قازىر الاكول رەسپۋبليكا دەڭگەيىنە كەڭىنەن تانىمال شيپالى كول. ونىڭ سۋىنىڭ كوپتەگەن اۋرۋلاردىڭ الدىن الاتىن نەمەسە مۇمكىندىگىنشە ادامنىڭ جازىلۋىنا سەبەپ بولاتىن ەمدىك قاسيەتى مول. ەلدىڭ وعان كوپ كەلەتىنى دە سوندىقتان. تەك, كانادانىڭ «اتابلەسكا» دەپ اتالاتىن كولىنىڭ عانا سۋى الاكولمەن تەڭدەس ەكەن. عالىمداردىڭ زەرتتەۋى سولاي دەيدى. سۋ قۇرامىنىڭ حيميالىق, ەمدىك اسەرى كەرەمەت!
قازىر الاكول رەسپۋبليكا دەڭگەيىنە كەڭىنەن تانىمال شيپالى كول. ونىڭ سۋىنىڭ كوپتەگەن اۋرۋلاردىڭ الدىن الاتىن نەمەسە مۇمكىندىگىنشە ادامنىڭ جازىلۋىنا سەبەپ بولاتىن ەمدىك قاسيەتى مول. ەلدىڭ وعان كوپ كەلەتىنى دە سوندىقتان. تەك, كانادانىڭ «اتابلەسكا» دەپ اتالاتىن كولىنىڭ عانا سۋى الاكولمەن تەڭدەس ەكەن. عالىمداردىڭ زەرتتەۋى سولاي دەيدى. سۋ قۇرامىنىڭ حيميالىق, ەمدىك اسەرى كەرەمەت!
كەيىنگى جىلدارى الاكولدىڭ ءۇرجار اۋماعىنداعى جاعالاۋى دەمالىس ايماعى بولىپ جاريالانعان سوڭ, دەمالۋ شارالارىنا ارنالعان نىساندار بىرىنەن سوڭ ءبىرى سالىنىپ, ىسكە قوسىلا باستادى. ەل پرەزيدەنتىنىڭ دە بىرنەشە رەت كەلىپ-كەتۋى, جاعالاۋدىڭ دامۋىنا ۇلكەن سەبەپ بولدى.
الاكولگە 28 نەمەسە 29 وزەن قۇيادى. بۇكىل ءۇرجار ءوڭىرىنىڭ بارقىتبەل تاۋىنىڭ (تارباعاتاي) باۋىرىنان شىققان وزەندەر, بۇلاقتار جانە قىتاي جاعىنان كەلگەن وزەندەر (ەمىل, شاعىنتوعاي), سونىمەن قاتار, الماتى وبلىسىنىڭ ءۇشارال جاعىنان, الاتاۋدىڭ شەتكى سىلەمدەرىنە شىققان وزەن-سۋلار بارلىعى وسى كولگە قۇيىپ جاتىر. كوكتەم كەزىندە بۇكىل تارباعاتاي تاۋىنىڭ قالىڭ قارى وسى كولگە سۋ بولىپ قوتارىلادى. وسىعان وراي الاكول قازاقستانداعى ەڭ تەرەڭ كول.
مەن كەيدە وسى الاكولدىڭ ءۇشارال جاعىنان وڭتۇستىك وبلىستارىمىزعا قاراي كانال تارتسا عوي دەپ ويلايمىن. وڭتۇستىك وبلىستار سۋعا قارىق بولىپ قالار ەدى. جاعاسىنا ەل قونىپ, شارۋاشىلىقتار اشىلىپ, مىڭداعان ادامدار جۇمىسپەن قامتىلار ەدى-اۋ. سوندا الاكولدىڭ جاعالاۋى جىل سايىن قۇلاماس ەدى. جىلدان-جىلعا كوبەيىپ بارا جاتقان سۋ جاعالاۋدى قۇلاتۋىن توقتاتار ەمەس.
