جىل باسىنان بەرى قازاقستاندىقتار 47.8 مىڭنان استام يپوتەكالىق نەسيەنى مەرزىمىنەن بۇرىن تولەگەن. وتكەن جىلدىڭ ۇقساس كەزەڭىندە كورسەتكىش ەكى ەسە تومەن, ياعني 24.5 مىڭ بولعان, دەپ جازادى Egemen.kz.
ءبىرىنشى جارتىجىلدىقتا يپوتەكالىق قارىزداردى تولەگەن ازاماتتار سانى بىردەن ارتتى. بۇل زەينەتاقى جيناعىن مەرزىمىنەن بۇرىن الۋ مۇمكىندىگىنە بايلانىستى جۇزەگە اسقان.
سوڭعى مالىمەتتەر بويىنشا, بجزق-دان 8 494 ءوتىنىش بويىنشا يپوتەكالىق قارىزداردى تولىق جابۋعا 33.4 ملرد تەڭگە باعىتتالدى. ءىشىنارا وتەۋگە 56 067 ءوتىنىم بەرىلىپ, 130.3 ملرد تەڭگە تولەنگەن.
مەرزىمىنەن بۇرىن وتەلگەن نەسيە كولەمىن "وتباسى بانكى" دە اتادى. اتالمىش بانككە ەلىمىزدىڭ يپوتەكالىق نارىعىنىڭ 60%-ءى تيەسىلى. ءبىرىنشى جارتىجىلدىقتا بۇل بانكتىڭ قارىز الۋشىلارى 25 مىڭ نەسيەنى مەرزىمىنەن بۇرىن جاپقان.
2021 جىلعى قاڭتارداعى جاعداي بويىنشا بۇكىل تاريحتاعى كەلىسىمشارتتاردىڭ جالپى سانى 805 606 قۇرايدى, ولاردىڭ 55%-تەن استامى مەرزىمىنەن بۇرىن جابىلعان.
رەسمي اقپاراتقا سۇيەنسەك, قازاقستاندا بارلىق يپوتەكالىق قارىزداردىڭ جارتىسىنان استامى مەرزىمىنەن بۇرىن وتەلەدى. مەرزىمىنەن بۇرىن وتەۋدىڭ ورتاشا مەرزىمى - 3.5 جىل.