قاڭتار ايىنىڭ اياعىندا «روسكوسموس» مۇحتار ايماحانوۆتى رەسەيلىك عارىشكەرلەر توبىنا ەنگىزۋ ماسەلەسىن قاراستىرىپ, ونىڭ كانديداتۋراسىن ماقۇلدادى. بۇل تۋرالى Azattyg.org حابارلادى.
كەزىندە قازاقستان بيۋدجەتىنەن ارنايى بولىنگەن قارجىمەن دايىندىقتان وتكەن ايماحانوۆتىڭ عارىشكەر اتانۋ ماسەلەسى ۇزاققا سوزىلىپ كەتكەن ەدى. 2012 جىلى رەسەي ازاماتتىعىن العان عارىشكەر ەندى سول ەلدىڭ اتىنان ۇشاتىن بولدى. بۇل ماسەلە قازاقستاندا ارقيلى پىكىرتالاس تۋعىزدى.قازاقستان ۇلتتىق عارىش اگەنتتىگىنىڭ توراعاسى تالعات مۇساباەۆ عارىشكەردى «مەملەكەت مۇددەسىنە قاراماي جەكە ارمانىن وزدىگىنەن ورىنداۋعا ۇمتىلدى» دەپ سوكتى.
27 قاڭتاردا «روسكوسموس» عارىش اگەنتتىگى كوميسسياارالىق وتىرىس وتكىزىپ, وندا قازاق عارىشكەرى مۇحتار ايماحانوۆتى رەسەيلىك عارىشكەرلەر توبىنا ەنگىزۋ ماسەلەسىن قاراستىرعان بولاتىن. اگەنتتىكتىڭ رەسمي سايتىندا شىققان اقپارعا قاراعاندا, كوميسسيا ونىڭ كانديداتۋراسىن ماقۇلداعان. جاقىندا «روسكوسموس» سايتىندا مۇحتار ايماحانوۆ تۋرالى بەينەسيۋجەت تە ىلەسە جاريالاندى. وندا رەسەيدىڭ عارىشكەرلەردى دايىندايتىن «جۇلدىزدى قالاشىعىندا» جۇرگەن ايماحانوۆتىڭ دايىندىق جولى تۋرالى تاپتىشتەپ باياندالادى. قازاقستاننىڭ «ءۇشىنشى عارىشكەرى» اتانۋعا ۇمىتكەر بولعان ايماحانوۆتىڭ رەسەي اتىنان ۇشاتىنى جايلى اقپارات قوعامدا ارقيلى پىكىرتالاس تۋعىزدى. ۇلتتىق عارىش اگەنتتىگىنىڭ توراعاسى تالعات مۇساباەۆ 29 قاڭتار كۇنى «قازاقپارات» اگەنتتىگىنە بەرگەن سۇحباتىندا ايماحانوۆتى دايىنداۋعا قازاقستاننىڭ قىرۋار قارجى جۇمساعانىن ايتىپ, ونى كىنالاي سويلەدى.
«مۇحتاردىڭ ءوز ارمانىن مەملەكەتتىك مۇددەدەن جوعارى قويۋىن تۇسىنە المايمىز. ول بۇل ارەكەتىمەن ءوزىنىڭ دوسى ايدىن ايىمبەتوۆتى عارىشقا اتتانۋ مۇمكىندىگىنەن ايىرىپ وتىر. ايتقانداي, ونىڭ دايىندىعى دا مۇحتاردان كەم تۇسپەيدى. بۇل جەردە ۇلكەن ۇجدان ماسەلەسى بار. ايماحانوۆ بۇل شەشىمدى اگەنتتىكپەن دە, ۇكىمەتپەن دە كەلىسپەي, ءوزى قابىلداعان. قازاقستان ونىڭ رەسەيلىك عارىشكەرلەردى دايىنداۋ ورتالىعىندا ءبىلىم الۋىن ۇيىمداستىرىپ, اقىسىن تولەگەن», – دەيدى تالعات مۇساباەۆ.
