قر پارلامەنتى ءماجىلىسىنىڭ دەپۋتاتى ەرنۇر بەيسەنباەۆ پرەمەر-ءمينيسترىنىڭ ورىنباسارى ە.ل.توعجانوۆقا ستۋدەنتتەرگە ارنالعان جاتاقحانا قۇرىلىسى تۋرالى دەپۋتاتتىق ساۋال جولدادى, دەپ جازادى Egemen.kz.
ەلىمىزدە 1,1 ميلليوننان استام ستۋدەنت ءبىلىم الادى. ونىڭ تەك 16 پايىزى عانا (174 مىڭ) جاتاقحانامەن قامتاماسىز ەتىلگەن. قازىردىڭ وزىندە جاتاقحانا جەتىسپەۋشىلىگى 80 مىڭ ورىندى قۇراپ وتىر.
«بۇل ماسەلەنى ۋاقىتىندا شەشۋ ءۇشىن ەلباسى 2022 جىلدىڭ سوڭىنا دەيىن ستۋدەنتتەرگە ارناپ 75 مىڭ ورىندىق جاڭا جاتاقحانا سالۋدى تاپسىرعان.
بىراق, ايماقتارعا كەلەتىن بولساق, باستاما اركەلكى جۇزەگە اسۋدا», دەدى دەپۋتات ساۋالىندا.
اسىرەسە, cتۋدەنتتەر جاتاقحاناسىنىڭ ەڭ ۇلكەن جەتىسپەۋشىلىگى نۇر-سۇلتان جانە الماتى قالالارىنا تيەسىلى. مىسالى, الماتى قالاسىندا 170 مىڭعا جۋىق ستۋدەنت ءبىلىم السا, ونىڭ تەك 31 مىڭى عانا جاتاقحانامەن قامتىلعان. ءدال قازىردىڭ وزىندە الماتى قالاسى بويىنشا جاتاقحانا جەتىسپەۋشىلىگى 35 مىڭ ورىندى قۇراپ وتىر.
«جوعارىدا بەرىلگەن تاپسىرماعا سايكەس, الماتى قالاسىندا 2022 جىلدىڭ سوڭىنا دەيىن ۋنيۆەرسيتەتتەردە 16 مىڭ ورىندىق 38 جاتاقحانا قۇرىلىسى اياقتالۋى قاجەت.
بىراق, سوڭعى ءۇش جىلدىڭ وزىندە 1600 ورىنعا جۋىق تەك 6 ستۋدەنتتىك جاتاقحانا بوي كوتەردى. بۇل كورسەتكىش ءتيىستى مەملەكەتتىك ورگانداردىڭ جۇيەلى جۇمىسىندا ولقىلىقتاردىڭ بار ەكەندىگىن اڭعارتادى», دەدى دەپۋتات.