قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆتىڭ بيىلعى جولداۋى تاۋەلسىز قازاقستاننىڭ تۇراقتى دامۋىن قامتيتىن جانە مەملەكەتىمىزدىڭ بارلىق سالاسىنا تىڭ سەرپىن بەرەتىن, حالقىمىزدىڭ يگىلىگىن كوزدەيتىن ناقتى ءىس-جوسپارعا قۇرىلعان شىن مانىندەگى تاريحي قۇجات ەكەنى داۋسىز. بۇل جولداۋدىڭ تاعى ءبىر ەرەكشەلىگى – ماڭگىلىك ەل قۇرۋدى كوزدەيتىنى. ويتكەنى, بۇل ءبىزدىڭ وتاندىق ورتاق تاريحىمىزدا مۇلدە جاڭا ۇعىم. ناقتىراق ايتقاندا – ءماڭگىلىك ەل قۇرۋعا باعىتتالعان ۇزاقمەرزىمدى ستراتەگيانى ءجۇزەگە اسىرۋ جونىندە ناقتى باعدارلاما ۇسىنىلىپ وتىر. بۇلاردان بولەك قازاقستاننىڭ قازىرگى زامانعى الەمنىڭ ەڭ دامىعان 30 ەلىنىڭ قاتارىنا كىرۋدى كوزدەيتىن دامىعان مەملەكەت قۇرۋ ۇلتتىق يدەياسى دا جان-جاقتى مازمۇندالعان. ال بۇل تاريحي ءمىندەتتى ىسكە اسىرۋ نۇرسۇلتان نازارباەۆتاي پرەزيدەنتى بار قازاقستاندىقتاردىڭ قولىنان كەلەتىنىنە تيتتەي دە كۇمانىم جوق.
مەملەكەت باسشىسى الداعى 35 جىلدى 7 «بەسجىلدىققا» ءبولەدى. بۇل بەسجىلدىقتاردىڭ ءار- قايسىنىڭ جەكە-جەكە ماقسات-مۇددەلەرى بولادى. ەلباسى وسىناۋ ءار كەزەڭدى قامتيتىن ماڭىزدى مىندەتتەردى دە ناقتى اتاپ كورسەتتى. ءار كەزەڭ سايىن ەكونوميكانىڭ جاڭا بەلەستەرىن باعىندىرۋ ءاربىر بەسجىلدىقتىڭ ناقتى ناتيجەسى بولىپ تابىلادى. سونداي-اق, ەلباسىنىڭ عىلىمعا نەگىزدەلگەن ەكونوميكا قالىپتاستىرۋ تۋرالى تاپسىرماسى دا عىلىم مەن يننوۆاتسيالىق تەحنولوگيالارعا باسا نازار اۋدارۋ قاجەتتىگىن بىلدىرەدى.
