گرۋزيانىڭ ستراتەگيالىق تالداۋ ورتالىعىندا (GSAC) سەمەي سىناق پوليگونى جابىلۋىنىڭ 30 جىلدىعىنا ارنالعان «قازاقستاننىڭ يادرولىق قارۋسىز جاھاندىق الەمگە قوسقان ۇلەسى» تاقىرىبىندا دوڭگەلەك ۇستەل ءوتتى, دەپ جازادى Egemen.kz.
ءىس-شاراعا گرۋزين, ۋكراين ساراپشىلار قاتىستى.
ساياسي عىلىمدار دوكتورى, كاۆكاز حالىقارالىق ۋنيۆەرسيتەتىنىڭ پروفەسسورى ۆاحتانگ مايسايا قازاقستان تاۋەلسىزدىك العانعا دەيىن-اق ەلدىڭ تۇڭعىش پرەزيدەنتى نۇرسۇلتان نازارباەۆ ءوزىنىڭ جارلىعىمەن سەمەيدەگى يادرولىق قارۋدى سىناۋعا ارنالعان الەمدەگى ەڭ ءىرى پوليگوندى جاپقانىن اتاپ ءوتتى. قازاقستان ەگەمەندىك العاننان كەيىن الەمدەگى قۋاتى بويىنشا ءتورتىنشى ورىندا تۇرعان يادرولىق ارسەنالدان باس تارتىپ, الەمدىك قوعامداستىق تاراپىنان سەنىمدى نىعايتا ءبىلدى جانە ونىڭ سەنىمدى, بەلسەندى سەرىكتەسى بولدى.
ساياساتكەر, ديپلومات, قارا تەڭىز ەكونوميكالىق وداعى ۇيىمىنىڭ جانە دەموكراتيا مەن ەكونوميكالىق دامۋ ۇيىمىنىڭ بۇرىنعى باس حاتشىسى ۆالەري چەچەلاشۆيلي ءوز سوزىندە قازاقستاننىڭ حالىقارالىق قوعامداستىق ءۇشىن يادرولىق ارسەنالدان باس تارتۋىنىڭ تاريحي ماڭىزى تۋرالى ايتىپ بەردى.
ونىڭ ايتۋىنشا, قازاقستان 1990 جىلداردىڭ باسىندا ورتالىق ازياداعى ءدىني-ەكسترەميستىك توپتاردان تۋىنداعان تاۋەكەل مەن قاۋىپتى جويدى, ويتكەنى ول كەزدە ولار يادرولىق قارۋدى دا پايدالانۋعا نيەتتى ەدى. ۆ.چەچەلاشۆيليدىڭ پىكىرىنشە, قازاقستان بۇل ماسەلەدە كوشباسشى جانە الەمگە XXI عاسىرداعى حالىقارالىق قاۋىپسىزدىكتى تەك يادروسىز الەم جاعدايىندا عانا قامتاماسىز ەتۋگە بولاتىنى تۋرالى ايقىن بەلگى بەرەدى.
«قازاقستاننىڭ ۇلەسى مەن ۇلگىسى انتيادرولىق قوزعالىس پەن بۇكىل الەم ءۇشىن اسا ماڭىزدى. گرۋزيا ماگاتە مۇشەسى بولا وتىرىپ, ءوزىنىڭ بارلىق مىندەتتەمەلەرىن ورىندايدى. گرۋزيا قازاقستاننىڭ يادرولىق قارۋسىز الەم باستاماسىن وڭتۇستىك كاۆكاز بەن قارا تەڭىز وڭىرىندە ىلگەرىلەتە الار ەدى دەپ ويلايمىن», دەپ اتاپ ءوتتى ەكونوميكا عىلىمدارىنىڭ دوكتورى, پروفەسسور ليا چەليدزە.
سارپشىلار يادرولىق قاۋىپسىزدىك جانە يادرولىق قارۋدان ازات الەم ءۇشىن كوشباسشىلاردىڭ جاھاندىق اليانسىن قۇرۋ, يادرولىق قارۋسىز الەم جانە جاھاندىق قاۋىپسىزدىك ءۇشىن نازارباەۆ سىيلىعىن تاپسىرۋ قازاقستاننىڭ قارۋسىزدانۋ باستامالارىن ىسكە اسىرۋدىڭ پراكتيكالىق قادامدارى ەكەنىن اتاپ ءوتتى.
دوڭگەلەك ۇستەلگە قاتىسۋشىلار قازاقستاننىڭ جاھاندىق يادرولىق قارۋسىزدانۋ سالاسىنداعى كۇش-جىگەرىن جوعارى باعالاپ, ازاماتتاردى حالىقارالىق انتيادرولىق قوزعالىسقا كوبىرەك تارتۋدىڭ ماڭىزدىلىعىن اتاپ ءوتتى.