قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا مەملەكەتتىك بيۋدجەتكە قاتىستى ءتورت زاڭ جوباسى قارالدى, دەپ جازادى Egemen.kz.
قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا قازاقستاننىڭ 2022-2026 جىلدارعا ارنالعان الەۋمەتتىك-ەكونوميكالىق دامۋ بولجامى, «2022-2024 جىلدارعا ارنالعان رەسپۋبليكالىق بيۋدجەت تۋرالى», «قازاقستان رەسپۋبليكاسىنىڭ ۇلتتىق قورىنان 2022-2024 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوبالارى, سونداي-اق «قازاقستان رەسپۋبليكاسىنىڭ ۇلتتىق قورىنان 2022-2024 جىلدارعا ارنالعان نىسانالى ترانسفەرت ءبولۋ تۋرالى» قر پرەزيدەنتى جارلىعىنىڭ جوباسى قارالدى.
ۇلتتىق ەكونوميكا ءمينيسترى اسەت ەرعاليەۆ, ۇلتتىق بانك توراعاسى ەربولات دوساەۆ, قارجى ءمينيسترى ەرۇلان جاماۋباەۆ بايانداما جاسادى.
ۇكىمەت باسشىسى رەسپۋبليكالىق بيۋدجەتتىڭ ۇسىنىلىپ وتىرعان جوباسى, ەڭ الدىمەن, مەملەكەتتىڭ بارلىق الەۋمەتتىك مىندەتتەمەسىن تولىق ءارى ۋاقىتىلى ورىنداۋعا, سونداي-اق قازىرگى جاعدايدا ەكونوميكانىڭ ساپالى جانە تۇراقتى دامۋىن قامتاماسىز ەتۋگە باعىتتالعانىن اتاپ ءوتتى.
داعدارىسقا قارسى ماكروەكونوميكالىق ساياساتتى ىسكە اسىرۋ پاندەميانىڭ سالدارىن جۇمسارتىپ, ەكونوميكالىق ءوسۋ قارقىنىن قالپىنا كەلتىرۋ پروتسەسىن ىسكە قوسۋعا مۇمكىندىك بەردى.
2022 جىلى ەكونوميكانىڭ 3,9%-عا دەيىن ءوسۋىن قامتاماسىز ەتۋ جوسپارلانىپ وتىر. اتاۋلى ءجىو 2022 جىلى 87,1 ترلن تەڭگەدەن 2026 جىلى 119,9 ترلن تەڭگەگە دەيىن وسەدى.
جىلدىق ينفلياتسيانىڭ نىسانالى ءدالىزى 2022 جىلى 4-6%-دى قۇرايدى, كەيىننەن 2026 جىلى 3-4%-عا دەيىن تومەندەيدى.
شيكىزاتتىق ەمەس سەكتور ساپالى ءوسۋدىڭ نەگىزگى درايۆەرلەرىنىڭ بىرىنە اينالادى جانە ەكونوميكا تۇراقتىلىعىنىڭ نەگىزگى فاكتورى بولىپ قالا بەرەدى.
بيۋدجەت شىعىسىنىڭ نەگىزگى باعىتى ەكونوميكانىڭ ناقتى سەكتورىن, كاسىپكەرلىكتى, الەۋمەتتىك ينفراقۇرىلىمدى, ونىڭ ىشىندە دەنساۋلىق ساقتاۋ جانە ءبىلىم بەرۋ جۇيەلەرىن, مادەنيەت پەن سپورت سالالارىن, سونداي-اق قاۋىپسىزدىك پەن قۇقىقتىق ءتارتىپتى ساپالى جانە ورنىقتى دامىتۋدى قامتاماسىز ەتۋ بولماق.
ۇكىمەت باسشىسى اتالعان زاڭ جوبالارى مەن الەۋمەتتىك-ەكونوميكالىق دامۋ بولجامىن پارلامەنتكە ەنگىزۋدى قامتاماسىز ەتۋدى تاپسىردى.