اقش-تىڭ سولتۇستىك-شىعىسىنداعى «يدا» داۋىلى سالدارىنان 46 ادام كوز جۇمدى, دەپ حابارلايدى Egemen.kz CNN-گە سىلتەمە جاساپ.
داۋىلدان قاتتى زارداپ شەككەن نيۋ-يورك جانە نيۋ-دجەرسي شتاتتارىندا ونداعان ادام كوز جۇمدى. پەنسيلۆانيا شتاتىندا دا وپات بولعاندار از ەمەس. بۇعان دەيىن اقش-تىڭ سولتۇستىك-شىعىسىندا 29 ادامنىڭ كوز جۇمعانى حابارلانعان ەدى.
سارسەنبى كۇنى ءۇش شتاتتىڭ بيلىگى «يدا» داۋىلىنا بايلانىستى ءوز اۋماقتارىندا توتەنشە جاعداي رەجيمىن ەنگىزدى. بىرنەشە ساعاتتىڭ ىشىندە نيۋ-يوركتە 15-25 cم جاۋىن-شاشىن تۇسكەن. جەرگىلىكتى تۇرعىندارعا سۋ باسۋ جانە تورنادو قاۋپى تۋرالى حابارلاما تاراتىلدى. برۋكلين مەن كۆينس اۋداندارىندا جەرگىلىكتى تۇرعىندار الەۋمەتتىك جەلىلەردە كوشەلەر, ۇيلەر, مەتروپوليتەن ستانسالارىن سۋ باسقانى تۋرالى جازدى.
نوسەر جاۋىن سالدارىنان ءۇش قالالىق اۋەجاي جۇمىسى ۋاقىتشا توقتاتىلدى, ال قالادا ءوتىپ جاتقان اقش-تىڭ تەننيستەن US Open چەمپيوناتىنىڭ بىرنەشە ماتچى كەيىنگە شەگەرىلدى.