توكيو وليمپياداسى شىمىلدىعىن جابار الدىندا سپورت سالاسىنداعى كەمشىلىگىمىز بەن قاتەلىكتەرىمىز سىن تەزىنەن وتكىزىلىپ, وسى سالانى قايتا رەفورمالاۋدىڭ قاجەت ەكەنىن ءبارىمىز سەزىندىك.
جاسىراتىنى جوق, سوڭعى جىلدارى قازاق سپورتى «لەگيونەرلىك» سپورتقا, ساۋدا-ساتتىقتىڭ الاڭىنا اينالىپ كەتتى. جاس تالانتتاردى ءوسىرىپ, ەلىمىزدىڭ اتاعىن شىعاراتىن پاتريوتتاردى تاربيەلەۋدىڭ ورنىنا سپورت سالاسىن باسقارۋعا كەزدەيسوق كەلگەندەردىڭ كەسىرىنەن تالانتتار تاسادا قالىپ, كاسىبي باپكەرلەر شەتتەتىلىپ, سپورت مانساپ يەلەنۋ مەن قۇر اتاق شىعارۋ الاڭىنا اينالدى. سپورتتىڭ قۇردىمعا كەتۋى وڭىرلەردە دە جالعاسىپ كەلەدى. ويتكەنى سپورت مەكتەپتەرى ديرەكتورلارىن اۋىستىرۋ دەگەن سىلتاۋمەن وڭىردەگى «ىڭعايسىز» باسشىلاردى ىعىستىرۋ باستالدى. بىرنەشە جىلدان بەرى ەل چەمپيوناتىنا تالانتتى سپورتشىلار شىعارعان تالعات تاقاباەۆتىڭ باسىنداعى جاعداي وسىعان دالەل.
اقتوبە قالاسىندا سۋ سپورتىنا ارنالعان ءۇش مەكتەپ بار: ەلۋ جىلدان استام تاريحى بار بالالار مەن جاسوسپىرىمدەرگە ارنالعان «شاعالا» مەكتەبى, «دەلفين» باسسەينى جانە سوڭعى جىلدارى سالىنىپ, وليمپيادالىق رەزەرۆ مەكتەبىنە اينالعان «دوستىق» باسسەينى. وسى ءۇش سپورت مەكتەبىنىڭ اراسىنداعى ەڭ وزىعى – «شاعالا» سۋعا جۇزۋدەن بالالار مەن جاسوسپىرىمدەر مەكتەبى.
ونىڭ ديرەكتورى وتكەن اپتانىڭ سوڭىندا اياق استىنان باسقا جۇمىسقا اۋىستىرىلىپ, بۇل جاس سپورتشىلاردىڭ اتا-انالارىنىڭ قاتتى قارسىلىعىن تۋعىزدى. ولار ديرەكتوردىڭ ورنىنا قايتىپ كەلۋىن تالاپ ەتىپ وتىر. سەبەبى تاقاباەۆ جۇزەگە اسىرىپ جاتقان سۋ سپورتىنىڭ دامۋ باعدارلاماسى ءۇزىلىپ قالماقشى. ەندى جاس جاتتىقتىرۋشىلار دا جۇمىستان كەتپەكشى. وتىرىپ قالعان ديرەكتورلاردى اۋىستىرۋ جاقسى يدەيا بولسا دا, بۇل جۇمىستى ناتيجەسى جوق مەكتەپتەردەن باستاۋ كەرەك ەدى. الايدا 19 سپورت مەكتەبى ديرەكتورلارىنىڭ اراسىنان ءجۇزۋ سپورتىنان ەلىمىزدە جاقسى ناتيجە كورسەتىپ جۇرگەن ديرەكتور ءبىرىنشى بولىپ كەتتى. بۇل جەردە وبلىس اكىمىنىڭ ورىنباسارلارى مەن سپورت باسقارماسىنىڭ باسشىسى بالالارمەن جۇمىستى جاقسى جولعا قويعان باسشىنى كەتىرىپ وتىرعانى انىق.
