ەلىمىزدىڭ شىعىس ايماعىنداعى دالا ءورتىن انىقتاۋ ءۇشىن عارىشتان باقىلاۋ جۇرگىزىلىپ جاتىر. اتالعان ىسكە كاسىبي قۇتقارۋشىلار جۇمىلدىرىلعان, دەپ جازادى Egemen.kz قازاقپاراتقا سىلتەمە جاساپ.
بيىلعى ءورت قاۋپى جوعارى كەزەڭ باستالعالى 180-نەن استام دالا ءورتى تىركەلگەن. ءتىلسىز جاۋ 4818 گەكتار اۋماقتى قامتىعان. ءورتتىڭ جيىلەۋىنىڭ باستى سەبەبى تۇرعىنداردىڭ وتتى تىيىم سالعان ايماقتاردا پايدالانۋى مەن ساقتىق شارالارىن ۇستاماۋى.
«جانۋدى باستاپقى كەزەڭدە انىقتاۋ ءۇشىن تجد ماماندارى كوسمومونيتورينگتى پايدالانادى. «Geosat» جشس-مەن جاسالعان كەلىسىمشارت نەگىزىندە تەرمونۇكتەلەر بويىنشا دەرەكتەر الۋعا مۇمكىندىك بار. بۇگىنگى تاڭدا عارىشتىق تەحنولوگيالاردىڭ كومەگىمەن قۇتقارۋشىلار ءورتتىڭ تارالۋىن تالاي رەت ۋاقتىلى انىقتاپ, جالىندى تەز اۋىزدىقتادى. 2021 جىلدىڭ 11 ساۋىرىنەن باستاپ 352 تەرمونۇكتە تىركەلگەن», دەلىنگەن شقو توتەنشە جاعدايلار دەپارتامەنتى ءباسپاسوز قىزمەتى تاراتقان حابارلامادا.
زاماناۋي مامانداندىرىلعان باعدارلامانىڭ كومەگىمەن شىعىس قازاقستان ءوڭىرىنىڭ 1 ملن شارشى شاقىرىمنان استام ايماق تاۋلىك بويى باقىلاۋدا بولادى. دالا ءورتىن عارىشتان باقىلاۋ توتەنشە جاعداي تۋىنداعاندا جەدەل شەشىم قابىلداۋعا كومەكتەسەدى.