اۋعانستانداعى ىشكى ساياسي احۋالدىڭ شيەلەنىسۋىنە بايلانىستى بىرىككەن ۇلتتار ۇيىمى (بۇۇ) ءوزىنىڭ اۋعانستانعا جاردەم كورسەتۋ جونىندەگى ميسسياسىن (UNAMA) جانە اير-دا اككرەديتتەلگەن بۇۇ-نىڭ باسقا دا اگەنتتىكتەرىن الماتى قالاسىنا ۋاقىتشا ورنالاستىرۋ تۋرالى قازاقستانعا ءوتىنىش ءبىلدىردى.
قازاقستان مەن بۇۇ-نىڭ جان-جاقتى ءوزارا ءىس-قيمىلى رۋحى شەڭبەرىندە جانە وسى ۇيىمنىڭ تولىق قۇقىقتى مۇشەسى رەتىندەگى مىندەتتەمەلەرى اياسىندا پرەزيدەنت قاسىم-جومارت توقاەۆ بۇۇ ءوتىنىشىن قولداۋ تۋرالى شەشىم قابىلدادى.
18 تامىزدا UNAMA قىزمەتكەرلەرى بار العاشقى بورت الماتى اۋەجايىنا قوندى. ءسىم الماتى اكىمدىگى, قۇزىرەتتى ۆەدومستۆولار جانە قىزمەتتەرمەن بىرلەسىپ, ولاردى ورنالاستىرۋ بويىنشا جەدەل تۇردە قاجەتتى شارالاردى قابىلداۋدا. كەلگەن قىزمەتكەرلەر – حالىقارالىق ديپلوماتتار, بۇۇ پاسپورتتارى مەن يممۋنيتەتتەرىنىڭ يەگەرلەرى.
الماتىدا UNAMA جانە باسقا دا بۇۇ اگەنتتىكتەرىنىڭ كەڭسەلەرىن ورنالاستىرۋ جانە ولاردىڭ ودان ءارى قىزمەت ەتۋى ۋاقىتشا, ياعني اۋعانستانداعى جاعداي تۇراقتالعانعا دەيىن, شامامەن جارتى جىلعا سوزىلادى دەپ ۇيعارىلىپ وتىر.
قىزمەتكەرلەردىڭ كەڭسە مەن ءۇي-جايلاردى جالعا الۋى سياقتى شىعىستارىنىڭ بارلىعى تولىعىمەن بۇۇ-نىڭ بيۋدجەتىنەن قارجىلاندىرىلادى, دەپ حابارلادى ەلىمىزدىڭ سىرتقى ىستەر مينيسترلىگى.
«ەگەمەن-اقپارات»