اقتوبەدەگى سۋ سپورتىنا قاتىستى جاعدايدى زەرتتەگەنىمىزدە, 2015 جىلى «شاعالا» بالالار مەن جاسوسپىرىمدەر ءجۇزۋ مەكتەبىنىڭ كومانداسى ەل چەمپيوناتىندا 18-ورىننان 7-ءشى ورىنعا كوتەرىلىپ, سودان بەرى حالىقارالىق سايىستارعا تالاي تالانتتى جاستاردى جىلما-جىل باعىتتاپ وتىرعانىن كوردىك. وكىنىشتىسى, توكيوداعى جازعى وليمپياداعا حالىقارالىق جارىستاردا تالاي مەدال العان شاعالالىقتار ىلىنبەي قالىپتى. ماسەلەن, وتكەن جىلى دەليدە وتكەن ازيا چەمپيوناتىنا قاتىسىپ, كۇمىس پەن قولا مەدالدار الىپ كەلگەن سوفيا ابۋباكيروۆا توكيو وليمپياداسىنا بارۋى ءتيىس بولسا دا, شاقىرىلماعان.
جارتى عاسىردان استام تاريحى بار بالالار مەن جاسوسپىرىمدەرگە ارنالعان «شاعالا» وليميادالىق رەزەرۆ مەكتەبىنىڭ جاس جۇزگىشتەرى 2017-2018 جىلى ەل چەمپيوناتىندا 19 التىن, 21 كۇمىس, 37 قولا مەدالعا يە بولعان. ءبىر چەمپيوناتتا ءبىر ءجۇزۋ مەكتەبىنىڭ 77 مەدالعا يە بولۋى وبلىستا بۇرىن-سوڭدى بولماعان كورسەتكىش ەدى. 2019-2020 جىلدارى بالالار 50 التىن, 20 كۇمىس, 23 قولا مەدال الىپ كەلدى. 2020-2021 وقۋ جىلىندا 22 التىن, 31 كۇمىس, 27 قولا الدى. مۇنىڭ ءبارى ديرەكتور تالعات تاقاباەۆتىڭ باسقارۋشىلىعى كەزىندە ىسكە اسىرىلعان. 2014 جىلعا دەيىن ەلىمىزدە ەڭ تومەنگى ورىندا تۇرعان اقتوبە وبلىسىنىڭ قۇراما كومانداسىن ءبىر جىلدىڭ ىشىندە 7-ءشى ورىنعا كوتەرگەن بىلىكتى ديرەكتور كەتسە, ءتاپ-ءتاۋىر جولعا قويىلعان جۇمىس اقساپ قالماي ما؟ اتا-انالار وسىعان الاڭدايدى. ويتكەنى ءجۇزۋ مەكتەبىنىڭ ۇزدىك جاتتىقتىرۋشىلارى دا جۇمىستان كەتۋگە وقتالىپ وتىر.
جاقسى باپكەرگە نەگە ورىن جوق؟
ەلىمىزدىڭ سپورت سالاسىنداعى كەرى كەتۋشىلىكتىڭ نەگىزگى سەبەبى – دۇرىس جوسپارلاۋدىڭ بولماۋىندا. تالعات تاقاباەۆ ارتتا قالعان مەكتەپ جۇمىسىن جاقسى جولعا قويۋ ءۇشىن ەڭ باستىسى ستراتەگيا وزگەرتىلۋى ءتيىس دەيدى. «جاس سپورتشى, جاتتىقتىرۋشى, باسشىلىق اراسىندا قارىم-قاتىناستى قايتا قاراپ, جاتتىعۋلاردى ۇزبەي باقىلاۋ كەزىندە ءبىراز قاتەلىكتى انىقتادىق. ەڭ باستىسى قاتەلىگىمىز – وقۋ-جاتتىعۋ جيىندارى سپورتشى تۇراتىن قالادا ەمەس, چەمپيونات وتەتىن قالادا ءوتۋى كەرەك. سەبەبى باسقا قالادا بالا ەشتەڭەگە الاڭدامايدى, ۇيىندە ءجۇرىپ جاتتىقسا كۇن ءتارتىبى بۇزىلا بەرەدى. ادامنىڭ اعزاسىنا ۋاقىت ايىرماشىلىعى ءبىراز اسەر ەتىپ, سايىسقا كەلگەن سپورتشىنى جۇرىسىنەن جاڭىلدىرىپ, تەز شارشاتادى. بىزدە وقۋ-جاتتىعۋ جيىندارىندا ءتارتىپ پەن تاربيە قاتار جۇرەدى. باسقا قالاعا سايىسقا بارعان بالالارىمىز مەكتەپ وقۋلىقتارىن وزدەرىمەن بىرگە الا كەتىپ, جاتتىعۋ اراسىنداعى ۇزىلىستەردە ساباق وقيدى.