ەلباسىنىڭ بيىلعى جولداۋىندا ماعان قاتتى ۇناعان تاعى ءبىر قۋانىشتى جاعداي – ءبىلىم بەرۋ سالاسى قىزمەتكەرلەرىنىڭ الەۋمەتتىك پاكەتىن قايتا قاراستىراتىنى. اتاپ ايتقاندا, سالا قىزمەتكەرلەرىنىڭ ەڭبەكاقىلارى 2015 جىلعى 1 شىلدەدەن باستاپ 29 پايىزعا دەيىن ارتتىرىلماق. ال بۇل بىزدەر ءۇشىن ۇلكەن كومەك. ىنتالاندىرۋدىڭ مۇنداي جولدارى ءبىلىم بەرۋ سالاسى قىزمەتكەرلەرىن جاڭا ءمىندەتتەردى, ياعني جولداۋدا ايتىلعان, جان-جاقتى سارالانعان «قازاقستان-2050» ستراتەگياسىن جۇزەگە اسىرۋعا تىكەلەي جۇمىلدىرماق. بۇل ەلىمىزدىڭ ءاربىر ازاماتىنىڭ ىلگەرى ۇمتىلۋىنا ۇلكەن قامقورلىق. جالپى, مەملەكەت باسشىسى ءوزىنىڭ جىل سايىنعى جولداۋلارىندا عىلىم مەن ءبىلىم سالاسىنا ايرىقشا كوڭىل ءبولىپ وتىرادى. بۇل جولعى جولداۋىندا دا سول داعدىسىنان اينىماپتى. اسىرەسە, ەلباسى جاستاردىڭ قامىن ويلايتىندىعىن تاعى دا تانىتتى. سونىڭ ىشىندە, ءماسەلەن, 2016 جىلدان باستاپ ستۋدەنتتەردىڭ شاكىرتاقىسى وسەتىندىگىن مالىمدەدى. بۇل ماسەلە جولداۋدا بىلايشا كورىنىس تاپقان: «ۇلگەرىمى جاقسى ستۋدەنتتەر مەن وقۋشىلاردى قولداۋدىڭ ءتيىمدى جۇيەسىن جاساۋ قاجەت دەپ سانايمىن. ۇكىمەتكە 2016 جىلدىڭ 1 قاڭتارىنان باستاپ ستيپەنديالار مولشەرىنىڭ 25 پايىزعا ءوسىرىلۋىن قامتاماسىز ەتۋدى تاپسىرامىن». ارينە, مۇنداي ۇستەمەدەن ءبىلىم الۋشىلاردىڭ قاي-قايسىسى دا دامەلى ەكەنى داۋسىز. ەندەشە, ولار ەندى جاقسى ۇلگەرىمگە قول جەتكىزۋ ءۇشىن تىرىسا تۇسپەك.
وسى جولعى جولداۋدا ەلباسى يدەولوگيا ماسەلەلەرىنە ەرەكشە توقتالىپ, ەكپىن بەردى. اتاپ ايتقاندا, الدا قازاقستاندىق ءپاتريوتيزمدى ارتتىرۋ باعىتىندا ناقتى شارالار قابىلدانۋى كەرەك. ويتكەنى, وسىعان ۇلكەن ءمان بەرىلىپ وتىرعانى اڭعارىلادى. اسىرەسە, ماڭگىلىك ەل يدەياسى بويىنشا جاستارمەن جۇمىس كۇشەيتىلەتىن بولادى. بۇل رەتتە, ارينە, ءبىزدىڭ پەداگوگتارىمىزدىڭ اتقاراتىن ءرولى مەن مىندەتتەرى زور. «ۇلتتىق ءبىلىم بەرۋدىڭ بارلىق بۋىنىنىڭ ساپاسىن جاقسارتۋدا ءبىزدى اۋقىمدى جۇمىس كۇتىپ تۇر», – دەدى پرەزيدەنت. وسى جولداۋدا ايتىلعان مىندەتتەردى جۇزەگە اسىرۋ بىزدەرگە دە مول جاۋاپكەرشىلىكتەر جۇكتەيدى. سوندىقتان دا اباي اتىنداعى قازاق ۇلتتىق پەداگوگيكالىق ۋنيۆەرسيتەتى ۇجىمى دا ءوز ءمۇمكىندىكتەرىن, جيناقتالعان مول ءتاجىريبەلەرىن جولداۋدا ايتىلعان مىندەتتەر مەن بەرىلگەن تاپسىرمالاردى مۇلتىكسىز ورىنداۋعا جۇمىلدىراتىنى ءسوزسىز.
