رەسەيدىڭ ۆورونەج قالاسىندا قوعامدىق كولىك جارىلىپ, 18 ادام زارداپ شەكتى. بۇل تۋرالى ۆورونەج وبلىسىنىڭ گۋبەرناتورى الەكساندر گۋسەۆ ءوزىنىڭ Telegram ارناسىنادا جازدى, دەپ حابارلايدى Egemen.kz تاسس-قا سىلتەمە جاساپ.
«زارداپ شەككەندەردىڭ سانى 18-گە جەتتى, ونىڭ ىشىندە ءبىر ايەل قايتىس بولدى», دەدى گۋسەۆ.
قالالىق جەدەل جاردەم ستانتسياسىنىڭ وكىلىنىڭ ايتۋىنشا, دارىگەرلەر قازا تاپقان ايەلدىڭ كىم ەكەنىن انىقتاي المادى.
«ول تۋرالى دەرەكتەر جوق. شامامەن 35 جاستا», دەدى ول.
ايتا كەتەيىك, بەيسەنبى كۇنى كەشكە ۆورونەج قالاسىنىڭ ورتالىعىندا شاعىن اۆتوبۋستا جارىلىس بولدى.
جەدەل جاردەم ستانتسياسىنىڭ حابالاۋىنشا, جاراقات العاندار اراسىندا بالالار جوق.
«جارىلىس كەزىندە اۆتوبۋستا 35 ادام بولعان», دەپ حابارلادى ۆورونەج قالاسىنىڭ لەنين اۋدانىنىڭ پروكۋرورى يۋري بۋرسوۆ «روسسيا-24» تەلەارناسىنا بەرگەن پىكىرىندە.
وقيعانىڭ نەدەن بولعانى قاراستىرىلىپ جاتىر.
ۆيتسە-گۋبەرناتور ۆيتالي شابالاتوۆتىڭ ايتۋىنشا, جارىلىسقا گاز باللونىنىڭ جارىلۋى سەبەپ بولۋى مۇمكىن. وقيعا ورنىندا ارنايى قىزمەتتەر جۇمىس ىستەپ جاتىر.
بۇل رەتتە قالالىق كولىك باسقارماسى باستىعىنىڭ ورىنباسارى ماكسيم زاحاروۆتىڭ ايتۋىنشا, اۆتوبۋستا گاز قوندىرعىسى بولماعان جانە ديزەل وتىنىمەن جۇمىس ىستەگەن.
تاسس دەرەككوزىنىڭ حابارلاۋىنشا, وقيعا جولاۋشىلار اۆتوبۋسقا ايالدامادان كىرگەن كەزدە بولعان.
وبلىس گۋبەرناتورى الەكساندر گۋسەۆ قالانىڭ بارلىق اۆتوپاركىن تەكسەرۋدى تاپسىردى. سونىمەن قاتار تۇرعىندارعا اۆتوبۋستاعى جارىلىس تۋرالى جالعان اقپارات تاراتپاۋدى ەسكەرتتى, زارداپ شەككەندەرگە مەديتسينالىق كومەك كورسەتۋ مەن ماتەريالدىق وتەماقى شارالارىن ازىرلەۋدى تاپسىردى.
پروكۋراتۋرا جارىلىسقا قاتىستى تەرگەۋدى باستادى.