بالالار قوناق ۇيگە جاتادى. جاسىراتىنى جوق, كەيبىر ارىپتەستەرىمىز ءبىر بولمەلى پاتەر جالداپ, بۇكىل بالانى سول جەرگە جاتقىزاتىنى بار. تاماقتان دا ۇنەمدەيدى. بۇل دۇرىس ەمەس. مەملەكەتتىڭ بالاعا بولىنگەن قارجىسى ءوز ماقساتىنا جۇمسالۋى ءتيىس. ءبىزدىڭ مەكتەپتىڭ ادىستەمەشى مامانى الدىن الا قوناق ۇيگە بىرنەشە ورىنعا تاپسىرىس بەرەدى. ول جەردە تاماق ىشەتىن ورىننىڭ بولۋى ماڭىزدى. تاماقتاناتىن جەرى جوق قوناق ۇيلەرگە جولامايمىز. سەبەبى وقۋ-جاتتىعۋ جيىنىنا بارعان بالانىڭ ۇيىقتاپ, تاماقتانىپ, جۋىناتىن لايىقتى ورنى بولماسا, پايدالى ۋاقىتىن جوعالتادى. ولاردى پويىزدان تۇسكەندە كۇتىپ الاتىن اۆتوبۋس تا جالدايمىز. سپورتشى جاتتىعۋدان باسقا ەش نارسەگە الاڭداماي, جەڭىسكە ىنتالى بولۋى ءتيىس. باپكەرلەرمەن بىرگە تالداۋ جۇرگىزۋمەن قاتار جارىسقا بارار الدىندا اتا-انالارمەن جينالىس وتەدى. ويتكەنى بالانىڭ جەڭىسكە دەگەن قۇلشىنىسىن وياتۋعا اتا-انانىڭ قولداۋى وتە ماڭىزدى. ءوز مەكتەبىمىزدە قۇرىلعان «جاتتىقتىرۋشى- بالا-اتا-انا» ۇشتىگىنىڭ, اۋىزبىرشىلىگىمىزدىڭ ارقاسىندا بالالار جۇلدەلى ورىندار الا باستادى. 2015 جىلى سۋعا جۇزۋدەن ەل چەمپيوناتىندا 18-ءشى ورىننان 7-ءشى ورىنعا كوتەرىلدىك», دەيدى تاجىريبەلى ديرەكتور تالعات تاقاباەۆ.
جاسىراتىنى جوق, ەلىمىزدىڭ بارلىق دەڭگەيدەگى سپورت مەكتەپتەرى بۇگىندە الەمدىك جاقسى ادىستەمەلەر مەن وزىق باعدارلامالاردى قولدانىپ جاتقان جوق. قازاقستانداعى سپورت مەكتەپتەرىنىڭ ورتاق باعدارلامالارىن دا, ادىسكەرلىك كەڭەستەرىن دە كورمەي ءجۇرمىز. باپكەرلەردىڭ جۇرىستەرى دە جۇمباق. بۇگىندە اركىم ءوز بەتىنشە وتاۋ تىككەن سپورت مەكتەپتەرىنىڭ جۇمىستارى دا اشىق ەمەس. كوپشىلىك سپورت مەكتەپتەرى اسىرەدىنشىلدەردىڭ ورداسىنا اينالىپ بارادى.
