ەل تاۋەلسىزدىگىنىڭ 30 جىلدىعىنا وراي, تاراز قالاسىندا كوپتەگەن يگى ءىس اتقارىلۋدا. اسىرەسە, جەرگىلىكتى تۇرعىندار تاراپىنان تالاي جىلدان بەرى كوتەرىلىپ كەلە جاتقان كۇردەلى ماسەلەلەر وڭ شەشىمىن تابۋدا. اتاپ ايتساق, اۋلالاردى اباتتاندىرۋ, كوشەلەردى جارىقتاندىرۋ جۇمىستارى قارقىندى جۇرگىزىلۋدە.اتالعان جۇمىستاردىڭ ءبارى دە ەل تاۋەلسىزدىگىنىڭ 30 جىلدىعى اياسىندا ىسكە اسىپ وتىر.
بيىلدىڭ وزىندە وبلىس ورتالىعىندا 30-دان استام كوشە جوندەلۋدە. بۇل ماقساتقا بيۋدجەتتەن 1 ميلليارد, 120 ميلليون تەڭگە قاراستىرىلعان. قازىرگى كەزدە تاراز قالاسىنداعى ب.مومىش ۇلى كوشەسى كۇردەلى جوندەۋدەن ءوتىپ, وبلىس ورتالىعىنداعى كوپتەگەن كوشەلەر مەن بۇرىلىستارعا دا اسفالت توسەلۋدە. سونىمەن قاتار تاراز قالاسىندا تاۋەلسىزدىكتىڭ 30 جىلدىعىنا وراي 30 سپورت نىسانى سالىنۋدا. ونىڭ ىشىندە 13 نىسان «تارازعا تارتۋ» جوباسى اياسىندا ەل يگىلىگىنە بەرىلدى. ال 4 جاڭا فۋتبول الاڭى مەملەكەت ەسەبىنەن سالىنعان. سونداي-اق اتالعان نىسانداردىڭ ىشىندە مۇز ايدىنى, بوكس سارايى, ۇستەل تەننيسى مەن گيمناستيكا ورتالىعى جانە وزگە دە نىساندار بار.
تاۋەلسىزدىكتىڭ 30 جىلدىعىنا وراي, 30 بالالار الاڭى اشىلادى دەپ جوسپارلانۋدا. ونىڭ ىشىندە 13 نىسان «تارازعا تارتۋ» جوباسى اياسىندا ەل يگىلىگىنە بەرىلگەن. ال 12 نىسان مەملەكەت ەسەبىنەن سالىنىپ جاتقان بولسا, 5 نىسان دەمەۋشىلەر ەسەبىنەن سالىنۋدا. الاڭدار 2-7 جاس, 7-14 جاس جانە 14 جاستان جوعارى بولىپ بولىنگەن. قاۋىپسىزدىك ءۇشىن ارنايى جابىندىلار توسەلىپ, جاتتىعۋعا قاجەتتى قۇرالدار ورناتىلعان. سونىمەن قاتار تاۋەلسىزدىكتىڭ 30 جىلدىعىنا وراي 30-دان استام كوشەنى جارىقپەن قامتۋعا 200 ميلليون تەڭگە بولىنگەن. بۇل قاراجاتقا بيىل 34 كوشە جارىقتاندىرىلادى. اسىرەسە, بالاباقشالار مەن مەكتەپتەرگە باراتىن جولدارعا دا باسا نازار اۋدارىلادى.
تاراز قالاسىندا 2021-2023 جىلدارعا ارنايى جوسپار بەكىتىلگەن. الداعى 3 جىلدا 207 نىسان جارىقتاندىرىلسا, ۇزىندىعى 261,8 شاقىرىم بولاتىن 230 كوشە مەن بۇرىلىس جوندەلىپ, 241 اۋلا اباتتاندىرىلادى.
جامبىل وبلىسى