وزبەكستان رەسپۋبليكاسى تاۋەلسىزدىگىنىڭ 30 جىلدىعىنا وراي قانداسىمىز, ايگىلى وپەرا ءانشىسى جەڭىسبەك پيازوۆ «وزبەكستاننىڭ حالىق ءارتىسى» اتاعىن الدى.
ول مۋسليم ماگوماەۆ اتىنداعى ەكىنشى حالىقارالىق كونكۋرستىڭ باس جۇلدەسىن يەمدەنگەن. سونداي-اق ماسكەۋدە وتكەن ورىس رومانستارىن ورىنداۋشى جاستاردىڭ حالىقارالىق ءحىىى «رومانسيادا-2009» كونكۋرسىنىڭ لاۋرەاتى جانە پولاد بيۋل-بيۋل وگلى اتىنداعى حالىقارالىق ۆوكاليستەر بايقاۋىندا ەكىنشى ورىندى قانجىعاسىنا بايلاعان. 2014 جىلى «وزبەكستاننىڭ ەڭبەك سىڭىرگەن ءارتىسى» اتاعىن العان.
سونداي-اق جەڭىسبەك پيازوۆ – لا-سكالادا ونەر كورسەتكەن تۇڭعىش ورتاازيالىق ءانشى. قانداسىمىز 33 جاسىندا وسىنداي قۇرمەتتى ماراپاتقا قول جەتكىزىپ وتىر.