مەكتەپ ديرەكتورى, ادىسكەرى مەن جاتتىقتىرۋشىلارىنىڭ ورتاق جۇمىسىنىڭ ناتيجەسى حالىقارالىق چەمپيوناتتاردا ۇزدىك شىققان سپورتشىدان كورىنەدى. ەلىمىزدە سپورتقا قارجى جەتكىلىكتى ءبولىنىپ جاستا دا, ەش ناتيجە جوقتىعىنىڭ سەبەبى تاجىريبەلى مامانداردى جولاتپاۋىمىزدا جاتقان بولار. اتا-انالار قورعاپ جاتقان تالعات تاقاباەۆتىڭ مىسالى وسىنى دالەلدەيدى. سپورت مەكتەبىنىڭ ديرەكتورى ەڭ الدىمەن جاقسى مەنەدجەر بولۋى كەرەك. وكىنىشتىسى, اقتوبەدە جاقسى سپورت ديرەكتورلارى ساناۋلى عانا قالسا دا, تاۋەلسىز, پاتريوت ديرەكتورلار ىعىستىرىلىپ جاتىر.
لەگيونەرلەر – كەزدەيسوق ادامدار
20 جاستاعى ۆولگوگرادتىق جۇزگىش الەكساندر تارابرين قازاقستاننىڭ اتىنان 2012 جىلى لوندوندا وتكەن جازعى وليمپياداعا قاتىستى. سودان كەيىن ول اقتوبەدە قالۋدى ۇيعارىپ, قازاقستان ازاماتتىعىن الۋدى جوسپارلاپ, ۆولگوگرادتان وتباسىن كوشىرىپ اكەلىپ, پاتەر جالداپ تۇرىپ جاتقان. 2014 جىلى اقتوبەدە جازعى وليمپياداعا ليتسەنزيا الۋعا تۋرنير وتكەندە الەكساندر شەتتەتىلدى. ۆولگوگرادتان سۋعا جۇزۋدەن چەمپيون ءتورت دوسىن شاقىرىپ, اقتوبەنىڭ سۋ سپورتىن جوعارى دەڭگەيگە كوتەرۋدى ويلاستىرىپ جۇرگەن تالانتتى سپورتشى وسى جولى قاتتى رەنجىدى. ۆولگوگرادقا كەتىپ, سودان قايتا ورالعان جوق. قازىر ول حالىقارالىق دارەجەدەگى سپورت شەبەرى. لەگيونەردىڭ دە لەگيونەرى بار دەسەك تە, ءبىز وسىنداي جىگىتتەردى الىپ قالۋىمىز كەرەك ەدى. بۇگىندە اقتوبە سپورتىنا كەلگەن لەگيونەرلەر كىمدەر؟ ەشكىم بىلمەيدى.
