ءورت سوندىرۋشىلەر بىرنەشە كۇن بويى جويقىن ءورتتى سوندىرۋگە تىرىسىپ جاتىر. گرەكيانىڭ ايگىلى كۋرورتى جانە كريتتەن كەيىنگى ەكىنشى ارال – ەبۆەي ارالىنان 2000-نان استام ادام ەۆاكۋاتسيالاندى, دەپ جازادى Egemen.kz ۆۆس-گە سىلتەمە جاساپ.
دەمالىس كۇندەرى تۋريستەر مەن افينانىڭ سولتۇستىك-شىعىسىندا ورنالاسقان ەبۆەي ارالىنىڭ تۇرعىندارى پاروممەن ماتەريككە جەتكىزىلدى. ارالداعى ۇيلەر ورتەنىپ, ەلەكتر سىمدارى زاقىمدالدى.
قازىر گرەكيادا ونداعان ورمان ءورتى ءورشىپ تۇر, بىراق ولاردىڭ ىشىندەگى ەڭ اۋقىمدىسى ەبۆەي ارالىندا بولىپ جاتىر. دەمالىس كۇندەرى ولاردى ءسوندىرۋ وپەراتسياسىنا جۇزدەگەن ءورت ءسوندىرۋشى, اسكەريلەر مەن 17 ۇشاق, تىكۇشاق تارتىلدى.
«بىزدە قازىر ەكى ءورت فرونتى بار: بىرەۋى ەلدىڭ سولتۇستىگىندە, ەكىنشىسى وڭتۇستىگىندە. الدا تاعى ءبىر قيىن كەش پەن تاعى ءبىر قيىن ءتۇن كۇتىپ تۇر», دەدى گرەكيا ازاماتتىق قورعاۋ ءمينيسترىنىڭ ورىنباسارى نيكوس حارداليوس.
ول افينادا جاعداي جاقسارعانىن, بىراق قۇرعاق جەلدىڭ كۇشەيۋىنە بايلانىستى ءورت قايتا ءورشۋى مۇمكىن دەگەن قورقىنىش بارىن ايتتى.
وسى اپتانىڭ باسىندا ورماندا شىققان ءورت افيناعا جاقىنداپ, كوشەلەردى قاتتى ءتۇتىن باسىپ, بىرنەشە ءۇي ورتەنىپ كەتتى. جۇما كۇنى كەشكە بيلىك استانانىڭ سولتۇستىك ماڭىنداعى تۇرعىنداردى جاپپاي ەۆاكۋاتسيالادى.
گرەكيادا ءبىر اپتا بويى اپتاپ ىستىق بولدى. ەلدىڭ كەي جەرلەرىندە اۋا تەمپەراتۋراسى 47 گرادۋسقا دەيىن جەتتى. ەندى تەرمومەتر 40-تان تومەندەگەن. الايدا ەلدەگى اۋا تەمپەراتۋراسىنىڭ وسىنشالىق كوتەرىلۋى شامامەن 30 جىل بويى بايقالماعان.
ەۋروپالىق ورمان ورتتەرىنىڭ اقپاراتتىق جۇيەسىنىڭ حابارلاۋىنشا, گرەكيادا شىققان ءورت 56 مىڭ گەكتار اۋماقتى قامتىدى.
بيىلعى جازدا ورمان ءورتى گرەكيا, البانيا, بولگاريا, سولتۇستىك ماكەدونيا مەن تۇركيادا, سونداي-اق اقش-تىڭ كاليفورنيا شتاتىندا شىقتى.
ياكۋتياداعى ءورت, رەسمي مالىمەتتەر بويىنشا, قازىردىڭ وزىندە 6 ميلليون گەكتاردى شارپىعان. وندا 150-دەن استام ورمان ءورتى شىققان. ونى سوندىرۋگە مىڭداعان ادام, جۇزدەگەن تەحنيكا تارتىلدى.
سەنبىدە ياكۋتيانىڭ ورتالىق بولىگىندەگى بياس-كيۋەل اۋىلىندا 30-دان استام ءۇي ورتەنىپ, تۇرعىندارى قاۋىپسىز جەرگە كوشىرىلدى.
جەكسەنبىدە بيلىك كالۆيتسا مەن حارىيالاح اۋىلدارىنىڭ تۇرعىنىن ەۆاكۋاتسيالادى.