ماسەلەن, قىرعىزدىڭ ىستىقكولىنىڭ نەمەسە جاعاسىندا 22 كۋرورت بار ورىستىڭ بايكالىنىڭ جاعالاۋى قانداي دامىعان دەسەڭىزشى! كەلىپ جاتقان تۋريستەرگە دە, دەمالام دەۋشىلەرگە دە كەرەمەت جاعداي جاسالعان. بىراق سولاي بولا تۇرا, سۋىنىڭ دارۋلىگى مەن شيپالىلىعى جاعىنان ولار الاكولدەن الدەقايدا ءالسىز. بۇل شىندىق. بىزگە دەمالۋشىلارمەن بىرگە ەم قابىلداۋشىلار دا كەيىنگى جىلدارى وتە كوپ كەلەتىن بولدى.
دەگەنمەن, انا ءبىر جىلدارداعىداي ەمەس, كول جاعاسى, اۋدانعا اكىم بولىپ سەرىك زاينۋلدين كەلگەلى, وتە ءبىر جيناقىلىققا, تازالىققا كەلگەندەي دەسەك, ارتىق ايتقاندىق بولماس. كول جاعاسىنىڭ كوركەمدىگى دە ءبىرشاما جاقسارا ءتۇستى. تالاپ پەن تاباندىلىق قاي ءىستى بولماسىن قوزعالىسقا كەلتىرەدى عوي. اۋداندىق بيۋدجەتتەن بولىنگەن قارجى ەسەبىنەن مەكتەپ وقۋشىلارى مەن بالالاردىڭ دەنساۋلىقتارىن نىعايتۋ, جازعى دەمالىس ۋاقىتتارىن ۇتىمدى ۇيىمداستىرۋ ماقساتىندا الاكول جاعالاۋىندا بىرنەشە دەمالىس ءۇيى جانە اسحانا عيماراتى سالىنىپ, پايدالانۋعا بەرىلدى. ناتيجەسىندە جازعى دەمالىس ماۋسىمىندا 1500-دەن استام وقۋشىنىڭ كول جاعالاۋىندا دەنساۋلىقتارىن تۇزەپ, دەمالۋلارىنا مۇمكىندىك جاسالدى.
ءۇرجار اۋدانىنا كەلگەن ءىسساپارى كەزىندە, وقۋشىلاردىڭ كول جاعالاۋىنداعى دەمالىس ۇيلەرىن كورگەن وبلىس باسشىسى ب.ساپارباەۆ بۇل باستامانى وتە جوعارى باعالاپ, الاكول جاعالاۋىندا وسىنداي بالالار دەمالىس ورىندارىن سالۋ جونىندە وبلىستىڭ بارلىق اۋداندارىنا ۇسىنىس بەرگەن بولاتىن. قازىر بۇل شارا دا ءوز ناتيجەسىن بەرە باستادى.
ءۇرجار اۋدانىنىڭ تۇرعىندارى بۇل اتقارىلىپ جاتقان جۇمىستارعا ۇلكەن قوشەمەت بىلدىرۋدە. ۇستازدار مەن اتا-انالار ريزاشىلىعىن ايتىپ, قۋانىشتارىن جاسىرا الماۋدا. كول جاعاسى دامۋ ۇستىندە. تەك, الاكولدى, اسىرەسە, ونىڭ حيميالىق قوسپالارى كوپ ءۇرجار وڭىرىندەگى بولىگىن رەسپۋبليكامىزدىڭ تۇكپىر-تۇكپىرىنە, ءتىپتى, الەمگە وتە شيپالىلىعى, دارۋلىگى جونىنەن كەڭىنەن تانىتا الساق جارار ەدى.
بەيسەنعازى ۇلىقبەك,
قازاقستان جۋرناليستەر وداعىنىڭ مۇشەسى.
شىعىس قازاقستان وبلىسى.