اقتوبەدەگى «دوستىق» باسسەينىندە جاتتىعاتىن لەگيونەرلەردىڭ كوبى اقتوبەگە كەلمەسە دە, ولارعا وبلىستىق بيۋدجەتتەن جاقسى ايلىق تولەنەدى. ايلىقتارى 200 مىڭ تەڭگەدەن كەم ەمەس, شەتەلدەردە جاتتىعاتىن بولسا, شەتەلدىك ۆاليۋتامەن تولەنەدى. ال كىشكەنتاي بالالاردى كۇنى-ءتۇنى باۋلىپ, ەڭبەكتەنىپ جۇرگەن جاس جاتتىقتىرۋشىلاردىڭ ەڭبەكاقىسى 100 مىڭ تەڭگەگە دە جەتپەيدى. جەرگىلىكتى شەنەۋنىكتەر ءوزىمىزدىڭ جاتتىقتىرۋشىلاردى قولداۋدىڭ ورنىنا, سىرتتان لەگيونەر ساتىپ الۋدى جاقسى جولعا قويعان. راسىندا, جەرگىلىكتى سپورتتىڭ دامۋىنا لەگيونەرلەردىڭ ەش پايداسى جوق. سۋعا جۇزۋدەن اقتوبە اتىنان چەمپيوناتتارعا قاتىسىپ جۇرگەن لەگيونەر ديانا زلوبيناعا قانشا قارجى كەتكەنىن «دوستىق» وليمپيادالىق رەزەرۆ مەكتەبىنىڭ باس جاتتىقتىرۋشىسى ازامات سارباسوۆتىڭ وزىنەن باسقا ەشكىم بىلمەيدى. سالىستىرا كەتسەك, «شاعالا» بالالار مەن جاسوسپىرىمدەر مەكتەبى سپورتشىلارىنىڭ وقۋ-جاتتىعۋ جيىندارىنا جىلىنا 8 ميلليون تەڭگە, ال «دوستىق» وليمپيادالىق رەزەرۆ مەكتەبىنە 36 ميلليون تەڭگە بولىنەدى. بىراق «دوستىق» لەگيونەرلەرگە تولەيدى, ال «شاعالادا» ءوزىمىزدىڭ بالالار جاتتىعادى. الايدا قانشا قارجى بولىنسە دە, «دوستىقتا» ناتيجە جوق. «دوستىق» تەك لەگيونەرلەردىڭ ارقاسىندا اتىن شىعارعان. لەگيونەرلەرگە قارجىنى سۋداي شاشىپ وتىرعان اقتوبە وبلىستىق سپورت باسقارماسى بۇل كەزدە كۇردەلى جوندەۋ وتكىزىلۋگە ءتيىس «شاعالا» باسسەينىنىڭ جوبالىق-تەحنيكالىق قۇجاتتارىن ازىرلەۋگە 1 ميلليون 600 مىڭ تەڭگە قارجىنى قيمايدى.
اقتوبەدە تالانتتى بالا دا, ءوز ءىسىن بىلەتىن كاسىبي جاتتىقتىرۋشىلار دا جەتكىلىكتى. بىراق ولارعا ورىن جوق. ماسەلەن, ۇلتتىق قۇراما كومانداسىنىڭ قاتارىندا جارىستارعا قاتىسقان كاسىبي باپكەر اللا گۋبينانى توكيو وليمپياداسىنا باراتىن قۇرامعا قوسۋعا بولار ەدى. ال توكيو وليمپياداسىنا قازاقستان قۇراما كومانداسى قاتارىندا اقتوبەدەن اتتانعان ديانا نازاروۆا ەش ناتيجە كورسەتكەن جوق. سەبەبى سوڭعى ەكى جىلدا بالا كۇتىمىمەن وتىر. نازاروۆانىڭ ورنىنا ابۋباكيروۆا بارۋى كەرەك ەدى. 10 جاسىنان باستاپ «شاعالادا» جاتتىققان, وتكەن جىلى دەليدە وتكەن ازيا چەمپيوناتىندا كۇمىس پەن قولا اكەلگەن سوفيا ابۋباكيروۆانىڭ مەدال اكەلۋ مۇمكىندىگى ديانا نازاروۆادان جوعارى ەدى. وسىدان كەيىن تالانتتى جاستار رەسەيگە كەتپەي نە ىستەيدى؟
تالاپتى جاتتىقتىرۋشى تالانتتى شاكىرت تاربيەلەيدى
اللا گۋبينا «شاعالا» سۋعا ءجۇزۋ مەكتەبىندە اسلان بوعاندىقوۆتى كىشكەنتاي كەزىنەن جاتتىقتىرىپ, ازيا چەمپيونى ەتىپ شىعاردى. بىراق چەمپيون بولىپ ورالعان اسلان «دوستىق» باسسەينىندە جاتتىعىپ ءجۇرىپ, شەبەرلىگىن جوعالتىپ الدى. ءوسىپ كەلە جاتقان تالانتتى سپورتشىعا وبال جاسايتىندار كوپ. اسىرەسە, جاتتىقتىرۋشى اۋىسقاندا. بالانىڭ شەبەرلىگىن جەتىلدىرە الماساڭ, وبالىنا قالما, كىشكەنتايىنان تاربيەلەگەن جاتتىقتىرۋشىسىنان ايىرما. وسىدان كورىنىپ تۇرعانداي, جاتتىقتىرۋشىسى كەلىسپەسە, بالانى جاقسى سپورتشى ەتىپ شىعارۋ وتە قيىن. تالانتتى بالانىڭ قابىلەتىن بىلىكسىز جاتتىقتىرۋشىنىڭ وشىرەتىنىنە تاعى ءبىر مىسال. «شاعالادا» جاتتىعىپ جۇرگەن اعايىندى قامزەنوۆتەردىڭ جاتتىقتىرۋشىسى اۋىسقان سوڭ اتاعى شىقپاي قالدى.
