الماتى وبلىسىنداعى لا-155/4 ايەلدەر كولونياسى – ەلىمىزدەگى 3 جاسقا دەيىنگى بالالاردى اناسىمەن بىرگە ۇستاۋعا مۇمكىندىك بەرەتىن بالالار ءۇيى بار جالعىز مەكەمە. ونىڭ مەكتەپكە دەيىنگى ازاماتتىق مەكەمەلەردەن ەش ايىرماشىلىعى جوق.
تاياۋدا قىلمىستىق-اتقارۋ جۇيەسى ورگاندارىن رەفورمالاۋدى ىسكە اسىرۋ اياسىندا ىشكى ىستەر ءمينيسترىنىڭ ورىنباسارى مۇرات بايمۇقاشەۆ, ادام قۇقىقتارى جونىندەگى ۋاكىل ەلۆيرا ءازىموۆا, ورتالىق ازياداعى PRI وكىلدىگىنىڭ جەتەكشىسى جاننا نازاروۆا, «ادام قۇقىقتارى ءۇشىن حارتياسى» قوعامدىق قورىنىڭ ديرەكتورى جەمىس تۇرماعامبەتوۆا الماتى وبلىسىنداعى لا-155/4 ايەلدەر كولونياسىنا باردى.
جۇمىس ساپارى بارىسىندا سوتتالعانداردى ۇستاۋ, مەكەمە جانىندا ورنالاسقان «بالالار ۇيىندەگى» سوتتالعان ايەلدەر مەن ولاردىڭ بالالارىن مەديتسينالىق قامتاماسىز ەتۋ, سونداي-اق كولونيا اۋماعىنداعى ءوندىرىس جۇمىسى تانىستىرىلدى.
قازىرگى ۋاقىتتا «بالالار ۇيىندە» 31 بالا تاربيەلەنۋدە, ولاردىڭ 11-ءى وسى جىلى دۇنيەگە كەلگەن. مۇندا بوبەكتەر ءۇشىن جاسالعان جاعدايدىڭ مەكتەپكە دەيىنگى ازاماتتىق مەكەمەلەردەگىدەن ەش ايىرماشىلىعى جوق. سابيلەر مەن ولاردىڭ انالارى ءۇشىن مەديتسينالىق قىزمەتكەرلەردىڭ جەكە شتاتى جۇمىس ىستەيدى. بۇدان باسقا, بىرقاتار ۇكىمەتتىك ەمەس ۇيىم, ونىڭ ىشىندە ورتالىق ازياداعى PRI وكىلدىگى مەكەمەنىڭ تەحنيكالىق جانە ماتەريالدىق جابدىقتالۋىنا كومەك كورسەتىپ وتىرادى.
ادام قۇقىقتارى جونىندەگى ۋاكىلدىڭ ايتۋىنشا, سوتتالعان ايەلدەر ءۇشىن وڭ جاڭالىقتاردىڭ ءبىرى – 3 جاسقا تولعاننان كەيىن بالالاردىڭ اناسىمەن بىرگە بولۋ مەرزىمىنىڭ ۇزارتىلۋى. بۇل شارا ەۋروپا ەلدەرىنىڭ وزىق تاجىريبەسى سانالادى. وسىلايشا, بۇل انا مەن بالانىڭ ەموتسيالىق جاعدايىنا جاعىمدى اسەر ەتەدى.
ءىىم باسشىسىنىڭ ورىنباسارى مەكەمەدە قولايلى جاعداي جاساۋدا سوتتالعاندار ءۇشىن جۇمىس ورىندارىن كوبەيتۋ ماڭىزدى ءرول اتقاراتىنىن اتاپ ءوتتى.
جۇمىس ساپارىنا قاتىسۋشىلار «ەڭبەك-جاۋعاشتى» رمك فيليالىنىڭ جانە مەكەمە اۋماعىندا قىزمەت ەتەتىن جەكە كاسىپكەرلەردىڭ ءوندىرىس ورىندارىنا باردى. كولونيادا جالپى سوتتالعانداردىڭ 64%-ى جۇمىسقا ورنالاسقان. جۇمىستىڭ نەگىزگى بولىگى تىگىن وندىرىسىنە باعىتتالعان, وندا سوتتالعاندار جىلىنا ورتا ەسەپپەن 230 مىڭ ءونىم شىعارادى.
«قازىر سوتتالعاندار, ونىڭ ىشىندە ايەلدەر كولونيالارى ءۇشىن ارنايى نىساندى وزگەرتۋ تۋرالى ۇسىنىس قارالۋدا. جاڭا كيىم ءوندىرىسى مەكەمەلەر اۋماعىنداعى تىگىن تسەحتارىنا تاپسىرىلاتىن بولادى», دەدى م.بايمۇقاشەۆ.
سوتتالعانداردى ۇستاۋ جاعدايىمەن تانىسقان وكىلدەر جەكە ماسەلەلەر بويىنشا قابىلداۋ وتكىزدى. ايەلدەر قويعان سۇراقتاردىڭ باسىم بولىگى الداعى قابىلداناتىن راقىمشىلىققا, كەشىرىم جاساۋ مۇمكىندىگىنە, سونداي-اق مەكەمەدە قوسىمشا جۇمىس ورىندارىن قۇرۋعا قاتىستى بولدى.
«ۇستاۋ جاعدايلارىنا بىزدە شاعىم جوق. مۇندا بالالارىمىزعا دا قامقورلىق جاسايدى. ءبىزدىڭ اكىمشىلىك سوتتالعان ايەلدەرمەن جۇمىس ىستەۋدىڭ قىر-سىرىن تۇسىنەدى», دەيدى سوتتالعانداردىڭ ءبىرى.
قازىر مەكەمەدە ءتۇرلى قىلمىستارى ءۇشىن 500-دەن اسا ايەل جازاسىن وتەپ جاتىر. جۇمىس ساپارىنىڭ قورىتىندىسى بويىنشا م.بايمۇقاشەۆ وبلىستىق ۆەدومستۆو باسشىلىعىنا سوتتالعانداردىڭ قۇقىقتارىنىڭ جانە جازالاردى ورىنداۋ سالاسىنداعى زاڭنامانىڭ مۇلتىكسىز ساقتالۋىن باقىلاۋ باعىتىنداعى جۇمىستى جالعاستىرۋدى تاپسىردى.