ال قولا مەدال ءۇشىن سايىستا پورتۋگاليانى (2:2, پەنالتيدەن – 4:3) جەڭدى. سونداي-اق, يراندىقتاردىڭ 1992 جىلى دا جەڭىس تۇعىرىنا كوتەرىلۋگە مۇمكىندىگى بولدى. الايدا ءۇشىنشى ورىن ءۇشىن تارتىستا يسپانياعا (6:9) ەسە جىبەرىپ, ۇزدىكتەر قاتارىنا قوسىلا المادى.
ءتۇرلى بايراقتى باسەكەلەردە قازاقستان مەن يران فۋتزالشىلارىنىڭ جولدارى بىرنەشە مارتە قيىستى. ەڭ ماڭىزدى باسەكەلەرگە توقتالاتىن بولساق, 1996 جىلى يسپانياداعى الەم چەمپيوناتىنىڭ ىرىكتەۋ تۋرنيرىندە وتانداستارىمىزدىڭ تاس-تالقانىمىزدى شىعاردى – 14:2. 2000 جىلى تايلاندتا جالاۋى جەلبىرەگەن ازيا بىرىنشىلىگىنىڭ اقتىق سىنىندا تاعى دا ۇتىلدىق – 1:4. 2016 جىلى تاي ەلىندە ۇيىمداستىرىلعان حالىقارالىق تۋرنيردە قوس كوماندا تەڭ تاراستى – 3:3. 2017 جىلى ءوز جەرىندە وتكەن جارىستا الاڭ يەلەرى ءبىر دوپ ايىرماشىلىعىمەن جەڭىسكە جەتتى – 2:1. ءبىر سوزبەن ايتساق, وسى كۇنگە دەيىن ءبىزدىڭ فۋتزالشىلاردىڭ يراندىقتارعا ءالى جەتپەگەن ەكەن.
كاۋناستاعى ماتچتى يران قۇراماسى قارقىندى باستادى. 8-مينۋتتا موسلەم ولادگوباد پەن 15-مينۋتتا احماد ەسماەلپۋر نىسانانى ءدال كوزدەدى – 0:2. بۇل ەكى شابۋىلدىڭ وتە جىلدام ۇيىمداستىرىلعانى سونشالىق, قورعاۋشىلارىمىز نە بولعانىن تۇسىنبەي دە قالدى. تىپتەن, اسا ەپتى دەگەن يگيتانىڭ ءوزى قاۋىپتىڭ بەتىن قايتارا المادى. وسى ورايدا, ءبىزدىڭ كوماندانىڭ دا ەسەپتى وزگەرتۋگە جاقسى مۇمكىندىگى بولعانىن ايتا كەتكەن ءجون. بىراق قاتارىنان ەكى گول جىبەرىپ العاننان كەيىن جىگىتتەردىڭ سالى سۋعا كەتتى مە, ايتەۋىر ولاردىڭ سانسىز ارەكەتى ەش ناتيجە بەرمەدى. كەيبىر ساتتە جەرلەستەرىمىزگە دالدىك جەتپەدى, كەيبىر تۇستا يراننىڭ قاقپاشىسى اليرەزا ساميمي وتە كەرەمەت وينادى. ءبىرىنشى كەزەڭنىڭ وزىندە ول سەگىز بىردەي سەيۆ جاسادى.
ءۇزىلىس كەزىندە ريكاردو كاكا ءوز شاكىرتتەرىن قالاي جىگەرلەندىرگەنىن ءبىز بىلمەيمىز. ءبىر انىعى, ەكىنشى كەزەڭگە قازاقستاندىقتار مۇلدە باسقا كەيىپتە شىقتى. ولار ىرعالىپ-جىرعالىپ جاتپاي, قارسىلاستار قاقپاسىنا بىردەن لاپ قويدى. الىس قاشىقتىقتان دۋگلاستىڭ قاڭىراتا تەپكەن دوبى بىردە باعاناعا تيسە, ەندى بىردە ماڭدايشانى جالاپ ءوتتى. 25-مينۋتتا داۋرەن تۇرساعۇلوۆ وڭتايلى ءساتتى ءمۇلت جىبەرگەن جوق. ونىڭ تەپكەن دوبى ءساميميدىڭ قولىنا ءتيىپ, قاقپا تورىنان تابىلدى – 1:2. ەسەپ ايىرماشىلىعى قىسقارعاننان كەيىن جانكۇيەرلەردىڭ دە كەۋدەسىندە ءۇمىت وتى مازدادى. 29-مينۋتتا جەرلەستەرىمىز ايىپ دوبىن ورىندادى. ارىپتەسىنەن دوپ العان ارنولد كناۋب ەش ويلانباستان ونى قاقپاعا قاراي باعىتتادى – 2:2.