كۇنى كەشە توكيوعا بارار الدىندا اقتوبەنىڭ اتىنان ەلىمىزدىڭ قۇراما كومانداسىنا الىنعان قىرعىزستاندىق حۋدياكوۆ ەڭ سوڭعى ناتيجە كورسەتتى. بالكىم الەكساندر تارابرين, سوفيا ابۋباكيروۆا, اللا گۋبينا ەل قۇراماسىنا الىنعاندا ءبىر مەدالدى ولجالار ما ەدى؟ حۋدياكوۆتىڭ اقتوبەگە كەلىپ جاتتىققانىنا سەنىمىمىز از. ول سوڭعى كەزەكتە بىرەۋلەردىڭ ايتۋىمەن كەزدەيسوق قوسىلعان سپورتشى.
لەگيونەرلەرگە بيۋدجەت قارجىسىن جۇمساۋدى جانى سۇيەتىن شەنەۋنىكتەر اقتوبەدە جەتكىلىكتى. لەگيونەر – ۋاقىتشا سپورتشىلار. اقشا الىپ تۇرسا, ەلىمىزدىڭ سپورتشىسى سانالادى. ەرتەڭ باسقا مەملەكەت ەكى ەسە اقشا بەرەمىن دەسە, ول تايىپ تۇرادى. ەلىمىزدە سپورتتىڭ دامىماي جاتقانى دا وسىدان. باس باپكەرلەر جاس شاكىرتتەردى تاربيەلەۋگە باس قاتىرعىلارى جوق. سول سياقتى گرەك-ريم كۇرەسىنەن الەم چەمپيوناتىنىڭ كۇمىس جانە قولا مەدال يەگەرى مەيرامبەك ايناعۇلوۆتىڭ توكيو وليمپياداسىنا جەتكىلىكتى دايىندىعى بولمادى. ول ەلدىڭ ءۇمىتى ەدى, بىراق مەيرامبەكتى ەشكىم دايىنداعان جوق, وقۋ-جاتتىعۋ جيىنداردان وتۋگە شەتەلدەرگە جىبەرىلمەدى. شالقاردان شىعارىلماعان, بابى كەلىسپەگەن سپورتشىدان قانداي ناتيجە كۇتۋگە بولادى؟
اقتوبە اتىنان شىققان جۇزگىشتەر حۋدياكوۆ پەن زلوبينا اقتوبەگە كەلىپ وقۋ-جاتتىعۋ جيىندارىن وتكىزدى مە؟ جوق. ولار ىستىقكولدە وتكىزەدى, وعان جەرگىلىكتى قازىنادان دوللارمەن اۋدارىلادى. ويتكەنى باسقا ەل. بيۋدجەتتىك كودەكسكە ساي سپورتشىلار قازاقستاننان تىس جەردە وقۋ-جاتتىعۋ جيىندارىن وتكىزسە, قارجى اقش دوللارىمەن اۋدارىلادى.
