نۇر-سۇلتاندا ەرلەر اراسىندا وتكەن تەننيسشىلەردىڭ اسا ءىرى حالىقارالىق ءتۋرنيرى اياقتالعان بەتتە ايەلدەردىڭ WTA 250 Astana Open دەپ اتالاتىن ءدۇبىرلى دوداسى باستالدى. جۇلدە قورى 235 000 اقش دوللارىن قۇراعان جارىستا الەمنىڭ بىرقاتار مەملەكەتىنەن كەلگەن تانىمال ويىنشىلار ونەر كورسەتۋدە.
ايتۋلى تۋرنير WTA Tour سەرياسىنا جاتاتىندىقتان, وعان تەك الەمدەگى «توپ-100» ويىنشىلار عانا قاتىسا الادى. ال قالعاندارى ىرىكتەۋ سىنىنان وتۋگە ءتيىس. نەگىزگى باسەكەگە جولداما الۋ ءۇشىن بىرنەشە قازاقستاندىق تەننيسشى باق سىنادى. وكىنىشكە قاراي, ولاردىڭ بىرەۋىنىڭ دە جولى بولمادى. اتاپ ايتساق, تاتيانا نيكولەنكو ناتاليا ۆيحليانتسەۆاعا, گوزال اينيتدينوۆا بەلورۋسسيالىق يۋليا گوتوۆكوعا, سوفيا چۋرسينا پولشالىق ۋرسۋلا رادۆانسكاعا, دانا بايداۋلەت ۇلىبريتانيالىق كەتي بۋلتەرگە جانە ەكاتەرينا دميتريچەنكو ۋكراينالىق ۆالەريا ستراحوۆاعا ەسە جىبەردى.
جارىستىڭ نەگىزگى بولىگىندە قازاقستاننىڭ ءتورت تەننيسشىسى كۇش سىناسۋ قۇرمەتىنە يە بولدى. كەشە يۋليا پۋتينتسەۆا گرۋزيالىق ەكاتەرينا گورگودزەمەن ويناسا, اننا دانيلينا فرانتسيالىق كريستينا ملادەنوۆيچپەن سايىسقا ءتۇستى. جىبەك كۇلامباەۆا بەلگيالىق ەليسون ۆان ەيتۆانككە قارسى شىقسا, زارينا دياس ىرىكتەۋ سىنىندا توپ جارعان ويىنشىلاردىڭ بىرىمەن شەبەرلىك بايقاسادى.
الداعى كۇندەرى Astana Open تۋرنيرىندە جوعارىدا ەسىمدەرى اتالعانداردان بولەك, چەحيالىق كريستينا پليشكوۆا, اۋستراليالىق ارينا راديونوۆا, بەلگيالىق گرەتە ميننەن, حورۆاتيالىق انا كونيۋح, بەلورۋسسيالىق ۆەرا لاپكو سىندى ەسىمى سپورتسۇيەر قاۋىمعا جاقسى تانىس ويىنشىلار كورتقا شىعادى.