قازاقستاننىڭ تۇڭعىش پرەزيدەنتى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما توراعاسى كۇلاش ءشامشيدينوۆانى قابىلدادى, دەپ حابارلادى ەلباسىنىڭ ءباسپاسوز قىزمەتى.
كەزدەسۋدە ەلباسىعا ەلىمىزدەگى زياتكەرلىك مەكتەپتەردىڭ قازىرگى جاعدايى مەن الداعى دامۋ جوسپارى تۋرالى باياندالدى.
قازاقستاننىڭ تۇڭعىش پرەزيدەنتى 2008 جىلدان بەرى رەسپۋبليكا بويىنشا جيىرمادان استام جاراتىلىستانۋ-ماتەماتيكا باعىتىنداعى نازارباەۆ زياتكەرلىك مەكتەبى اشىلىپ, الەۋمەتتىك تۇرعىدان از قامتىلعان بالالار ءۇشىن ۇلكەن دەمەۋ بولعانىن اتاپ ءوتتى. وسىعان دەيىن بۇل مەكتەپتەردى 14,5 مىڭنان استام بالا ءبىتىرىپ, ولاردىڭ ءاربىر ءتورتىنشىسى نازارباەۆ ۋنيۆەرسيتەتىنە قابىلداندى. 2021 جىلدىڭ وزىندە نازارباەۆ زياتكەرلىك مەكتەپتەرى تۇلەكتەرىنىڭ 29 پايىزى نازارباەۆ ۋنيۆەرسيتەتىنە, ال 78 بالا الەمنىڭ ەڭ وزىق ۋنيۆەرسيتەتتەرىنە ءتۇستى.
ك.ءشامشيدينوۆا PISA-2018 حالىقارالىق زەرتتەۋىنىڭ ناتيجەسى بويىنشا نازارباەۆ زياتكەرلىك مەكتەپتەرى دۇنيەجۇزىندە ماتەماتيكادان ءۇشىنشى ورىندا, جاراتىلىستانۋدان بەسىنشى ورىندا تۇرعانىن, وقۋ ساۋاتتىلىعى بويىنشا توعىزىنشى ورىندا ەكەنىن ايتتى. سونداي-اق ەلباسىعا زياتكەرلىك مەكتەپ وقۋشىلارىنىڭ حالىقارالىق وليمپيادالاردا قول جەتكىزگەن جەتىستىكتەرى تۋرالى اقپارات بەرىلدى.
سونىمەن قاتار قازاقستاننىڭ تۇڭعىش پرەزيدەنتىنە تۇركىستانداعى نازارباەۆ زياتكەرلىك مەكتەبى قۇرىلىسىنىڭ اياقتالۋ بارىسى, وقىتۋدىڭ جاڭا ادىستەمەلەرىن ەنگىزۋ جانە ەلىمىزدەگى باسقا دا وقۋ ورىندارىنا نازارباەۆ زياتكەرلىك مەكتەبى تاجىريبەسىن تاراتۋ بويىنشا قابىلدانىپ جاتقان شارالار تۋرالى باياندالدى.