فۋتزالدان لاتۆيادا ءوتىپ جاتقان الەم چەمپيوناتىندا جارتىلاي فينالعا شىققان العاشقى ەكى كوماندا بەلگىلى بولدى, دەپ حابارلايدى Egemen.kz.
كاۋناستا ارگەنتينا مەن رەسەي قۇرامالارى كۇش سىناستى. بۇل ويىننىڭ ءبىرىنشى تايمىندا ەسەپ اشىلعان جوق. تەك ۇزىلىستەن كەيىن عانا قوس كوماندا ءبىر-ءبىرىنىڭ قاقپاسىنان ساڭلاۋ تاپتى. 25-مينۋتتا لەاندرو كۋتستسولينو تەپكەن دوپ ماڭدايشاعا ءتيىپ بارىپ, نىساناعا ءدوپ ءتۇستى. ارادا 10 مينۋت وتكەننەن سوڭ رەسەيلىكتەر تارازى باسىن تەڭەستىردى. گولدىڭ اۆتورى – ارتەم انتوشكين. ەكسترا-تايمدا جەڭىمپاز انىقتالمادى. ال پەنالتي سوعۋ بارىسىندا ارگەنتينالىقتاردىڭ اسىعى الشىسىنان ءتۇستى. سوڭعى ساتتە رەسەيدىڭ تۋى استىندا ونەر كورسەتىپ جۇرگەن برازيليالىق الۆەس نوبرە رومۋلو ءمۇلت كەتتى. ەسەپ – 5:4.
كەلەسى كەزدەسۋ برازيليا مەن ماروككو اراسىندا ءوتتى. بۇل باسەكەنىڭ تاعدىرىن 11-مينۋتتا رودريگو سوققان جالعىز گول شەشتى – 1:0. ول ايىپ دوبىن قاقپاعا قاڭىراتا تەۋىپ, ءوز كومانداسىنا جەڭىس سىيلادى.