پولشانىڭ ۆروتسلاۆ قالاسىندا ەۋروپا شاعىن فۋتبول فەدەراتسياسىنىڭ (EMF) كەزەكتى وتىرىسى ءوتتى. وعان «قازاقستان اۋەسقوي فۋتبول ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆ باستاعان قازاقستاندىق دەلەگاتسيا قاتىستى. بۇل تۋرالى egemen.kz ءتىلشىسى حابارلادى.
وتىرىسقا ەۋروپادان جالپى سانى 32 ەلدىڭ وكىلدەرى قاتىسىپ, اۋەسقوي فۋتبولشىلاردىڭ جارىستارىن دامىتۋعا ارنالعان ماسەلەلەردى تالقىلادى. سونىمەن بىرگە جيىنعا قاتىسقان فۋتبول ماماندارىنىڭ ىشىندە دۇنيەجۇزىلىك شاعىن فۋتبول فەدەراتسياسىنىڭ پرەزيدەنتى فيليپ دجۋدي باستاعان دەلاگاتسيا دا ءوز ويلارىن ايتىپ, پىكىرلەرىمەن ءبولىسىپ وتىردى. جالپى, جيىنعا قاتىسۋشىلار ەلىشىلىك تۋرنيرلەر مەن جارىستاردى, قۇرلىقتىق چەمپيوناتتى دامىتۋعا باسا نازار اۋداردى. سونىڭ ىشىندە ءبىزدىڭ ەلدىڭ وكىلدەرى 2015 جىلى اۋەسقوي فۋتبولدان ەۋروپا چەمپيوناتىن استانادا وتكىزۋ تۋرالى ۇسىنىسىن جاسادى. بۇدان باسقا كەلەسى جىلى وتەتىن قۇرلىقتىق باسەكەنى گەرمانيا, يتاليا مەن يزرايل ەلدەرى دە وتكىزۋگە ءۇمىتتى ەكەندەرىن جاسىرمادى.
جاقىندا ءبىز وسى جيىنعا قاتىسىپ, قازاقستان اتىنان كەلەسى جىلى ەۋروپا چەمپيوناتىن وتكىزۋگە ءوتىنىش بەرگەن «قازاقستان اۋەسقوي فۋتبول ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆپەن حابارلاسىپ, وتىرىستا قارالعان ماسەلەلەر تۋرالى سۇراستىرعانىمىزدا ول بىزگە بىلاي دەدى: « ءبىزدىڭ ەل 2015 جىلى استانادا اۋەسقوي فۋتبولشىلار اراسىندا ەۋروپا چەمپيوناتىن وتكىزۋگە ءوتىنىشىن بەردى. بۇل باسەكەنى ءبىز الدىمەن ەلىمىزدە فۋتبولدى دامىتۋعا, حالىق اراسىندا سالاماتتى ءومىر سالتىن ناسيحاتتاۋعا, جاستارىمىزدىڭ فۋتبول ويناپ, كوبىرەك سپورتپەن اينالىسۋى ءۇشىن جاساپ وتىرمىز». سونىمەن بىرگە ول قۇرلىقتىق دودانى جىلدان-جىلعا ساۋلەتى مەن داۋلەتى دامىپ كەلە جاتقان استانانى ەۋروپا ەلدەرىنە, بۇكىل الەمگە كورسەتۋ ءۇشىن دە وتكىزگىسى كەلەتىندەرىن ايتتى. «مۇنداي جارىس ەلىمىزدە بۇرىن-سوڭدى بولماعان. 2015 جىلى ەۋروپا چەمپيوناتىنىڭ قاي ەلدە وتەتىنى 31 ناۋرىز كۇنى بەلگىلى بولادى. ءبىزدىڭ ويىمىزشا, استانادا قۇرلىقتىق دودانى وتكىزۋگە مۇمكىندىك بار. ويتكەنى, قازاقستان ەۋروپا شاعىن فۋتبول فەدەراتسياسىنىڭ قۇرامىنا كىرگەن 2012 جىلدان بەرى اۋەسقوي فۋتبولدى دامىتۋعا بار كۇش-جىگەرىن سالىپ كەلەدى. مۇنى قازىر ءبارى مويىنداپ وتىر. سول كەزدەن باستاپ «قازاقستان اۋەسقوي فۋتبول ليگاسى» قوعامدىق بىرلەستىگىنىڭ جىل سايىن ۇيىمداستىراتىن ءتۋرنيرىنىڭ جەڭىمپازى ەۋروپا چەمپيوناتىنا قاتىسۋدا. ماسەلەن, استانالىق «سايران» كومانداسى 2012-2013 جىلدارى «قازاقستان اۋەسقوي فۋتبول ليگاسى» وتكىزەتىن ءتۋرنيردىڭ جەڭىمپازى رەتىندە ەكى جىل قاتارىنان قۇرلىقتىق چەمپيوناتقا قاتىسىپ, ويىن ورنەگىمەن جانكۇيەرلەردىڭ ىستىق ىقىلاسىنا بولەندى. ەندى بيىل «سەمەي» كومانداسى قازاقستان اتىنان ەۋروپا چەمپيوناتىنا قاتىسادى. بۇل كوماندا بىلتىر اۋەسقوي فۋتبولشىلار اراسىندا وتكەن ءتۋرنيردىڭ جەڭىمپازى اتانعان», دەدى ول.
ەرلان جارىلقاسىنوۆتىڭ ايتۋىنشا, قازىر قازاقستان ەۋروپا شاعىن فۋتبول فەدەراتسياسىنىڭ رەيتينگىندە 32 ەلدىڭ اراسىندا 9-ورىندا تۇر. وسىنىڭ ءوزى دە 2015 جىلى ەلىمىزدە قۇرلىقتىق چەمپيوناتتى وتكىزۋگە مۇمكىندىك بەرەدى, دەيدى ول.
داستان كەنجالين.
دەرەككوز: «قازاقستان اۋەسقوي فۋتبول ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆ.