تاۋەلسىزدىكتىڭ 30 جىلدىعىن مەرەكەلەۋ اياسىندا ۇلتتىق سپورت تۇرلەرىنەن رەسپۋبليكالىق « ۇلى دالا رۋحى» فەستيۆالى وتۋدە, دەپ حابارلايدى Egemen.kz.
كوكپار, تەڭگە ءىلۋ, اۋدارىسپاق, جامبى اتۋ, قازاق كۇرەسى, توعىز قۇمالاق, اسىق اتۋ سياقتى سپورت تۇرلەرى بويىنشا سايىستار كوماندالىق تارتىپپەن ۇيىمداستىرىلىپ جاتىر.
مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى, سونىمەن قاتار «ۇلتتىق جانە ات سپورتى تۇرلەرى ورتالىعى» رمقك مۇرىندىق بولعان جارىستىڭ كورىگى قىزىپ جاتقانىنا ءبىر اپتاعا جۋىقتاپ قالعانىن ايتا كەتەيىك. ەكى كەزەڭنەن تۇراتىن فەستۆال ەكى ايدان استام ۋاقىتقا سوزىلۋعا ءتيىس. العاشقى كەزەڭدەگى ايماقتىق ىرىكتەۋ جارىستارى ءتورت ايماقتا وتەدى. تەرىسكەيدەگى ءتورت وبلىستىڭ جامپوزدارى جارىسقان العاشقى كەزەڭ سايىستارى وتكەن اپتادا كوكشەتاۋ قالاسىندا ءوتتى. وسى اپتانىڭ ىشىندە وزگە وبلىستاردىڭ دا كەزەگى كەلىپ تۇر. ايماقتارداعى ىرىكتەۋ جارىستارى قازان ايىنىڭ باسىندا مارەگە جەتەدى. ەلىمىزدەگى 14 وبلىس, 3 قالا كوماندالارى اراسىنان ۇزدىك شىققاندار فەستيۆالدىڭ شەشۋشى كەزەڭىندە, ياعني فينالدا ونەر كورسەتەدى.
ۇلتتىق سپورت تۇرلەرىنەن « ۇلى دالا رۋحى» رەسپۋبليكالىق فەستيۆالىنىڭ سولتۇستىك ءوڭىرىنىڭ جەڭىمپاز كوماندالارى انىقتالعانىن جوعارىدا ايتىپ وتتىك. باتىس ايماقتىق ىرىكتەۋ جارىستارى اياسىندا 26-28 تامىزدا ورال قالاسىندا كوكپار, تەڭگە ءىلۋ, اۋدارىسپاق, جامبى اتۋدان سپورتشىلار قالالىق اتشاباردا سىڭعا تۇسسە, قازاق كۇرەسى مەن اسىق اتۋدان – جوعارى سپورتتىق شەبەرلىك مەكتەبىندە, توعىزقۇمالاقتان – وقۋشىلىر سارايىندا باسەكەلەر وتەدى. باتىس ايماق ىرىكتەۋ جارىستارىنا بقو, ماڭعىستاۋ, قىزىلوردا, اتىراۋ, اقتوبە وبلىستارىنان 225 سپورتشى قاتىسادى دەپ كۇتىلۋدە.