قولدا تۇرعان جەڭىستەن ايىرىلىپ قالۋ قاۋىپى تۋىنداعاننان كەيىن يراندىقتاردىڭ دا تىزگىندى قايتا قولعا الۋعا تىرىسىپ باقتى. 33-مينۋتتا ولار تارازى باسىن تەڭسەلۋگە شاق قالدى. قارسىلاستار كومانداسىنىڭ ويىنشىلارى ءدال قاقپانىڭ الدىندا تۇرىپ, ەكى بىردەي اسا قاۋىپتى سوققى جاسادى. ەكى رەتىندە دە يگيتا ءمىنسىز وينادى. كەزدەسۋدىڭ اياقتالۋىنا ەكى مينۋتتاي ۋاقىت قالعاندا تاينان كەرەمەت مۇمكىندىكتى پايدالانا المادى. ونىڭ كەشەۋىلدەتىپ تەپكەن دوبىن قاقپاشى سىرتقا قاعىپ جىبەردى. ەگەر ول كىبىرتىكتەپ قالماي ءسال جىلدامىراق قيمىلداعاندا جاعداي مۇلدە باسقاشا بولاتىن ەدى. «اتتەگەن-اي» دەگەننەن باسقا اۋزىمىزعا ءسوز تۇسپەدى. ەسەسىنە بۇرىشتامادان بەرىلگەن دوپتى جاقسى قابىلداعان تاينان وسى ويىنداعى جەڭىس گولىنىڭ اۆتورى اتاندى – 3:2.
وسىلايشا, پارسى ەلىنىڭ ورەندەرىنەن باسىم تۇسكەن قازاقستان قۇراماسى الەم چەمپيوناتىنىڭ جارتىلاي فينالىندا كۇش سىناسۋ قۇرمەتىنە يە بولدى. بۇل جاي عانا جەڭىس ەمەس, تاريحي جەڭىس! وسىنى ەستەن شىعرماعان ابزال. ونىڭ ۇستىنە, جەرلەستەرىمىز كەرەمەت كامبەك جاسادى! ەكى دوپ ايىرماشىلىعىمەن جەڭىلىپ جاتىپ, جەڭىستى قارسىلاسىنىڭ ۋىسىنان ج ۇلىپ اكەتتى. وسىلايشا, ءوز تاريحىمىزدا العاش رەت جۇلدەلى ورىندار ءۇشىن تالاسۋ مۇمكىندىگىنە يە بولدىق.
ماتچ اياقتالعان بەتتە يرانعا قارسى باسەكەنى تاماشالاعان بارشا قازاقستاندىق جانكۇيەر كاكا باستاعان كومانداعا اق العىسىن جاۋدىردى. باس باپكەردىڭ ءوزى دە اسا قيىن ساتتە جىگەرى جاسىماعان جىگىتتەردىڭ جانكەشتىلىگىنە زور ريزاشىلىعىن ءبىلدىرىپ, «ەگەر مەن قازاق بولسام, وسى كوماندانى اركەز ماقتان تۇتار ەدىم» دەپ اقجارما كوڭىلىن اقتاردى. وعان ءبىز دە قوسىلامىز. دەسەك تە ارقانى كەڭگە سالۋعا ءالى ەرتە. الدا – جارتىلاي فينال. 30-قىركۇيەكتە ازۋلى پورتۋگاليا قۇراماسىنا قارسى وينايمىز. ولار ءوز كەزەگىندە داڭقتى الىسقا جايىلعان يسپانيا فۋتزالشىلارىن قوسىمشا ۋاقىتتا 4:2 ەسەبىمەن ۇتتى.