بۇل جولداۋدا ءبىزدىڭ ۋنيۆەرسيتەت ءۇشىن تاعى ءبىر جاڭالىق – باسقارۋدىڭ اۆتونوميالىق تۇرىنە كوشۋ ەكەنى. ەلباسى بىلاي دەپ اتاپ كورسەتتى: «جەتەكشى ۋنيۆەرسيتەتتەردى اكادەميالىق جانە باسقارۋشىلىق اۆتونومياعا بىرتىندەپ كوشىرۋگە جوسپارلى تۇردە كىرىسۋ قاجەت». مۇنداي ءۇردىس بۇگىندە استاناداعى نازارباەۆ ۋنيۆەرسيتەتىندە عانا بار. ەندى وعان ەلىمىزدەگى ۇلتتىق مارتەبەگە يە ۋنيۆەرسيتەتتەر بىرتە-بىرتە كوشۋگە ءتيىس. اباي اتىنداعى قازاق ۇلتتىق پەداگوگيكالىق ۋنيۆەرسيتەتى دە وسى باعىتتا ءبىراز ۋاقىتتان بەرى دايىندىق جۇمىستارىن اتقارۋدا. ءبىر سوزبەن ايتقاندا, ءبىز بۇل ىسكە كىرىسۋگە تولىق ءازىرمىز دەۋگە نەگىز بار. ەگەردە ءبىز اكادەميالىق جانە باسقارۋشىلىق اۆتونومياعا كوشەتىن بولساق, مۇنىڭ تيىمدىلىگى مەن پايداسى ۋنيۆەرسيتەت ءۇشىن ايتارلىقتاي بولماقشى. اتاپ ايتقاندا, عالىمدارىمىز بەن ىزدەنگىش ستۋدەنتتەرىمىزدىڭ ءومىرشەڭ عىلىمي جوبالارىنان الىنعان تابىس كوزىن ءتيىمدى پايدالانا الساق, جوبا اۆتورلارىن ىنتالاندىرا تۇسەرى داۋسىز. باسقارۋدىڭ مۇنداي جولى ءبىلىم ورداسىنا تىڭ سەرپىن بەرەتىنىنە بەك سەنىمدىمىن. ويتكەنى, ەلباسى بار ءۇمىتىن ەرتەڭ ەلگە ەلتۇتقا بولاتىن جاستارعا ارتىپ وتىر. «اسىرەسە, جاستارىمىزعا مىنانى ايتامىن. بۇل ستراتەگيا سىزدەرگە ارنالعان. ونى جۇزەگە اسىراتىن دا, جەمىسىن كورەتىن دە سىزدەرسىزدەر», – دەپ اتاپ كورسەتتى.
ەندەشە, پرەزيدەنت ن.ءا.نازارباەۆ ءۇمىت ارتىپ وتىرعان سول جاستاردى تاربيەلەۋ, ولارعا تەرەڭ ءبىلىم بەرۋ بىزدەردىڭ, پەداگوگتاردىڭ تىكەلەي مىندەتى بولىپ تابىلادى. سونىمەن بىرگە, ەلباسىنىڭ وسىناۋ ايتقانى بىزدەرگە دە تىكەلەي قاتىسى بار دەپ ويلايمىز. دەمەك, بۇل بىزدەر ءۇشىن دە جاۋاپتى مىندەت. سوندىقتان, ەلباسى جولداۋىندا ايتىلعان مىندەتتەردى ورىنداۋعا ءبارىمىز دە ءبىر كىسىدەي اتسالىسامىز. ويتكەنى, ماڭگىلىك ەل بولۋ ءۇشىن ءبىر ماقسات, ءبىر مۇددە, ءبىر بولاشاق – ورتاق ارنادا توعىسۋى قاجەت. ال ماڭگىلىك ەل بولۋدى ءبىزدىڭ اتا-بابالارىمىز سان مىڭ جىلدار بويى اڭساپ كەلدى. ەندى سول اسىل ارمانعا جەتۋ ارقايسىمىزدىڭ ءوز قولىمىزدا. ەندەشە, بار كۇش-جىگەرىمىزدى سوعان جۇمىلدىرايىق, دەگىم كەلەدى.
سەرىك پىراليەۆ,
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى,
ۇعا كوررەسپوندەنت-مۇشەسى, پروفەسسور.