ەلوردادا قازاقستان تاۋەلسىزدىگىنىڭ 30 جىلدىعىنا, ىبىراي ءالتىنساريننىڭ 180 جىلدىعىنا جانە ىبىراي التىنسارين اتىنداعى ۇلتتىق ءبىلىم اكادەمياسىنىڭ 100 جىلدىعىنا ارنالعان «نۇر-سۇلتان - قوستاناي» ۆەلومارافونى باستالدى, دەپ حابارلايدى Egemen.kz.
قازاقپارات اگەنتتىگىنىڭ مالىمەتىنشە, ۆەلومارافونعا قاتىسۋشىلاردىڭ دەنى زەينەتكەرلەر. ولار ءبىر اپتادا قوستانايعا جەتۋدى جوسپارلاپ وتىر.
ء«بىز ۆەلومارافوندى نۇر-سۇلتاندا باستاپ, قوستانايعا كەمىندە 750 شاقىرىم جول ءجۇرۋدى جوسپارلاپ وتىرمىز. بۇگىن استراحان, جاقسى, وكتيابر, اۋليەكول اۋىلدارى ارقىلى كەتەمىز. ايتا كەتۋ كەرەك, بىزدە ماتەريالدىق قىزىعۋشىلىق جوق. ماقساتىمىز - ىبىراي ءالتىنساريننىڭ تۋعان جەرىنە بارۋ, ەسكەرتكىشىن, سونداي-اق قوستانايداعى مۇراجايىن ارالاۋ. سونىمەن قاتار قالادا ونىڭ اتىنداعى مەكتەپ-گيمنازيا بار, سوعان بارعىمىز كەلەدى», دەدى ۇيىمداستىرۋشىسى جانە قاتسىۋشىسى ەرنات مەلىس ۇلى.
مارافون ۇيىمداستىرۋشىسى ەلوردادان قازاق اعارتۋشىسىنا ەسكەرتكىش قويۋدى ۇسىندى.
ء«بىز ءبارىمىز ىبىراي ءالتىنساريندى قازاقتىڭ تۇڭعىش مۇعالىمى رەتىندە بىلەمىز. ۇلى اعارتۋشىسى قازاق رۋحانياتىندا ەرەكشە ورىن الادى. ەل استاناسى نۇر-سۇلتان قالاسىندا بۇل كورنەكتى تۇلعانىڭ ەسكەرتكىشى ءالى ورناتىلماعان. كوشە بار, بىراق قىسقا, نەبارى 700 مەتر. كەلىپ گۇل قويۋعا بولاتىن ارنايى ەسكەرتكىش بولسا جاقسى بولار ەدى. بيىل تاۋەلسىزدىكتىڭ 30 جىلدىعى, قالانىڭ استانا بولعانىنا 20 جىلدان استى, وسىعان بايلانىستى ەلوردانىڭ ورتالىعىندا ىبىراي التىنسارين ەسكەرتكىشىن ورناتۋ, ادەمى جانە كەڭ كوشەگە ەسىمىن بەرۋ تۋرالى ۇسىنىس بار. ەلوردا جىل سايىن ءوسىپ كەلەدى, سايكەسىنشە جاڭا كوشەلەر پايدا بولادى. سوندىقتان جاڭا جانە كەڭ كوشە تابۋ قيىن بولمايدى دەپ ويلايمىن. بۇل ساۋاپتى ءىس بولار ەدى», دەيدى ول.
ايتا كەتەيىك, ۆەلومارافون ءىلياس ەسەنبەرلين كوشەسىندەگى 20/1 - ىبىراي التىنسارين ەسكەرتكىش ۇيىنەن باستالدى.