2021 جىلعى 1 قىركۇيەكتەگى جاعداي بويىنشا 12 501 ادام تاريحي وتانىنا ورالىپ, قانداستار مارتەبەسىن الدى. 1991 جىلدان باستاپ رەسپۋبليكاعا بارلىعى 1 ملن 82,8 مىڭ ەتنيكالىق قازاق ورالدى, دەپ حابارلايدى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
جىل باسىنان باستاپ قازاقستانعا كەلگەن قانداستاردىڭ جارتىسىنان استامى (76,0%) وزبەكستاننان, 9,8% - قحر-دان, 6,8% - تۇركىمەنستاننان, 2,5% - موڭعوليادان جانە 4,9% - باسقا ەلدەردەن كەلگەندەر بولىپ تابىلادى.
كەلگەن ەتنيكالىق قازاقتار نەگىزىنەن الماتى (28,4%), ماڭعىستاۋ (19,5%), تۇركىستان (13,8%) جانە جامبىل (8,2%) وبلىستارىندا, سونداي-اق شىمكەنت قالاسىندا (10,4%) قونىستاندى.
اعىمداعى جىلعى 1 قىركۇيەكتەگى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلاردىڭ سانى 55,2%-دى, ەڭبەككە قابىلەتتى جاستان كىشى ادامداردىڭ 27,1%-ىن جانە زەينەتكەرلەر 17,6%-دى قۇرايدى. ەڭبەككە قابىلەتتى جاستاعى قانداستاردىڭ 11%-ى ءبىلىم دەڭگەيى بويىنشا جوعارى ءبىلىمدى, 39,4%-ى - ارنايى ورتا ءبىلىمدى, 45,7%-ى - جالپى ورتا ءبىلىمدى جانە 3,9%-ى ءبىلىمى جوقتار.