اباي كۇنىنە وراي, قىزىلوردا وبلىسىنىڭ اكىمى گۇلشارا ابدىقالىقوۆا اباي ەسكەرتكىشىنە گۇل شوقتارىن قويىپ, تاعزىم ەتتى. شاراعا وبلىستىق ارداگەرلەر كەڭەسىنىڭ توراعاسى سەرىك دۇيسەنباەۆ, قىزىلوردا قالاسى اكىمى عانيبەك قازانتاەۆ قاتىستى, دەپ جازادى Egemen.kz.
بىلتىر مەملەكەت باسشىسىنىڭ جارلىعىمەن ۇلى ابايدىڭ 175 جىلدىق مەرەيتويى رەسپۋبليكا كولەمىندە اتالىپ ءوتتى. ۇكىمەت قاۋلىسىمەن 10 تامىز - اباي كۇنى بولىپ بەلگىلەندى.
ايتۋلى مەرەكەگە وراي اقىننىڭ ەسىمىن ۇلىقتاۋ ماقساتىندا وبلىس مادەنيەت ۇيىمدارىندا ونلاين فورماتتا ءتۇرلى مادەني تانىمدىق شارالار ءوتىپ جاتىر.
وڭىردەگى 4 ءبىلىم بەرۋ وشاعىنا, 86 كوشەگە اباي ەسىمى بەرىلگەن. قىزىلوردا قالاسىنداعى نازارباەۆ داڭعىلىنىڭ بويىندا ورنالاسقان اللەياعا اباي ەسىمى بەرىلىپ, قارا سوزدەرى تاسقا قاشالىپ جازىلعان.
اباي اۋىلىنداعى مەكتەپ اۋلاسىنا ءبيۋستى, «اباي اتىنداعى ءۇش تىلدە وقىتاتىن دارىندى بالالارعا ارنالعان مامانداندىرىلعان سىنىپتارى بار» مەكتەبىنىڭ اۋلاسىنا ەسكەرتكىشى ورناتىلعان.