ترانسشەكارالىق وزەندەر ماسەلەسى تالقىلاندى

كەزدەسۋ بارىسىندا تاراپتار ورال جانە ەرتىس ترانسشەكارالىق وزەندەرى باسسەيندەرىنىڭ ەكوجۇيەلەرىن ساقتاۋ جانە قالپىنا كەلتىرۋ جونىندەگى قازاقستان-رەسەي ىنتىماقتاستىعىنىڭ باعدارلامالارىن ىسكە اسىرۋ بارىسىن تالقىلادى. ولاردىڭ ءىرى وزەندەر باسسەيندەرىندە (ورال, ەرتىس جانە ت.ب.) زەرتتەۋلەر جۇرگىزۋ بويىنشا بىرىڭعاي جول كارتاسىندا كوزدەلگەن 17 ءىس-شارانىڭ 10-ى 2021 جىلى باستالدى, ونىڭ 4-ءى جىل سوڭىنا دەيىن اياقتالادى. قالعانى 2022 جىلى باستالادى.

تاراپتار بىرىڭعاي جول كارتاسىنىڭ ءىس-شارالار كەستەسىن ىسكە اسىرۋ بويىنشا مىندەتتەمەلەردى ورىنداۋ شەڭبەرىندە, سونداي-اق زەرتتەۋلەردىڭ دەرەكتەرىمەن الماسۋ ماقساتىندا اقپارات الماسۋدى جۇرگىزدى. جۇمىس كەستەسىنە سايكەس ءبىرىنشى جارتىجىلدىقتا گيدرولوگيالىق دەرەكتەردى جيناۋ جانە الماسۋ بويىنشا ءىس-شارالار ورىندالدى. تاراپتار وسى باعىتتاعى جۇمىستى جالعاستىرۋعا كەلىستى.

تاراپتار پاۆلودار وبلىسىنىڭ (بىل­قىلداق جيناقتاۋشى سۋ قويماسى ايماعىندا) جانە ومبى وبلىسىنىڭ (ول­حوۆكا اۋىلىندا) اۋماعىنداعى ەرتىس وزەنىنىڭ جانە جەراستى سۋلارىنىڭ ساپا­سىنا بىرلەسكەن مونيتورينگ ۇيىم­داس­تىرۋعا كەلىستى.

سونداي-اق تاراپتار ساراپشىلاردىڭ تۇراقتى جۇمىس كەزدەسۋلەرىن وتكىزۋدىڭ جوسپار-كەستەسىن بەكىتۋگە كەلىستى. ماسە­لەن, بيىلعى قىركۇيەك ايىندا جايىق (ورال) ترانسشەكارالىق وزەنى باسسەينىنىڭ ەكوجۇيە­سىن ساقتاۋ جونىندەگى قازاقستان-رەسەي كوميس­سياسىنىڭ 3-ءشى وتىرىسى وتەدى.

رەسەي تاراپى ەرتىس وزەنىنىڭ ترانس­شە­كارالىق سۋ رەسۋرستارىن ءبولۋ تۋرالى قۇجات ازىرلەۋدى ۇسىندى. قازاقستاندىق تاراپ قازىرگى ۋاقىتتا جوعارعى ەرتىس سۋ قويمالارى كاسكادىنان سۋ اعىزۋ ەكونوميكانىڭ بارلىق سالالارىنىڭ مۇددەلەرى ەسكەرىلگەن «وبا جانە ەرتىس وزەندەرىنىڭ سۋ رەسۋرستارىن كەشەندى پاي­دالانۋ جانە قورعاۋ» سحەمالارىنىڭ ەرەجەسىنە سايكەس كەلەتىنىن اتاپ ءوتتى.

سونداي-اق تاراپتار مەملەكەت باسشى­لارىنىڭ قاتىسۋىمەن (2021 جىل, كوك­شەتاۋ قالاسى) وتەتىن «ەكولوگيا جانە جاسىل دامۋ سالاسىنداعى ىنتى­ماق­تاستىق» تاقىرىبىندا رەسەي مەن قازاقستان اراسىنداعى XVII اي­ماقارالىق ىنتىماقتاستىق فورۋمىنا دا­يىندىق ماسەلەلەرىن تالقىلادى.

«ەگەمەن-اقپارات»