بەلگىلى بولعانداي, قازاقستان 9 جىل بويى ەكى عارىشكەردى دايىنداۋعا بيۋدجەتتەن 17 ميلليون تەڭگە جۇمساعان. ءساراپشىلاردىڭ پىكىرى «بۇل جەردە كىنانى عارىشكەردەن ەمەس, قازاقستاننىڭ عارىش سالاسىن باسقارىپ وتىرعان ادامدار مەن ولاردىڭ عارىش سالاسىنا قاتىستى جۇرگىزىپ وتىرعان ساياساتىنان ىزدەۋ كەرەك» دەگەنگە سايىپ كەلەدى. تۇڭعىش قازاق عارىشكەرى توقتار اۋباكىروۆ ايماحانوۆتىڭ دايىندىققا كەتكەن قارجىنى وزدىگىنەن اقتاۋعا ۇمتىلىسىن ايىپتاۋ قاتەلىك ەكەنىن ايتادى. «مەن ونىڭ شەشىمىن ءجۇز پايىز قولدايمىن. دۇرىس. جارادى! مەن بولسام دا سولاي ىستەر ەدىم. عارىشكەرلەردى دايىنداۋعا اقشا ءبولىندى. بىراق ول قۇمعا قۇيعان سۋداي جوق بولدى. مۇنىڭ سەبەبىن تالعات مۇساباەۆتان سۇراۋ كەرەك. ەندى مۇحتاردىڭ ءوزى سول قاراجاتتى اقتاۋدىڭ قامىن جاساپ جاتىر», – دەدى ول. توقتار اۋباكىروۆ سونداي-اق مۇحتار ايماحانوۆ عارىشقا ۇشاتىن بولسا, ونىڭ كەتكەن اقشانى ون ەسە اقتايتىنىنا سەنىم ءبىلدىردى.
قازاقستاندىق ەكى ۇشقىش - ايدىن ايىمبەتوۆ پەن مۇحتار ايماحانوۆ 2007 جىلى رەسەيدىڭ يۋري گاگارين اتىنداعى عارىشكەرلەر ورتالىعىندا ارنايى دايىندىقتان وتكەن ەدى. ەكەۋىنىڭ ءبىرى 2009 جىلعى كۇزدە حالىقارالىق ەكيپاج قۇرامىندا عارىشقا ۇشۋعا ءتيىس بولاتىن. بىراق قازاقستان جاعى قارجى تاپشىلىعىنا بايلانىستى عارىشكەر ۇشىرۋدى كەيىنگە قالدىرعان. بۇل ماسەلە استانا مەن ماسكەۋ اراسىندا بولعان ەڭ جوعارعى كەلىسسوزدەردە بىرنەشە رەت كوتەرىلسە دە, شەشىلمەگەن كۇيى قالدى. 45 جاستاعى مۇحتار ايماحانوۆ 2012 جىلى رەسەي ازاماتتىعىن العان ەدى. قازىر ول وتباسىمەن رەسەيدە تۇرىپ جاتىر. ال قازاقستاندا قالعان ايدىن ايىمبەتوۆكە 2012 جىلى عارىشكەر مارتەبەسى بەرىلدى.
2013 جىلعى قىركۇيەك ايىندا ۇلتتىق عارىش اگەنتتىگىنىڭ توراعاسى تالعات مۇساباەۆ پەكيندە قىتاي ۇلتتىق عارىش اكىمشىلىگىنىڭ باسشىسىمەن كەزدەستى. وندا ولار قىتاي ەكيپاجى قۇرامىندا قازاقستاندىق عارىشكەردى ۇشىرۋ ماسەلەسىن تالقىلاعان بولاتىن.
ايدار ورىسباەۆ.
دەرەككوز: Azattyg.org
فوتو: Newskaz.ru