يانا شاكيروۆا 12 جاسىندا قازاقستان حالىقتارى سپارتاكياداسىندا ۇلكەندەرمەن بىرگە سايىستا وزىپ شىعىپ, 6 التىن مەدال اكەلگەندە, وسى جەتكىنشەككە لايىقتى قۇرمەت كورسەتىلمەدى. يانا سانكت-پەتەربۋرگكە جارىسقا بارعاندا, جۇزدەن استام جۇزگىشتىڭ اراسىنان وزىق شىققاندا تالانتتى سپورتشىعا كوزى تۇسكەن رەسەيلىكتەر وزدەرىنە شاقىردى. يانا رەسەي فەدەراتسياسىنىڭ سپورت شەبەرلىگىنە نورماتيۆ تاپسىرىپ, بىلىكتىلىگىن دالەلدەدى. ول جاقتا سپورت شەبەرلىگىنە ءوتۋ بىزگە قاراعاندا قاتاڭ. 17 جاستاعى يانا شاكيروۆا قازىر رەسەي فەدەراتسياسىنىڭ ۇلتتىق قۇراماسى ساپىندا ەۋروپادا جاتتىعۋدا ءجۇر. مۇنىمەن نە ايتپاقشىمىز؟ اقتوبەدە ءوز جۇمىستارىن سۇيەتىن كاسىبي جاتتىقتىرۋشى دا, تالانتتى بالالار دا بولعانىمەن, ولارعا قولداۋ جوق. جاقسى ناتيجە كورسەتىپ كەلە جاتقان بالانى جاتتىقتىرۋشىسىنىڭ قولىنان ج ۇلىپ الىپ, بىلىكسىز باپكەرگە اۋدارىپ تاستاپ, تالاي تالانتتىڭ بولاشاعىنا بالتا شابۋ جالعاسىپ جاتىر. جالعاسا دا بەرەتىن شىعار.
تالعات تاقاباەۆتىڭ ءجۇزۋ مەكتەبى باسشىلىعىنان كەتۋىنە بايلانىستى اتا-انالاردىڭ جازعان ارىزىنا وراي, سپورت باسقارماسىنىڭ رەسمي جاۋابىن سۇرادىق. وعان اقتوبە وبلىستىق سپورت باسقارماسىنىڭ باسشىسى ەۆگەني گونچاروۆ: «وبلىستاعى بارلىق سپورت مەكتەپتەرى ديرەكتورلارىنىڭ قىزمەتىنە مونيتورينگ جۇرگىزگەنىمىزدە, كوپتەگەن ديرەكتورلاردىڭ ۇزاق جىل بويى ءبىر ورىندا وتىرىپ قالعانىنا كوز جەتكىزدىك. باسشى ءبىر ورىندا ءۇش جىل وتىرسا, بەلسەندىلىگىن جوعالتادى. سوندىقتان دا بەس جىلدان استام وتىرعان بەس ديرەكتوردى اۋىستىردىق. ايتا كەتەتىنىم, اۋداندارداعى سپورت مەكتەپتەرىنىڭ كەيبىر ديرەكتورلارى 18-19 جىلدان بەرى تاپجىلماي وتىر. بۇل جەردە اتا-انالار دۇرىس تۇسىنگەنى ابزال. جاتتىقتىرۋشىلار دا ورىندارىندا قالادى», دەپ جاۋاپ بەردى.
وسىلايشا وبلىستا سپورت مەكتەپتەرىنىڭ ديرەكتورلارىن اۋىستىرۋ ناۋقانشىلدىقا اينالىپ, بىلىكتى ديرەكتورلاردى كەتىرۋمەن باستالدى. ءبىز وڭىردەگى تالانتتى سپورتشىلاردىڭ جاعدايى, بىلىكسىز باپكەرلەر مەن سپورتتاعى قارجىنىڭ قايدا جۇمسالىپ جاتقانى تۋرالى زەرتتەۋىمىزدى الداعى ۋاقىتتا دا جالعاستىراتىن بولامىز.