سارسەنبىدە اۆستراليانىڭ وڭتۇستىك بولىگىندەگى مەلبۋرن قالاسىنىڭ ماڭىندا 5,9 باللدىق جەر سىلكىنىسى تىركەلدى, دەپ حابارلايدى Egemen.kz CNN-گە سىلتەمە جاساپ.
ۆيكتوريا شتاتىنىڭ توتەنشە جاعدايلار جونىندەگى مەملەكەتتىك قىزمەتى ءوزىنىڭ Twitter-دەگى پاراقشاسىندا جەر سىلكىنىسىنىڭ ەپيتسەنترى ۆيكتوريا شتاتىنداعى مانسفيلد اۋىلىنىڭ جانىندا ورنالاسقانىن حابارلادى. باستاپقىدا جەر سىلكىنىسىنىڭ كۇشى 6 باللمەن باعالاندى, بىراق كەيىنىرەك ول 5,9 باللعا تومەندەدى.
اۆستراليانىڭ ەكىنشى ۇلكەن قالاسى – مەلبۋرننىڭ ورتالىق بيزنەس اۋدانىندا كەم دەگەندە ءبىر عيمارات پەن بەرىلىس جەلىلەرى زارداپ شەكتى. سوڭعى بىرنەشە جىلدا قالادا مۇنداي كولەمدەگى جەر سىلكىنىسى بولعان جوق. قازىرگى ۋاقىتتا زارداپ شەككەندەر تۋرالى اقپارات حابارلانعان جوق.
سونداي-اق جەر سىلكىنىسىنىڭ ءدۇمپۋى وڭتۇستىك اۆستراليانىڭ ادەلايدا قالاسىندا ەپيتسەنتردەن 800 كم قاشىقتىقتا, جاڭا وڭتۇستىك ۋەلستىڭ سيدنەيىندە ەپيتسەنتردەن 900 كم قاشىقتىقتا سەزىلدى دەلىنگەن. ۆيكتوريا مەملەكەتتىك توتەنشە جاعدايلار قىزمەتى تسۋنامي قاۋپىن جوققا شىعاردى.
اۆستراليا اۋماعى تەكتونيكالىق پليتانىڭ ورتاسىندا ورنالاسقان, سوندىقتان ۇلكەن جەر سىلكىنىستەرى وتە سيرەك كەزدەسەدى. Geoscience Australia مالىمەتتەرى بويىنشا, 6.6 باللدىق ەڭ ۇلكەن جەر سىلكىنىسى 1988 جىلى سولتۇستىك تەرريتوريادا تىركەلگەن.