اقش-تىڭ بۇرىنعى پرەزيدەنتى دونالد ترامپ Newsmax ەفيرىندەگى سۇحبات كەزىندە ءۇش جىلدان كەيىن اقش جويىلۋى مۇمكىن ەكەنىن مالىمدەدى, دەپ حابارلايدى Egemen.kz Huffington Post باسىلىمىنا سىلتەمە جاساپ.
اق ءۇيدىڭ بۇرىنعى باسشىسى ءمالىم ەتكەندەي, اقش-تىڭ قازىرگى پرەزيدەنتى دجو بايدەن بيلىگىنىڭ سوڭعى سەگىز ايىندا ەل «بۇرىن-سوڭدى بولماعانداي قۇلدىرادى».
2022 جىلدىڭ 8 قاراشاسىندا امەريكا قۇراما شتاتتارىندا وكىلدەر پالاتاسىنا سايلاۋ وتەدى. 2024 جىلدىڭ 5 قاراشاسىندا امەريكاندىقتار جاڭا پرەزيدەنت سايلاۋى كەرەك. ترامپ مەملەكەت باسشىسىنىڭ ورنى ءۇشىن قايتادان جارىسقا قاتىساتىندىعىن ناقتىلامادى, بىراق ءوز سوزىندە «اقش-تى جاقسى كورەتىندەر باقىتتى بولادى» دەپ ايتتى.
بۇعان دەيىن Politico گازەتى ترامپتىڭ 2024 جىلعى سايلاۋعا قاتىسقىسى كەلەتىنىن جازعان بولاتىن. مۇنى ونىڭ اينالاسىنداعىلار مەن رەسپۋبليكالىق پارتيانىڭ جاقتاستارى دا راستادى. ساراپشىلاردىڭ پىكىرىنشە, ەكس-پرەزيدەنت وسى ماقساتپەن مەديا كەڭىستىككە شىعۋىن كۇشەيتتى. ول ءالى تۇپكىلىكتى شەشىم قابىلداماسا دا, ونىڭ شتابى قاراجات جيناۋدى باستاپ, بايدەننىڭ سىنىمەن قوسا, ساياسي ۇگىت-ناسيحات جۇمىستارىن جۇرگىزە باستادى.
بوستونداعى ەمەرسون كوللەدجىنىڭ ساۋالناماسى قازىرگى جاعدايدا, ەگەر قايتا سايلاۋ وتكىزىلسە, بۇرىنعى مەملەكەت باسشىسى ءبىر پايىزدىق ايىرماشىلىقپەن جەڭە الاتىنىن كورسەتەدى.
ترامپ بايدەننىڭ جەڭىسىن مويىنداۋدان باس تارتىپ, «ۇرلىق» تۋرالى مالىمدەدى.
ول بايدەندى بىرنەشە رەت سىنعا الىپ, 2020 جىلعى پرەزيدەنتتىك سايلاۋدىڭ ناتيجەلەرى جالعان ەكەنىن اتاپ ءوتتى. ترامپ قارسىلاسىن «سولتۇستىك اعىن-2» گاز قۇبىرىنىڭ قۇرىلىسىنا كەدەرگى جاساماعانى ءۇشىن جانە اۋعانستاننان اسكەر شىعارعانى ءۇشىن ايىپتادى.
2020 جىلى پرەزيدەنتتىك سايلاۋدىڭ جەڭىمپازى, اقش-تىڭ 46-شى پرەزيدەنتى دجوزەف بايدەن بولدى. دونالد ترامپ داۋىس بەرۋ ناتيجەلەرىنە قارسى تۇرۋعا تىرىستى. جەڭىمپاز 7 قاراشادا انىقتالعانىنا قاراماستان, داۋىستاردى ساناۋ 8 جەلتوقساندا اياقتالدى. 14 جەلتوقساندا سايلاۋ القاسىنىڭ 538 مۇشەسى كوشباسشىنى رەسمي تۇردە بەكىتتى. اقش دەموكراتيالىق پارتياسىنىڭ كانديداتى ءۇشىن 306 سايلاۋشى, ال بۇرىنعى پرەزيدەنت ترامپ ءۇشىن 232 داۋىس بەردى.
ول مۇنى «تاريحتاعى ەڭ ۇلكەن جەڭىلىستەردىڭ ءبىرى» دەپ اتاپ, اق ءۇي باسشىسىن وتستاۆكاعا كەتۋگە شاقىردى.
امەريكا پرەزيدەنتى بايدەن دە ترامپتى ءجيى سىنعا الادى. قىركۇيەك ايىندا ءسوز سويلەۋ كەزىندە ول ترامپتى ەسكە الىپ, تۇرعان جەرىندە شوقىنا باستاعان.
«وزدەرىڭىز بىلەتىندەي, وتكەن جىلى مەن سايلاۋدا شىنايى دونالد ترامپقا قارسى كۇرەستىم», دەدى ول.